Doping Space ընկերության տնօրեն Հայկ Սիմոնյանը ներկայացրել է Ջենիֆեր Լոպեսի համերգի կազմակերպման մի շարք մանրամասներ.
«Կոմերցիոն տեսանկյունից սա Հայաստանում տեղի ունեցած ամենամեծ համերգն է։ 10 տարի առաջ մենք մասնակիցների թվաքականի տեսանկյունից ունեցել ենք System of a Down խմբի համերգ, բայց կոմերցիոն տեսանկյունից համերգ, որը ունի այսպիսի ցուցանիշներ, իսկապես առաջինն էր։ Նմանատիպ միջոցառումների անցկացումը որևէ երկրում խոսում է մի քանի բանի մասին։ Առաջին՝ որ դու երկիր ես, որ կարող ես հյուրընկալել մարդկանց և բացի համերգից այլ բաներով ևս զբաղեցնի, որովհետև միայն համերգը բավական չէ, որ մարդը գնա որևէ երկիր, դրա համար պետք է որոշակի ժամանցային համադրություն։ Երկրորդը այն է, որ երկիրը ունի ինտելեկտուալ ռեսուրս նման միջոցառում կազմակերպելու, որովհետև այսպիսի միջոցառումների ընթացքում չկա որևէ բիզնես կոմպոնենտ, որը չներառվի այս գործընթացում՝ սկսած բանակցային հմտություններից մինչև յուրաքանչյուր սանտիմետրի վերահսկողությունը։ Երրորդ՝ սա նաև խոսում է նրա մասին, որ մենք անվտանգ երկիր ենք, քանի որ այդ կարգի աստղերի համար անվտանգությունը թոփ առաջնահերթություններից մեկն է; Ջենիֆեր Լոպեսը, եթե չեմ սխալվում, 98 հոգանոց թիմով էր ժամանել, իրենց պետք է ապացուցել, որ դու ոչ միայն արտաքին գործոններով ես անվտանգ, այլև՝ ներքին։ Ներքինը շատ ավելի հեշտ է, ինչ վերաբերում է արտաքինին, հարց է առաջանում՝ այդ քանի տարի պետք է անցնի առանց պատերազմի, որ մենք սկսենք մեզ ներկայացնել անվտանգ նաև այդ տեսանկյունից»։
Խոսելով համերգի կազմակերպման գործում պետության կողմից ռեսուրսների ծախսման և դրանից քաղված օգուտների մասին՝ Սիմոնյանը շեշտել է. «Եթե ես չհավատայի, որ էս երևույթն արդյունավետ է, ես ջանք չէի գործադրի։ Մենք հեծանիվ չենք հորինել՝ ամբողջ աշխարհում առավել արդյունավետ միջոց՝ այս քանակի զբոսաշրջիկներ ներգրավելու ավելի արագ, գոյություն չունի, քան նման միջոցառումներն են։ Մինչև երբ պետք է գնանք մեր հարևան Վրաստանում համերգներ վայելելու և «նախանձելու» նրանց, ինչու մենք ևս նրանց չհրավիրենք այս հարցում։ Նմանատիպ միջոցառումների հարցում անգամ տնտեսապես շատ ավելի հարուստ երկրներում պետությունը մեծ աջակցություն է ցուցաբերում, օրինակ՝ Աբու Դաբիում գրեթե չկա համերգ, որ պետությունը չունենա իր ներգրավվածությունը։ Նման համերգներ կազմակերպելու տեսանկյունից պետության աջակցությունը շատ կարևոր է մի քանի կոմպոնենտով։ Առաջին՝ պետք է ունենալ բավականին մեծ ստադիոն, որպեսզի կարողանաս ներգրավել 60-80 հազար մարդ մեկ համերգի ժամանակ, որպեսզի չունենալով շատ մեծ տոմսի արժեք՝ հնարավոր լինի կազմակերպել այդ համերգը, երկրորդ՝ պետք է ունենալ որոշ ծավալի մարդիկ, որոնք կլինեն վճարունակ և կկարողանան 100-200 եվրո միջին արժեքի տոմս գնել, երրորդ՝ պետք է ունենալ զարգացած շուկա՝ համերգի համար անհրաժեշտ սարքավորումները ներմուծելու համար»։
Անդրադառնալով մեծ ծախսերի մասին խոսակցություններին՝ Doping Space ընկերության տնօրենը նշել է. «Իրականում գումարը մեծ է, բայց ոչ թե մեծ ծախսն է վախենալու, այլ ցածր եկամուտը, եթե դու ունենաս միջոցառում, որի ծախսը կազմում է 1 միլիոն դոլար, որը քեզ որևէ բենեֆիտ չի տալիս, դա չի կարող նախընտրելի լինել նրանից, որ դու ունենաս միջոցառում, որը կարժենա մի քանի միլիոն դոլար ավել, բայց որի բենեֆիտը պետության համար մի քանի անգամ ավելին է։ Իրականում մենք չենք բերել Ջենիֆեր Լոպեսին, մենք նրան հրավիրել ենք, որպեսզի բերենք զբոսաշրջիկների, որպեսզի այս ամենը լինի արդարացված և առողջ։ Առաջին անգամ պատմության մեջ մենք Վրաստանի կողմից ունեցանք այն հերթը, որը կայանում էր այն ժամանակ, երբ Հայաստանից էին զբոսաշրջիկները նման միջոցառումների համար այցելում Վրաստան։ Հյուրանոցների, ռեստորանների տերերը այն մարդիկ են, որոնք միանգամից կարող են տեսնել այս էֆեկտը»։
Սիմոնյանն անդրադարձել է նաև ծախսված գումարների հետ կապված խոսակցություններին՝ մանրամասնելով. «Շատերը մանիպուլացնում են, թե այդ 6 մլն դոլարը տրվել է աստղին, իրականում այդ գումարի կառուցվածքը շատ կարևոր է։
6 միլիոն դոլարից միայն 1 միլիոն դոլարը ավելացված արժեքի հարկի տեսքով վերադարձվել է պետությանը, բացի սրանից՝ կան նաև այլ հարկային մուտքեր, օրինակ՝ աստղի հոնորարից 25 տոկոս մենք ունենք ոչ ռեզիդենտների շահութահարկ, այսինքն՝ եթե աստղի հոնորարը 2 մլն դոլար է, մոտ 500 հազար դոլարը վերադարձվել է պետբյուջե։ Այսինքն՝ ամբողջ գումարից մոտ 1.6-2 միլին դոլարը ավտոմատ փոխանցվել է պետբյուջե, մնացած գումարը պարունակում է աստղի հոնորարը և այլ կազմակերպչական ծախսերը։
Սիմոնյանը հավելել է. «Հայաստանի անունը նոր երանգներ սկսեց ընդունել այս ոլորտում, որովհետև նման միջոցառումները ենթագիտակցաբար խոսում են այդ թվում նրա մասին, որ այս երկիրը հետաքրքիր է աստղերի համար, որովհետև դրանք բացարձակապես այն աստղերը չեն, որ գալիս են բացառապես փողի համար, մինչև երկիրը չանցնի որոշակի վալիդացիա, նրանք չեն կարող քեզ վստահել իրենց իմիջը, որպեսզի հետո այդ գումարը «իրենց քթներից չգա», և չեն ունենա անդառնալի իմիջային կորուստ: Առանց պետության՝ այսպիսի միջոցառումները չեն կարող տեղի ունենալ, քանի որ պետությունը ամենամեծ օգուտ քաղողն է, եթե համեմատենք զբոսաշրջիկների թվերը անցած տարի այս շրջանի հետ, վստահ եմ՝ էական տարբերություն ենք տեսնելու»։
Անդրադառնալով Սնուփ Դոգի համերգի կազմակերպչական հարցերին՝ Doping Space ընկերության տնօրենը նշել է. «Քչերը գիտեն, որ մինչև Սնուփ Դոգի անունը արծարծվելը մենք ունեցել ենք բանակցություններ հենց Ջենիֆեր Լոպեսի թիմի հետ, որի արդյունքում մենք արդեն համերգի օր ունեինք 2023-ի սեպտեմների 8-ը, բայց որոշակի հանգամանքների արդյունքում Լոպեսի թիմը չեղարկում է ողջ տուրը, ինչից հետո մենք սկսում ենք նայել, թե էլ ով կա տուրի մեջ, և Սնուփ Դոգը այլընտրանքն էր։ Սնուփ Դոգի համերգի չեղարկման օրը մենք ունեցել ենք 10 700 գնված տոմս. եթե այդքան մարդ պատրաստ էր գալ համերգի, ինչպես է ստացվում, որ նա մարված աստղ է։ Իրականում աստղերի ընտրությունը պատահական չէ, դա արվում է հաշվարկի և հետազոտության արդյունքում։ Պլանը կազմել ենք մենք, այդ նախաձեռնությամբ դիմել ենք պետությանը, բայց պետությունը դրել է պայման, որ ներդրվող գումարի չափով ընկերությունը ունենա 100 տոկոս բանկային երաշխիք, որպեսզի պետական միջոցները չլինեն վտանգված, և մենք էդ խնդիրը կարողացանք լուծել։ Քչերը գիտեն, բայց այն գումարը, որը պետությունը տրամադրել է, ի սկզբանե վտանգված չի եղել և չէր կարող լինել»։
Սիմոնյանը մանրամասներ է ներկայացրել նաև Սնուփ Դոգի համերգի չեղարկումից. «2023-ի սեպտեմբերյան իրադարձությունների ժամանակ համերգի չեղարկման որոշումը կայացրել է պետությունը, բայց ես կարծում եմ, որ դա որքան էլ ցավալի, բայց ճիշտ որոշում էր։ Կար տարբերակ կա՛մ ծրագիրը փակելու, կա՛մ գտնում ենք միջոց համերգը ավելի ուշ անելու, բայց խնդիրն այն էր, որ Սնուփ Դոգը այլևս տուրի դուրս չէր գալիս, ինչը շատ ավելի դժվարացնում էր համերգի կազմակերպումը և ավելի թանկացնում այն։ Երբ համերգը չեղարկվում է մեր կողմից, պայմանագրում չկա որևէ կետ, ըստ որի՝ մյուս կողմը գումարի անգամ մեկ տոկոսը վերադարձնելու պարտավորություն ունի։ Ես անձամբ հանդիպել եմ նրան և նրա ընտանիքին, նշել, թե մեր ազգին ինչպիսի դժվար իրավիճակ է բաժին հասել, ինչից հետո նա հոնորարի ամբողջ գումարը վերադարձրել է. այսպիսի նախադեպ պարզապես չկա, երբ արտիստը գումարը վերադարձնի անգամ երեք ամիս առաջ չեղարկվելու դեպքում, էլ ուր մնաց՝ մի քանի օր առաջվա դեպքում։ Գումարի վերադարձը մեզ հնարավորություն տվեց շարունակելու նախագիծը և կազմակերպելու այս միջոցառումը։ Իրականում ինձ համար ավելի էական էր ոչ թե Ջենիֆեր Լոպեսի համերգը, այլ այն, որ մենք կարողացանք Սնուփ Դոգի համերգի չեղարկման էֆեկտը հաղթահարել, որովհետև այսպիսի դեպքերում շատ մեծ վտանգ կա առհասարակ հայտնվել սև ցուցակում և զրկվել նման միջոցառումների անցկացման հնարավորությունից»։
Սիմոնյանն ամփոել է. «Մենք պետք է «հայավարի» բառի ընկալումը ռեբրենդիգի ենթարկենք, որպեսզի այն սկսվի ասոցիացվել ոչ թե «գռդոն անելու», այլ պրոֆեսիոնալիզմի հետ»։
