Երևան քաղաքի՝ 2025 թվականի բյուջեում փոփոխություններ կկատարվեն: Այդ մասին որոշման նախագիծը Երևանի ավագանու՝ հոկտեմբերի 23-ի նիստին ներկայացրեց Երևանի քաղաքապետարանի աշխատակազմի ֆինանսական վարչության պետ Քրիստինե Ավետիսյանը:
«Նախատեսվում է Երևան քաղաքի հանրային տրանսպորտի շարժակազմերի համալրման և արդիականացման ծրագրին ուղղել 1 մլրդ 297 մլն 890 հազար դրամի չափով գումար՝ ձեռք բերվող «Յութոնգ» մակնիշի 45 նոր տրոլեյբուսների՝ պայմանագրով նախատեսված գնի 30 տոկոսի չափով՝ որպես կանխավճար, իսկ պայմանագրային մնացորդի գումարի նախատեսումը հաշվի կառնվի 2026 թվականի բյուջետային տարում»,- ասաց նա:
Երևան քաղաքի բազմաբնակարան շենքերի, վերելակների արդիականացման ծրագրերին կուղղվի 839 մլն 960 հազար դրամ, որի շրջանակներում ձեռք կբերվի և բազմաբնակարան շենքերում կտեղադրվի 104 նոր վերելակ:
Արտադպրոցական դաստիարակության ծրագրին կուղղվի 3 մլն 600 հազար դրամ դպրոցականների ամառային հանգստի կազմակերպման համար տրանսպորտային ծախսերի փոխհատուցման նպատակով:
Ընթացիկ նպատակի հատկացումները նախատեսվում է ավելանել 12 մլն դրամով և ուղղել «Ակադեմիական քաղաք» ծրագրի շրջանակներում օտարման ենթակա գույքերի շուկայական գնահատման և հաշվետվության տրամադրման ծառայությունների ձեռքբերմանը:
Քրիստինե Ավետիսյանը նաև տեղեկացրեց, որ Երևանի մետրոպոլիտենի ենթակառուցվածքների կառուցման համար նախատեսված բյուջեն կնվազի 5 մլրդ 266 մլն դրամով:
«Հիմք ընդունելով վարչական իրավախախտումներ կատարած անձանց փոխարեն համայնքի բյուջեից վճարում կատարելու մասին և Երևան քաղաքի ավագանու որոշման նախագիծը, մասնավորապես կառուցապատման ոլորտում գործունեություն իրականացվող բազմաթիվ ընկերությունների կողմից՝ գործնականում առաջացած խնդիրների լուծման անհրաժեշտությամբ պայմանավորված, վարչական իրավախախտում կատարելու համար վարչական ակտով նախատեսված, չվճարված տուգանքի գումարի կամ դրա չվճարված մասի չափով համայնքի բյուջեից վճարում կատարելու անհրաժեշտությունը՝ առաջարկվում է Երևան քաղաքի 2025 թվականի բյուջեի եկամտային մասն ավելացնել 1 մլրդ 400 մլն դրամով՝ համապատասխան ծախսն իրականացնելով պահուստային ֆոնդից»,- ասաց նա:
