Լոնդոնում ավարտվել է Ուկրաինայի հարցով եվրոպական գագաթնաժողովը, որը կազմակերպել էր Մեծ Բրիտանիայի վարչապետ Քիր Սթարմերը. գագաթնաժողովին մասնակցում էին եվրոպական երկրների և Կանադայի ղեկավարները: Մեծ Բրիտանիայի վարչապետ հայտարարել է, որ մասնակիցները համաձայնել են մշակել Ուկրաինայի խաղաղության ծրագիր, որը պետք է ներկայացվի ԱՄՆ-ին: Նրա խոսքով՝ դա կարևոր է, որպեսզի Վաշինգտոնը կարողանա անվտանգության երաշխիքներ առաջարկել՝ Ռուսաստանին զսպելու համար: Նրա խոսքով՝ առաջնորդները համաձայնել են, որ պետք է ավելի շատ ծախսեն պաշտպանության վրա, որպեսզի ցույց տան Թրամփին, որ Եվրոպական մայրցամաքը կարող է պաշտպանել իրեն: Վարչապետը նաև հայտնել է, որ «շատ շուտով» նորից կհանդիպեն՝ ծրագրի մանրամասները քննարկելու համար:
ԵՄ առաջնորդները խուսափել են մանրամասներ ներկայացնել իրենց ծրագրից: Գագաթնաժողովից առաջ Ֆրանսիայի նախագահ Էմանուել Մակրոնը նշել է, որ ծրագիրը ներառում է մեկամսյա հրադադար, որը կվերաբերի օդային և ծովային հարձակումներին, բայց ոչ ցամաքային մարտերին: Եվրոպական զորքերը կտեղակայվեն Ուկրաինայում կայուն խաղաղության համաձայնագրի հաստատումիից հետո:
Եվրահանձնաժողովի ղեկավար Ուրսուլա ֆոն դեր Լայենը գագաթնաժողովը որակել է «անկեղծ քննարկում»։ Նրա խոսքով՝ մասնակիցները քննարկել են Կիևի համար անվտանգության համապարփակ երաշխիքների անհրաժեշտությունը, այդ թվում՝ Ուկրաինայի դիրքերն ամրապնդելու, նրան պաշտպանական միջոցներ տրամադրելու հարցեր։
Ֆոն դեր Լայենը նշել է, որ պետք է ուժեղացնել նաև Եվրոպայի պաշտպանությունը: «Այժմ մեզ համար չափազանց կարևոր է մեծացնել ծախսերը. պետք է նախապատրաստվել վատագույնին»,- ասել է Ուրսուլա ֆոն դեր Լայենը:
Իտալիայի վարչապետ Ջորջիա Մելոնին էլ գագաթնաժողովից հետո շեշտել է ՆԱՏՕ-ի և Արևմուտքի միասնության անհրաժեշտությունը: Իտալիայի վարչապետի խոսքով՝ անհրաժեշտ է հասնել կայուն խաղաղության, ցանկացած փխրուն համաձայնագիր կարող է խախտվել:
Լեհաստանի վարչապետն ընդգծել է, որ եվրոպական երկրները համակարծիք են պաշտպանական ծախսերն ավելացնելու և Ուկրաինային օգնությունն ավելացնելու հարցում: Դոնալդ Տոսկը հավելել է, որ Լոնդոնի գագաթնաժողովի բոլոր մասնակիցները ցանկություն են հայտնել ամրապնդել Եվրոպա-ԱՄՆ հարաբերությունները: Նա հույս է հայտնել, որ մարտի 6-ին ԵՄ առաջնորդների հանդիպումը «հստակ ազդակ» կլինի, որ ոչ ոք չի ենթարկվի ռուսական շանտաժին և ագրեսիային:
Լոնդոնում տեղի ունեցած գագաթնաժողովից հետո լրագրողների հետ զրույցում Վոլոդիմիր Զելենսկին կարծիք է հայտնել, որ ԱՄՆ-ն չի դադարեցնի օգնությունը Կիևին, քանի որ Վաշինգտոնը դժվար թե ցանկանա օգնել Ռուսաստանի նախագահ Վլադիմիր Պուտինին։ Նա հավելել է, որ պատրաստ է ստորագրելու ԱՄՆ-ի հետ հազվագյուտ մետաղների համաձայնագիրը, և կարծում է, որ ԱՄՆ-ը նույնպես պատրաստ կլինի: Ուկրաինայի նախագահի խոսքով՝ Դոնալդ Թրամփի հետ հարաբերությունները կարող է փրկել, սակայն բանակցությունները պետք է շարունակվեն փակ դռների հետևում:
Լոնդոնում Կանադայի և եվրոպական մի շարք երկրների առաջնորդների հետ հանդիպումից հետո Ուկրաինայի նախագահ Վոլոդիմիր Զելենսկին հանդիպել է Մեծ Բրիտանիայի թագավոր Չառլզ Երրորդի հետ: Մեծ Բրիտանիայի թագավորը Զելենսկուն ընդունել է Սանդրինգհեմի թագավորական կալվածքում՝ Բրիտանական կառավարության խնդրանքով:
