Տեղի ունեցավ այն, ինչ անխուսափելի էր, տեղի ունեցավ այն, ինչին մենք տարիներ շարունակ սովոր ենք եղել տեսնել սերժաքոչարյանական ուժերի կատարմամբ: Այս մասին խորհրդարանում՝ լրագրողների հետ զրույցում, ասաց ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը՝ անդրադառնալով Գյումրիում կատարվող իրադարձություններին, մասնավորապես, քաղաքապետ Վարդան Ղուկասյանի կալանավորմանը:
«Լափամանից կտրված մեկը վերադարձավ իր պատկերացմամբ լափամանի մոտ՝ լավ չհասկանալով, որ համայնքային կամ պետական բյուջեն այլևս լափաման չէ, այլ համայնքի ու պետության բնակիչների կյանքը բարելավելու համար ծառայող համընդհանուր գումար»,- հայտարարեց պատգամավորը:
Լրագրողներից մեկի դիտարկմանը ի պատասխան՝ արդյոք դա տեղի չի՞ ունեցել այն բանից հետո, երբ վարչապետ Նիկոլ Փաշինյանն է խորհրդարանում անդրադարձել Գյումրիի քաղաքապետին, Ալեքսանյանն ասաց. «Հիմա, եթե նկատի ունեք, որ վարչապետն ունի էքստրասենսոր կարողություններ և կարողացել է գուշակել, որ Վարդանիկը (Գյումրիի քաղաքապետ - խմբ.), ինչպես և սերժաքոչարյանական կլանի յուրաքանչյուր ներկայացուցիչ չի կարողանալու զսպել իրեն, չի կարողանալու զսպել գայթակղությունը և որոշելու է լափել համայնքային բյուջեից, ապա դրանում կարող եք բոլորիս էլ մեղադրել, որովհետև ՀՀ յուրաքանչյուր ադեկվատ քաղաքացի վստահ է, որ սերժաքոչարյանական կլանի յուրաքանչյուր ներկայացուցչի եթե տաս փոքր իշխանություն, նա այդ իշխանությունը կփորձի ծառայեցնել որպես իր լափամանը լցնելու միջոց, ինչը և արել է Վարդանիկը»:
Ինչ վերաբերում է անմեղության կանխակարկածին, հրապարակված ձայնագրությունների իսկությանը, նկատեց՝ այն, որ Վարդան Ղուկասյանն իր բնույթով հանցագործ, կրիմինալ, լափակեր է, դա տեսանելի է, և դա հասկանալու համար պետք է գնալ Գյումրի, կանգնել փողոցներում, բակերում ու հետո գնալ, կանգնել նրան պատկանող գերշքեղ հյուրանոցի առաջ ու հարց ուղղել՝ արդյոք 200-300 հազար դրամ աշխատավարձ ստացող մարդը կարո՞ղ է կառուցել այն:
Հարցին՝ ՔՊ-ի օրակարգում կա՞ Գյումրու համայնքապետի պաշտոնը վերցնելը, Ալեքսանյանը պատասխանեց՝ այդ պաշտոնը ճամպրուկ չէ, որ վերցվի:
«Սպասենք սերժաքոչարյանական խաչասերման երկրորդ սերիային, տեսնենք՝ էս մի խաչասերումից ինչ են ուզում ծնեն»,- ասաց Ալեքսանյանը:
Նրա խոսքով՝ ՀՀ-ում այլևս երբեք վերադարձ չի լինելու լափակերությանը, կաշառակերությանը, համայնքն ու պետությունը սեփական գրպաններն ու լափամանը լցնելու միջոցին:
Ավելի վաղ հայտնել էինք՝ Վարդան Ղուկասյանի և մյուս պաշտոնատար անձանց պաշտոնավարումը կասեցվել է:
Հիշեցնենք՝ Գյումրու քաղաքապետ Վարդան Ղուկասյանը կալանավորվեց 2 ամսով:
Ինչպես ավելի վաղ հայտնել էինք, ձերբակալումից հետո կալանքի միջնորդություն էր ներկայացվել:
Հակակոռուպցիոն կոմիտեում քննվող վարույթի շրջանակներում հոկտեմբերի 20-ին Գյումրու քաղաքապետարանում իրականացվել էին քննչական գործողություններ:
Գյումրի համայնքի մի խումբ պաշտոնատար անձանց կողմից խոշոր չափերով կաշառք ստանալու, կաշառք տալու մեղադրանքներով
ձերբակալվել է 8 անձ, այդ թվում՝ քաղաքապետ Վարդան Ղուկասյանը:
Գյումրիում զանգվածային անկարգություններին մասնակցելու, արդարադատության իրականացմանը խոչընդոտելու հատկանիշներով
նախաձեռնվել է քրեական վարույթ:
Գյումրու քաղաքապետարանի մոտից ձերբակալվել և Համայնքային ոստիկանության տարածքային ստորաբաժանումներ է տեղափոխվել 23 անձ:
