ՀՀ վարչապետի որդի Աշոտ Փաշինյանը ֆեյսբուքյան գրառումներով անդրադարձել է Հայաստանում վերջին օրերի իրադարձություններին, մասնավորապես՝ հեղաշրջման փորձին։
«Սրա մասշտաբները իսկապես անհնար է պատկերացնել։ Ու ինձ ապշեցնում են էն բոլոր մարդիկ, քաղաքագետները, քաղաքական դերակատարները ովքեր «անկողմնակալ» արձագանք են տալիս սրան։ Մարդիկ մեր փողոցներում ուզում էին արյուն հոսի, ավելի շատ արյուն, քան որևէ մեկը երբևէ ուզել էր, ուզում էին այդ արյունը հոսի միակողմանի, իրենց ձեռքով, ու վերջ։ Նրանք քաղաքացիական պատերազմ անգամ չէին հրահրում, նրանք մասշտաբային մարդասպանության մի ալիք էին նախաձեռնում, աներևակայելի չափի ու ձևի։ Սրան իսկապես անհնար է անհամաչափ արձագանքել, էս էջը Հայաստանում պետք է փակվի, ու վերջ․ Իսկ էն ինչ արեց էսօր Լևոն Տեր-Պետրոսյանը ուղղակի անհնար էր ամենասյուռ երևակայությամբ անգամ ըմբռնել»։
Մեկ այլ գրառման մեջ Աշոտ Փաշինյանը նշել է․
«Անհնար է անհամաչափ արձագանք տալ նրան ինչ էսօր տեղի ունեցավ։ Հայաստանը երբեք չի տեսել նման մասշտաբի հանցագործություն, ու հավանական է, որ երբեք էլ չտեսնի։ Հիբրիդային պատերազմ փաստորեն ոչ միայն կա, այլ դրա նախաձեռնող կողմի մտքերի ընթացքը ահնարա ըմբռնել առողջ երևակայությամբ, անհնար է երևակայել որ մարդը, որևէ մարդ նման բանի մասին կարող էր ոչ միայն մտածել, այլ լրջորեն պլանավորել, պատրաստվել։ Սրիկաներ, Հայաստանում ժողովրդավարություն է լինելու միշտ, հանրությունը, պետությունը, բոլորը պետքա պատշաճ արձագանքեն սրան, իսկ թե ինչ քաղաքական բանավեճ տեղի կունենա այդ ժողովրդավարության պայմաններում, ձեր խնդիրը չի, էս մարդիկ Հայաստանի հանրային կյանքում պետք է չլինեն, չկա սրան որևէ այլ պատշաճ արձագանք։ Ամեն ինչ խաղաղ ու իրավական, բայց էս էջը Հայաստանում պետք է փակվի»։
Հիշեցնենք՝ քննիչի միջնորդության հիման վրա հսկող դատախազի կողմից որոշումներ են կայացվել 16 անձի նկատմամբ հանրային քրեական հետապնդում հարուցելու վերաբերյալ, որոնք բավարարվել են։ ՔԿ-ն 16 անձանց նկատմամբ կալանքը որպես խափանման միջոց կիրառելու վերաբերյալ միջնորդություն է ներկայացրել դատարան
«Լուրերը» ճշտել է այն անձանց անունները, որոնց նկատմամբ ՔԿ-ն ավելի վաղ միջնորդություն է ներկայացրել դատարան կալանքը որպես խափանման միջոց կիրառելու մասին:
ՔԿ-ն ավելի վաղ տեղեկացրել էր, որ հանցավոր խմբի ղեկավարների և մասնակիցների բնակարաններում խուզարկությամբ հայտնաբերվել են հանցագործության համար նախատեսված մեծաքանակ առարկաներ և իրեր, ձերբակալվել է 14 անձ, այդ թվում՝ Բագրատ արքեպիսկոպոս Գալստանյանը:
Ավելի վաղ վարչապետը գրել էր, որ իրավապահները կանխել են Հայաստանի Հանրապետությունը ապակայունացնելու և իշխանությունը բռնազավթելու «քրեաօլիգարխիակղերական» խոշոր ու եղկելի պլանը։ Վարչապետը հրապարակել էր Քննչական կոմիտեի
հաղորդագրությունը:
ՔԿ-ն, ի լրումն տարածված հաղորդագրության՝ ներկայացրել է «Սրբազան պայքար» անվանումը կրող շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքի առթիվ նախաձեռնված քրեական վարույթի շրջանակներում գաղտնի քննչական գործողությունների արդյունքում ձեռք բերված ձայնագրությունները։
