Հայաստանի ամենափոքր մարզում 2022-ին ստեղծվել է 49,5 հա ինտենսիվ այգի, պետական օժանդակության ծրագրի շրջանակում Վայոց ձորում աշնանացան ցորենի ցանքատարածությունը կազմել է 339 հա, լիզինգային ծրագրով ձեռք է բերվել 18 միավոր գյուղտեխնիկա, տրամադրվել է 1.1 մլրդ դրամ վարկ: Նույն լիզինգային ծրագրի շրջանակում մարզում ձեռք են բերվել ագրոպարենային սարքավորումներ՝ ծախսելով 201 մլն դրամ: Վարչապետին զեկուցվել է, որ 2022 թվականի ընթացքում մարզում «խելացի» անասնագոմի 3 մանասնաշենք է կառուցվել, գործող 6-ին ընթացիկ տարում կավելանա ևս 5-ը:
Վարչապետին զեկուցվել է 2018-2022թթ. մարզում իրականացված սուբվենցիոն ծրագրերի մասին, որոնք 105-ն են՝ 4 մլրդ 863 մլն դրամ ընդհանուր արժեքով: Մոտ 2.8 մլրդ դրամը հատկացվել է պետական բյուջեից, ավելի քան 2 մլրդ-ը՝ համայնքների միջոցներից: Այս միջոցները ծախսվել են ասֆալտապատման, լուսավորության, ոռոգման համակարգի անցկացման, բակերի բարեկարգման, մանկապարտեզի նորոգման համար: Տեղեկացվել է, որ 2018 թվականից մինչև օրս Վայոց ձորի մարզում հիմնանորոգվել կամ կառուցվել է ընդհանուր 165 կմ ճանապարհ:
Գետափ համայնքում սուբվենցիոն ծրագրերի շրջանակում վերակառուցվել է միջհամայնքային ավտոճանապարհը, տեղի դպրոցի դիմաց կառուցվում է նաև բնակչության համար կարևոր նշանակություն ունեցող վերգետնյա անցում:
Մարզի 17 մանկապարտեզից ամբողջ տարին գործում է 13-ը, ջեռուցման խնդիր ունի 4-ը, մասնակի նորոգման և կահավորման կարիք՝ 9-ը, հիմնանորոգման կարիք ունի 1-ը: Արենի համայնքում կառուցվում է 1 մանկապարտեզ, 2023թ. նախատեսվում է կառուցել երկու մանկապարտեզ Եղեգիս և Արենի համայնքներում:
Ընթացքի մեջ են Եղեգնաձորի թիվ 1 հիմնական դպրոցի, Չիվա, Եղեգիս, Գոմք բնակավայրերի նոր մոդուլային դպրոցների շինարարական աշխատանքները, Գետափի միջնակարգ դպրոցը նախագծման փուլում է, մասնակի կարգավորվել են 9 դպրոցների առաջնահերթ լուծում պահանջող հիմնախնդիրները:
Նիկոլ Փաշինյանը ծանոթացել է նոր դպրոցի շինարարական աշխատանքներին, զրուցել դեռևս հին դպրոց հաճախող աշակերտների հետ:
Նիկոլ Փաշինյանին տեղեկացվել է, որ կամավոր ատեստավորում է անցել դեռևս 16 մանկավարժ, որոնց ամսական աշխատավարձը կրկնապատկվել է` դառնալով 250-300 հազար դրամ: Վարչապետը հանձնարարել է աշխատանքներ տանել, որ ուսուցիչներն ավելի ակտիվ դիմեն ատեստավորման: Երկրի ղեկավարին ներկայացվել են նաև մարզի առողջապահական ծրագրերը: Վարչապետը նաև տեղում ծանոթացել է Եղեգնաձորի հիվանդանոցի շինաշխատանքների ընթացքին:
Մարզի բժշկական հաստատությունների համար ձեռք են բերվել նոր սարքավորումներ և շտապ բուժօգնության երկու մեքենա: Բնակիչները համակարգչային շերտագրման համար այլևս մայրաքաղաք գալու կարիք չեն ունենա, քանի որ Եղեգնաձորի բժշկական կենտրոնը նորոգվել է, ձեռք է բերվել համապատասխան սարքավորում:
Պատասխանատուները տեղեկացրել են, որ արդյունաբերության ոլորտում 2021 թ. համեմատ 2022-ին գրանցվել է 10,3 տոկոս աճ, գյուղատնտեսության ոլորտում՝ 9,1 տոկոս աճ, շինարարության ոլորտում՝ 36,3 տոկոս աճ, ծառայությունների ոլորտում՝ 35,1, առևտրի ոլորտում եղել է 1,1 տոկոս նվազում: Նախորդ տարվա ընթացքում մարզ է այցելել 175 հազար զբոսաշրջիկ, որը 2021 թվականի համեմատ ավելի է 17 հազարով:
Անդրադարձ է կատարվել նաև Վայոց ձորում ժամանակակից մարզական համալիրի կառուցման հնարավորությանը, զբոսաշրջության տարբեր ճյուղերի զարգացման հեռանկարներին: Հաշվետու ժամանակահատվածում մարզի համայնքների սեփական եկամուտները նախատեսված են եղել 1 մլրդ 191 մլն դրամ, սակայն հավաքագրվել է 1 մլրդ 101 մլն դրամ սեփական եկամուտ: Կատարողականը կազմել է 92 տոկոսից ավելի:
Մարզի 15 հազար 900 հեկտար վարելահողի միայն 60 տոկոսն է մշակվում: Աշխատում են այդ ցուցանիշը բարձրացնելու ուղղությամբ: Վարչապետ Փաշինյանը հանձնարարել է խրախուսել ինտենսիվ գյուղատնտեսական ծրագրերը, որոնք էապես բարձրացնում են արդյունավետությունը: Միաժամանակ, ընդգծվել է մարզում առկա մշակվող հողատարածքների ծավալների մեծացման, սպանդանոցների գործունեության խթանման, սուբվենցիոն և այլ ծրագրերի միջոցով ճանապարհաշինության ընդլայնման կարևորությունը:
Հեղինակ` Անի Օհանյան
