Սահմանադրության տեքստը մշակման փուլում է, առաջիկայում Սահմանադրական բարեփոխումների խորհրդի անդամների հետ կքննարկենք այն: Այս մասին ԱԺ-ում լրագրողների հետ զրույցում հայտնեց ՀՀ արդարադատության նախարար Սրբուհի Գալյանը:
«Տարբեր տարբերակներ ենք քննարկում, բայց դեռևս տեքստը մշակման փուլում է: Հայեցակարգը մեկն է, այդ հայեցակարգի շրջանակում, տարբեր նորմերի հետ կապված, կան տարբեր քննարկումներ: Երբ որոշակի լինի տեքստը, կկիսվենք ձեզ հետ»,- հայտնեց նախարարը:
Հարցին՝ ովքե՞ր են խորհրդի կազմում, Գալյանը պատասխանեց, որ նաև ընդդիմության ներկայացուցիչներն ունեն հստակ տեղեր, սակայն չեն մասնակցում քննարկումներին:
«Ես խնդրել եմ, որ իրենք ներկա լինեն այդ քննարկումներին: Խորհրդի կազմում կան նաև քաղաքացիական հասարակության ներկայացուցիչներ: Հիմա աշխատանքների իրականացման առաջնորդությունը ստանձնել է արդարադատության նախարարությունը, և, ըստ էության, մենք Սահմանադրության տեքստի մշակումն իրականացնում ենք մեր ներքին ռեսուրսի հաշվին»,- նշեց նա:
Լրագրողներից մեկի դիտարկմանը՝ հայեցակարգը որևէ կերպ օգտագործվելո՞ւ է, նախարարը հայտնեց՝ դրանում տեղ գտած դրույթներն իրենց արտացոլումը որոշակիորեն ստանալու են:
Ինչ վերաբերում է, թե երբ տեղի կունենա հանրաքվեն, նշեց՝ հստակ ժամկետներ չի կարող նշել:
«Ես միշտ նշում եմ, որ տեքստը 10 ամսվա ընթացքում պատրաստ կլինի: Չենք քննարկել ժամանակահատվածը, թե երբ է դրվելու դա հանրաքվեի: Երբ տեքստը պատրաստ լինի, մենք հայեցակարգային որոշ դրույթներ հանրության դատին կհանձնենք և շատ մանրամասն կքննարկենք, թե ինչի մասին է խոսքը: Այսինքն՝ կուլիսների հետևում պահելու որևէ առիթ և հնարավորություն չկա:
Երբ ինձ հարցեր են ուղղում՝ ինչո՞ւ չեք ասում, ինչո՞ւ չեք ասում, միշտ ասում եմ՝ ասելու ենք իհարկե, որովհետև վերջնարդյունքում ժողովուրդն է քվեարկելու կողմ կամ դեմ նոր Սահմանադրության ընդունմանը: Կասվի և բավարար ժամանակահատված կտրվի, որպեսզի ժողովուրդը կարողանա ձևավորել կարծիք:
Խոսքը նաև քաղաքացիական հասարակության ներկայացուցիչների մասին է և նաև՝ ընդհանուր բնակչության»,- պարզաբանեց արդարադատության նախարարը:
