Փոքրիկ Լուսինեն Ռոմանի ու Անահիտի կենսաբանական դուստրը չէ, բայց դա ո՛չ նա է զգում, ո՛չ էլ՝ խնամող ծնողները: Աղաջանյանների տունը սիրո, հոգատարության ու ջերմության պակաս չունի:
Անահիտ Պետրոսյան (խնամատար մայր) - 23 տարի ամուսնացած ենք եղել, երեխաներ չենք ունեցել, ծրագրի շնորհիվ ունեցանք երեխաներ, 3 երեխաներ, որոնք հարազատ քույր ու եղբայր են:
Միանգամից երեք փոքրիկի ծնող դառնալ օգնեց խնամատարության ծրագիրը: Ծրագրի շահառու դառնալ որոշել էին վաղուց, ստացվեց 2018-ին:
Անահիտ Պետրոսյան - Հուլիսի 10-ին լրանալու է մեր ընտանիքի 4 տարին: 2018-ի հուլիսի 10-ին առաջին անգամ երեխաները եկել են մեր տուն, Արթուրս եղել է 9 տարեկան, Ավետը՝ 8, Լուսինեն՝ 6 ու քանի ամսական:
4 տարի է՝ կյանքն այլ գույներ ունի ընտանիքի բոլոր անդամների համար: Աշխատանքի և սոցիալական հարցերի նախարարության պահանջած բոլոր փուլերով անցել են: Պետությունն էլ վստահել է նրանց երեխաների խնամքը:
Անահիտ Պետրոսյան - Մենք տնայց ենք ունեցել, Երևանից եկել են, ստուգել տան պայմանները, արդյոք ունա՞կ ենք երեխա վերցնել պահելու: Ստուգել են մեզ, ընդգրկել սեմինարներում, որը շատ մեծ արդյունք է տվել: Մենք կենսաբանական երեխաներ չունենք, սեփական փորձ չունենք, դրա համար սեմինարներից շատ բան ենք սովորել:
Երեխաները՝ նրանց, նրանք էլ՝ փոքրիկներին ընդունել են միանգամից, 4 տարի է՝ լրացնում են իրար, մեկը մյուսին փոխանցում այն, ինչի պակասն ու կարիքն ունեն:
Անահիտ Պետրոսյան - Երևի սերը, համբերությունը, որ ես սկզբից տվել եմ իրանց՝ սխալները բացատրելով: Երևի իրանք դա զգացել են: Հնարավոր չի երեխան չզգա այն սերը, որ տալիս է ծնողը:
Երեխաների խնամքի մասով խնդիրներ չեն ունենում, պետությունն աջակցում է՝ հատկացնելով դրամական միջոցներ: Նախ՝ երեխայի խնամքի համար, հետո նաև՝ խնամակալների, որը կարող է դիտվել որպես աշխատավարձ:
Անահիտ Հովհաննիսյան (ՀՀ ԱՍՀՆ երեխաների հիմնահարցերի բաժնի պետ) - Շուրջ 130 հազար դրամին գումարվում է 30 տոկոս հավելավճար, եթե խոսքը գնում է մասնագիտացված խնամատարության մասին:
Խնամատարությունը կյանքի դժվարին իրավիճակում հայտնված երեխաների ընտանեկան միջավայրում խնամք ստանալու նախընտրելի եղանակներից է: Մեր երկրում խնամատար ընտանիքների թիվը կտրուկ աճեց 2019-ից հետո, երբ փակվեցին բոլոր գիշերօթիկները: Այս պահին 93 երեխա խնամք ու դաստիարակություն է ստանում 63 խնամատար ընտանիքում:
Անահիտ Հովհաննիսյան - 93-ը ցավոք այն թիվը չէ, որով կարող ենք խոսել խնամատար երեխաների մասին: Այն երեխաներն են, որոնց համադրման արդյունքում հնարավոր է եղել խնամատարությունը կազմակերպել: Զուգահեռ նշեմ, որ շուրջօրյա խնամքի հաստատությունում ունենք խնամք ստացող երեխաներ, ովքեր պոտենցիալ խնամատարության ենթակա երեխաներ են՝ շուրջ 585:
Կա նաև մասնագիտացված խնամատար 6 ընտանիք, որտեղ դաստիարակություն է ստանում հաշմանդամություն կամ առողջական խնդիրներ ունեցող 8 երեխա:
Անահիտ Հովհաննիսյան - Կարիքը կա թիվը մեծացնելու, որովհետև կան բազմաթիվ երեխաներ, ովքեր սպասում են ընտանեկան միջավայրում խնամք և դաստիարակություն ստանալու իրենց հերթին:
Ընտանիքում ապրելը երեխայի հիմնարար իրավունքներից է: Հենց սրանով է առաջնորդվում աշխատանքի և սոցիալական հարցերի նախարարությունը՝ նպաստելով, որ կյանքի դժվարին իրավիճակներում հայտնված երեխաները միշտ զգան ընտանիք ունենալու ուժն ու առավելությունները: