Շրջակա միջավայրի նախարար Հակոբ Սիմիդյանն այսօր ընդունել է Մեծ Բրիտանիայի՝ որպես Կլիմայի փոփոխության մասին կոնվենցիայի կողմերի 26-րդ կոնֆերանսի նախագահող երկրի, տարածաշրջանային դեսպան Դեյվիդ Մորանին և Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության դեսպան Ջոն Գալագերին: Այդ մասին հայտնում են ՇՄ նախարարությունից:
Հանդիպմանը մասնակցել է նախարարի տեղակալ Արամ Մեյմարյանը։
Ողջունելով գործընկերներին շրջակա միջավայրի նախարարությունում՝ նախարարը նախ շնորհավորել է հայ-բրիտանական դիվանագիտական հարաբերությունների հոբելյանական 30-ամյակի կապակցությամբ։
Նախարարը շնորհակալություն է հայտնել պարոն Մորանին իր կատարած կարևոր աշխատանքի համար որպես կլիմայի փոփոխության համաժողովի՝ COP26-ի հարցերով տարածաշրջանային դեսպան։
Նախարարն անդրադարձել է ՄԱԿ-ի Կլիմայի փոփոխության մասին շրջանակային կոնվենցիայի շրջանակներում 2021 թվականի նոյեմբերին Գլազգոյում կայացած կողմերի 26-րդ համաժողովի (որին նաև մասնակցել է հայկական պատվիրակությունը՝ շրջակա միջավայրի նախարարի տեղակալի գլխավորությամբ) շրջանակներում ՀՀ-Մեծ Բրիտանիա համագործակցությանը և շնորհակալություն հայտնել Մեծ Բրիտանիային՝ համաժողովի կազմակերպման և հյուրընկալման համար։
Նախարարը տեղեկացրել է, որ այժմ ակտիվ նախապատրաստական աշխատանքներ են ընթանում COP27-ին մասնակցության համար, և պատրաստակամություն է հայտնել գործընթացներին ակտիվորեն ներգրավվելու։
Անցնելով հանդիպման օրակարգային հարցերին՝ նախարարը գործընկերներին է ներկայացրել կլիմայական օրակարգում ՀՀ Կառավարության ընթացիկ աշխատանքները։
«Կլիմայական ոլորտում ստանձնած պարտավորությունները կյանքի կոչելու համար ՀՀ Կառավարությունն ունի բավականին հավակնոտ օրակարգ։
Մեր Կառավարությունն իր բոլոր ջանքերը ներդնում է կլիմայի փոփոխության նկատմամբ հարմարվողականության կարողությունները բարձրացնելու, օրենսդրական բարեփոխումներ իրականացնելու և կառավարման արդյունավետությունը բարձրացնելու ուղղությամբ»,- նշել է նախարարը և հավելել, որ այդ համատեքստում չափազանց կարևոր են միջազգային գործընկերների դերն ու շարունակական աջակցությունը։
Նախարարը տեղեկացրել է, որ Հայաստանն այսօր ջանքեր է գործադրում ցածր ածխածնային զարգացման, վերականգնվող էներգետիկայի մասնաբաժնի ավելացման, էներգախնայողության, էլեկտրական շարժունակությանն անցման խթանման, անտառածածկ տարածքների պահպանման և ընդլայնման ուղղությամբ։
Նախարարն ընդգծել է, որ կլիմայի փոփոխության հետևանքների նկատմամբ հարմարվողականության և մեղմման գործողությունների իրականացումը ՀՀ Կառավարության 2021-2026 թվականների միջոցառումների ծրագրով նախանշված է որպես առաջնահերթություն, և խոսել է ՄԱԿ-ի Կլիմայի փոփոխության մասին շրջանակային կոնվենցիայի և Փարիզյան համաձայնագրի պահանջների և դրույթների կատարման միջգերատեսչական համակարգման խորհրդի ստեղծման կարևորությունից՝ նշելով, որ 2021 թվականին խորհրդի կազմի փոփոխությամբ (ներկայումս ղեկավարվում է փոխվարչապետի կողմից) արձանագրվել է կլիմայական օրակարգին վերաբերելի որոշումների քաղաքական ղեկավարման մակարդակի բարձրացում և խորհրդի իրավասության շրջանակի ընդլայնում։
Պարոն Մորանն իր հերթին նշել է, որ Հայաստանն այն եզակի երկրներից է, որտեղ այդաստիճան բարձր մակարդակի խորհուրդ է ձևավորվել կլիմայական հիմնախնդիրների լուծման նպատակով։
Կողմերը քննարկել են համատեղ հետաքրքրություն ներկայացնող մի շարք հարցեր։
Հանդիպման ավարտին նախարար Հակոբ Սիմիդյանը ևս մեկ անգամ պատրաստակամություն է հայտնել անել հնարավորը՝ կլիմայական ծրագրերի համար ներդրումների ներգրավման հնարավորությունների ընդլայնման և ամբողջ կառավարությանը գործընթացներին ներգրավելու համար։
