Կարեն Դեմիրճյանի անվան մարզահամերգային համալիրում հանդիսավոր արարողությամբ տրվել է Սամբոյի 2023 թվականի մեծահասակների աշխարհի առաջնության պաշտոնական մեկնարկը:
Ինչպես հայտնում են ՀՀ ԿԳՄՍՆ-ից, միջոցառմանը ներկա են եղել ԿԳՄՍ նախարար Ժաննա Անդրեասյանը, Երևանի քաղաքապետ Տիգրան Ավինյանը, Հայաստանի ազգային օլիմպիական կոմիտեի նախագահ Գագիկ Ծառուկյանը, նախարարի տեղակալ Կարեն Գիլոյանը, սամբոյի Հայաստանի և միջազգային ֆեդերացիաների ղեկավարները:
ԿԳՄՍ նախարար Ժաննա Անդրեասյանը ողջունել է աշխարհի առաջնության մասնակիցներին, միջազգային ֆեդերացիայի ներկայացուցիչներին և Հայաստան ժամանած հյուրերին: Ժաննա Անդրեասյանը հաջող մրցելույթներ և ազնիվ պայքար է մաղթել առաջնության մասնակիցներին. «Կրկին հանդիպում ենք Կ. Դեմիրճյանի անվան մարզահամերգային համալիրում. դա նշանակում է, որ Հայաստանի մայրաքաղաքը ընդունել է մարզաշխարհի ներկայացուցիչներին: Ընդամենը վերջին երկու տարում այս մարզահամալիրում անցկացվել են բռնցքամարտի և ծանրամարտի Եվրոպայի առաջնությունները, ֆուտզալի և բասկետբոլի միջազգային մրցաշարեր, սամբոյի դեռահասների, պատանիների և երիտասարդների աշխարհի առաջնությունները:
Հիմա անզեն ինքնապաշտպանության՝ սամբոյի աշխարհի ուժեղագույնների հերթն է. մեկնարկում է մեծահասակների աշխարհի առաջնությունը: Մարզաձևի հիմքում նաև հայկական կոխ ըմբշամարտն է, հետևաբար Հայաստանում այն ամենասիրվածներից է»,- ասել է ԿԳՄՍ նախարարն ու հիշատակել մարզաձևի հայ նվիրյալներին՝ աշխարհի հնգակի չեմպիոն Գագիկ Ղազարյանին, աշխարհի քառակի չեմպիոն Գորիկ Մանուկյանին և մեր մյուս մրցանակակիրներին:
«Հայաստանի պատվիրակներն այսօր էլ պատրաստ են ազնիվ մրցակցության մեջ մտնել աշխարհի ավելի քան 70 երկրներից ժամանած տղամարդկանց մարզական ու մարտական սամբոյի, կանանց մարզական սամբոյի ներկայացուցիչների հետ՝ բաղձալի մեդալների համար: Սիրելի՛ հյուրեր, բարով եք եկել մշակույթի ու արվեստի, գիտության ու սպորտի երկիր՝ Հայաստան: Հուսով եմ՝ կհասցնեք լինել նաև երկրի տեսարժան վայրերում ու սիրել Հայաստանը՝ որպես հյուրընկալ երկիր: Ցանկությունս է, որ մեր երկրից հեռանալիս կրկին վերադառնալու ցանկություն ունենաք»,- եզրափակել է ԿԳՄՍ նախարարը:
Բացման արարողության ժամանակ պարային ու ակրոբատիկ շոու-ծրագրով ներկայացվել են սամբո մարզաձևի ավանդույթները, հայկական սամբոյի պատմությունը, որին հաջորդել է մասնակից ավելի քան 70 երկրների դրոշների շքերթը, այնուհետև Հայաստանի սամբոյի ֆեդերացիայի նախագահ Միքայել Հայրապետյանը «Խաղաղության մեդալով» է պարգևատրել Միջազգային ֆեդերացիայի նախագահ Վասիլի Շեստակովին: Ի դեպ, «Խաղաղության մեդալը» պատրաստել է աշխարհի չեմպիոն Սերգո Չախոյանը:
Սամբոյի միջազգային ֆեդերացիայի (FIAS) նախագահ Վասիլի Շեստակովը FIAS-ի անունից ողջունել է տարվա գլխավոր մարզական միջոցառման մասնակիցներին և հյուրերին: Միջազգային ֆեդերացիայի նախագահի խոսքով՝ այս տարի սամբո մարզաձևը տոնում է իր 85-ամյակը, և այդ առիթով Հայաստան են ժամանել անվանի սամբիստներ աշխարհի տարբեր անկյուններից:
«Դուք ներկա եք իսկական մարզական տոնի այս հրաշալի մարզահամալիրում: Շնորհակալություն եմ հայտնում Հայաստանի կառավարությանը, ԿԳՄՍ նախարարությանը և Հայաստանի ազգային օլիմպիական կմիտեին, Հայաստանի սամբոյի ֆեդերացիային՝ աշխարհի առաջնությունն ամենաբարձր մակարդակով կազմակերպելու համար»,- նշել է Շեստակովը:
Հայաստանի սամբոյի ֆեդերացիայի նախագահ Միքայել Հայրապետյանը ևս ընդգծել է մեր երկրում առաջին անգամ անցկացվող մեծահասակների աշխարհի առաջնության կարևորությունը:
Նշենք, որ սամբոյի աշխարհի առաջնությանն ավելի քան 70 երկրի 650 մարզիկներ են մասնակցում:
![Հնարավոր է սա 2 մարդ, նորությունների բաժին, ամբիոն and տեքստ նկարն է](https://scontent.fevn6-6.fna.fbcdn.net/v/t39.30808-6/400183801_720384583444537_1173103721367786371_n.jpg?_nc_cat=100&ccb=1-7&_nc_sid=5f2048&_nc_ohc=iy7XlbIMZAgAX9GY9NN&_nc_ht=scontent.fevn6-6.fna&oh=00_AfB4aOnhxY5UgcNpG9ZbBDQO7ADz3bO-aQPu_rENryOExg&oe=6553AC99)
![Հնարավոր է սա 4 people նկարն է](https://scontent.fevn6-2.fna.fbcdn.net/v/t39.30808-6/400739653_720384360111226_6405680904184956857_n.jpg?_nc_cat=109&ccb=1-7&_nc_sid=5f2048&_nc_ohc=QZ5ycAldV9oAX_0r0-o&_nc_ht=scontent.fevn6-2.fna&oh=00_AfDqRKukU7Sm00ZMEaLPKZnEM4EfUyVS9-lD8Mil8gxl5g&oe=655233BF)
![Հնարավոր է սա 3 people նկարն է](https://scontent.fevn6-1.fna.fbcdn.net/v/t39.30808-6/400143307_720384436777885_5011090945039962436_n.jpg?_nc_cat=110&ccb=1-7&_nc_sid=5f2048&_nc_ohc=S0Ddwmkx4jEAX8GC1xY&_nc_ht=scontent.fevn6-1.fna&oh=00_AfDxk_CN8JUe67OKGD49EP8j1JuH5rIZCACAGRo8vWSWSw&oe=65535185)
![Հնարավոր է սա 10 մարդ and պարող մարդիկ նկարն է](https://scontent.fevn6-2.fna.fbcdn.net/v/t39.30808-6/400774662_720384510111211_2139750337174048010_n.jpg?_nc_cat=102&ccb=1-7&_nc_sid=5f2048&_nc_ohc=8w2X97XhUxAAX8eVxHc&_nc_ht=scontent.fevn6-2.fna&oh=00_AfAElWYaDDma-5rfcyLflQ0V35NOC8RzS_NI-V2e6dtKhA&oe=6552472F)
![Հնարավոր է սա 1 անձ, նորությունների բաժին and տեքստ նկարն է](https://scontent.fevn6-3.fna.fbcdn.net/v/t39.30808-6/400729160_720384423444553_6487718620862227778_n.jpg?_nc_cat=106&ccb=1-7&_nc_sid=5f2048&_nc_ohc=VNZbnVeBNnsAX9er0Za&_nc_ht=scontent.fevn6-3.fna&oh=00_AfCtAxWbhERsIOqzDzeEdGgv6RvarziFSBF-4w-oaR5fig&oe=65529E93)
![Հնարավոր է սա 3 մարդ and պարող մարդիկ նկարն է](https://scontent.fevn6-2.fna.fbcdn.net/v/t39.30808-6/400834328_720384600111202_4152528293015802611_n.jpg?_nc_cat=109&ccb=1-7&_nc_sid=5f2048&_nc_ohc=mYrNH_LeidMAX8Gvdw3&_nc_ht=scontent.fevn6-2.fna&oh=00_AfA4ul41iwM-blRoBrDDA74hEeQt04wfV9-TozooLc6rCQ&oe=65533C7E)