2025 թվականին 2018-ի համեմատությամբ գիտության ֆինանսավորման 180 տոկոս աճ է արձանագրվել: Այդ մասին Կառավարության՝ հունվարի 29-ի նիստին հայտարարեց ՀՀ վարչապետ Նիկոլ Փաշինյանը:
ԿԳՄՍ նախարար Ժաննա Անդրեասյանը ներկայացրեց թվերը. ըստ այդմ՝ 2025-ին պետբյուջեից շուրջ 40,2 մլրդ դրամ է հատկացվել, իսկ 2018-ին՝ շուրջ 14 մլրդ: Այստեղ, ըստ նախարարի, ներառվում է նաև ռազմարդյունաբերության բյուջեն:
Նիկոլ Փաշինյանը ներկայացրեց, թե բյուջեի ֆինանսավորման փոփոխության և ատեստավորման համակարգի ներդրման արդյունքում ինչպես է փոխվել գիտնականների վարձատրության համակարգը, և ՝ հիշեցրեց, որ փոփոխություններ նախաձեռնելու տարին 2021 թվականն էր:
Ըստ այդմ՝ 2021 թվականին լաբորանտ-ճարտարագետը ստացել է 67,300 դրամ, 2026-ին՝ 138,300 դրամ նվազագույն աշխատավարձ, աճը՝ ավելի քան կրկնապատիկ:
Ավագ լաբորանտը, ավագ ճարտարագետը 2021-ին ստացել է 76,000 դրամ, 2026-ին՝ 179,000 դրամ, աճը՝ ավելի քան 135 տոկոս:
Կրտսեր գիտաշխատողը 2021 թվականին ստացել է 90,400 դրամ, 2026-ին՝ 276,000 դրամ, աճը՝ 205 տոկոս:
Ավագ գիտաշխատողը 2021-ին ստացել է 99,000 դրամ, 2026-ին՝ 343,000 դրամ, աճը՝ 246 տոկոս:
Առաջատար գիտաշխատողը 2021-ին ստացել է 114,300 դրամ, 2026-ին՝ 443,800 դրամ, աճը՝ 288 տոկոս:
Գլխավոր գիտաշխատողը 2021-ին ստացել է 138,100 դրամ, 2026-ին՝ 552,900 դրամ, աճը՝ 300 տոկոս:
Գիտական խմբի ղեկավարը 2021-ին ստացել է 129,000 դրամ, 2026-ին՝ 410 հազար դրամ, աճը՝ 217 տոկոս:
Ըստ Փաշինյանի՝ այս տարիների ընթացքում նաև սարքավորումներ են ձեռք բերվել. 2021-2026 թվականներին 142 գիտական սարքավորումների համար տրամադրվել է շուրջ 13 մլրդ դրամ: Դրանց թվում է նաև ԵՊՀ-ի սուպերհամակարգիչը, որի ձեռքբերման և տեղադրման ծախսերը կազմել են 3,7 մլրդ դրամ:
Սկզբնական շրջանում կարծիքներ կային, որ այն չի օգտագործվելու, սակայն այսօր արդեն, ըստ Փաշինյանի, նոր սուպերհամակարգչի կարիք կա:
«Տարբեր ոլորտներում հսկայական փոփոխություններ են լինում, բայց լռություն կա, և այդ լռությունը մի քիչ հարցեր է առաջացնում: Բայց դրանք խոհափիլիսոփայական ոլորտի հարցեր են, որովհետև մեր ներդրումները մեր պետության և մեր երկրի զարգացման համար են: Բայց ես ուզում եմ այս նյուանսն ընդգծել, որովհետև եթե գիտության հետ կապ չունեցող մի բան տեղի ունենա, մեկը դուրս գա հրապարակ, գոռա՝ ծախեցի՛ն, հետևից 300 գիտնական հայտարարություն կստորագրի՝ առանց ճշտելու՝ ով ծախեց, ինչ ծախեց, երբ ծախեց: Եվ սա հաստատուն գիտամտավորական կուլտուրա է Հայաստանում»,- ասաց Փաշինյանը՝ հավելելով, թե սա շատ վատ բան է, բայց իրականությունը սա է:
«Ստորագրահավաք իրականացրած մեր բազմաթիվ հարգելի գիտաշխատողներն այսօր Կառավարության գործունեության արդյունքը վայելում են: Բարո՛վ վայելեն, ես նորանոր գիտական, հանրային, քաղաքական հաջողություններ եմ մաղթում բոլորին»,- ասաց Փաշինյանը:
ԿԳՄՍ նախարար Ժաննա Անդրեասյանն իր հերթին ընդգծեց՝ այնուամենայնիվ, ոլորտում տրամադրություն և մթնոլորտ է փոխված:
