ԱԺ պետական-իրավական ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ ԱԺ աշխատակազմի ղեկավար-գլխավոր քարտուղար Դավիթ Առաքելյանը ներկայացրել է ԱԺ 2023 թվականի բյուջեի կատարողականը:
Հաշվետու տարում Ազգային ժողովի հաստատված բյուջեն կազմել է 7,067,172,500 դրամ: Աշխատակազմի բնականոն գործունությունն ապահովելու նպատակով իրականացվել են միջհոդվածային վերաբաշխումներ:
2023 թվականին Կառավարության մի շարք որոշումներով ԱԺ-ին հատկացվել է 163,800,000 դրամ՝ չնախատեսված միջոցառումների ֆինանսավորման համար: Խորհրդարանը հաշվետու տարում հատկացումների հաշվին Կառավարության պահուստային ֆոնդ է վերաբաշխել շուրջ 29,000,000 դրամ՝ Կառավարության կողմից առաջնահերթ համարվող ծախսերի ֆինանսավորման համար:
Ազգային ժողովի ճշտված բյուջեն 8 միջոցառումների գծով կազմել է 7,205,057,300 դրամ, դրամարկղային ծախսը` 6,944,533,100 դրամ: Արդյունքում` բյուջեն կատարվել է 96,4 տոկոսով եւ ճշտված բյուջեի ու դրամարկղային ծախսի միջև շեղումը կազմել է 260,524,200 դրամ, որը եւս փոխանցվել է պետական բյուջե:
2022 թվականի համեմատ 2023 թվականի դրամարկղային ծախսն ավելացել է 911,671,400 դրամով (15 տոկոս)՝ պայմանավորված 2023 թվականին պետական պաշտոն և պետական ծառայության պաշտոն զբաղեցնող անձանց բազային աշխատավարձի չափի փոփոխմամբ, ինչպես նաև ԱԺ շենքային պայմանների բարելավում միջոցառման շրջանակում իրականացված ծախսերով:
Դավիթ Առաքելյանը մանրամասնել է օրենսդիր մարմնի կողմից իրականացված միջոցառումները:
«ՀՀ ԱԺ գործունեության ապահովում, օրենսդրական, վերլուծական և ներկայացուցչական ծառայություններ» միջոցառման ճշտված բյուջեն կազմել է 6,239,917,000 դրամ, դրամարկղային ծախսը՝ 6,050,863,400 դրամ, բյուջեն կատարվել է 97 տոկոսով: Ծախսերի կրճատման և արդյունավետ կատարման արդյունքում բյուջետային ծախսերի տնտեսագիտական դասակարգման մի շարք հոդվածներով տնտեսվել է 189 մլն դրամ:
Նախորդող տարվա համեմատ 2023 թվականի դրամարկղային ծախսն ավելացել է 795,089,600 դրամով, որը պայմանավորված է պետական պաշտոն և պետական ծառայության պաշտոն զբաղեցնող անձանց բազային աշխատավարձի չափով, ինչպես նաև ներկայացուցչական ծախսերի, մասնավորապես՝ ԵԱՀԿ ԽՎ աշնանային նստաշրջանի անցկացմամբ:
«ՀՀ Ազգային ժողովի աշխատակազմի պետական ծառայողների վերապատրաստում» միջոցառման գծով ճշտված բյուջեն կազմել է 1,292,900 դրամ, դրամարկղային ծախսը՝ 500,000 դրամ: Վերապատրաստվել է 36 պետական ծառայող: Բյուջեն կատարվել է 39 տոկոսով:
«ՀՀ Ազգային ժողովի դերի բարձրացմանն ուղղված միջոցառումների իրականացում» միջոցառման համար նախատեսվել է 60,015,000 դրամ, դրամարկղային ծախսը կազմել է 54,238,900 դրամ, բյուջեն կատարվել է 90 տոկոսով: Միջոցառումների իրականացման արդյունքում տնտեսվել է 5,776,100 դրամ:
Այս համատեքստում ԱԺ աշխատակազմի ղեկավարը հիշատակել է կազմակերպված միջոցառումները, որոնց շարքում են Երեխաների պաշտպանության օրվան նվիրված միջոցառումը, ավանդույթ դարձած ամառային դպրոցին Երևանից և մարզերից մասնակցել է 55 աշակերտ: Ներդրվել են կարծիքների հավաքագրման ու քաղաքացիների էլեկտրոնային եղանակով հերթագրման համակարգեր:
Վերը նշված միջոցառումների արդյունքում հանրության շրջանում ՀՀ ԱԺ-ի՝ որպես պետական կառույցի իրազեկման աստիճանն աճել է՝ նախկին 36 տոկոսի փոխարեն կազմելով 58 տոկոս:
«Միջազգային խորհրդարանական կազմակերպություններին ՀՀ անդամակցության վճարների» գծով ճշտված բյուջեն կազմել է 144,825,500 դրամ, դրամարկղային ծախսը՝ 128,101,100 դրամ, բյուջեն կատարվել է 88 տոկոսով, շեղումը պայմանավորված է տարադրամի կուրսի փոփոխմամբ:
«Աջակցություն կուսակցություններին և կուսակցությունների դաշինքներին» միջոցառման ճշտված բյուջեն կազմել է 520,733,700 դրամ, դրամարկղային ծախսը՝ 520,732,500 դրամ, բյուջեն կատարվել է 100 տոկոսով:
«ՀՀ ԱԺ տեխնիկական հագեցվածության բարելավում» միջոցառմամբ վարչական սարքավորումների ձեռքբերման համար նախատեսվել էր 127,375,000 դրամ: Մրցութային ընթացակարգերով պայմանավորված՝ տնտեսվել է 17,212,600 դրամ:
«ՀՀ ԱԺ շենքային պայմանների բարելավում» միջոցառման շրջանակում նախատեսվել է 107,813,400 դրամ: Նշված միջոցառման դրամարկղային ծախսը կազմել 76,850,000 դրամ կամ բյուջեն կատարվել է 71 տոկոսով՝ պայմանավորված գնման գործընթացների տնտեսումներով: Միջոցառման շրջանակում ԱԺ աշխատակազմի կողմից իրականացվել է հիմնական մասնաշենքի 4 վերելակների կապիտալ վերանորոգում, շենքերի անվտանգության տեսահամակարգի արդիականացում և փոխարինում նորերով, շենքերի հակահրդեհային համակարգի արդիականացում, նոր մասնաշենքի 4 հանձնաժողովների նիստերի սրահների վերանորոգում:
Դավիթ Առաքելյանն ընդգծել է, որ շարունակվում և խորանում է համագործակցությունը միջազգային գործընկերների հետ: Այս տարի ՄԱԶԾ-ի հետ ստորագրվել է համագործակցության հերթական հուշագիրը՝ 3 տարի տևողությամբ: Նրա խոսքով առաջին անգամ խորհրդարանը՝ որպես պետական մարմին, ներդրում է ունենալու այս ծրագրում:
Ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը գոհունակությամբ է ընդգծել այն փաստը, որ զգալի բարեփոխումներ են իրականացվել խորհրդարանում: Այս առումով նա ընդգծել է թե՛ նիստերի դահլիճների տեխնիկական վերազինման, թե՛ միջազգային գործընկերների համագործակցության արդյունքում ԱԺ աշխատակազմի կարողությունների զարգացման կարևորությունը:
Պատգամավորները հարցուպատասխանի ձևաչափում անդրադարձել են իրականացվող աշխատանքների որակի ապահովմանը, ԱԺ դերի բարձրացմանն ուղղված հարցումներին, ԱԺ աշխատակազմի մասնագիտական հմտությունների ու կարողությունների հզորացմանն ուղղված միջոցառումներին: Կարևորվել են ԱԺ աշխատակազմում աշխատանքն առավել գրավիչ դարձնելուն ուղղված քայլերը:
