Հայաստանն ու Արցախը խորհրդանշող պատկերներով այս NFT-ն Դուբայի համաշխարհային ցուցահանդեսում դարձել է մշակութային Օսկարի հաղթող: Չիկո-Ռոկո նախագծի շրջանակում այն ստեղծել է Էմմա Պոգիկյանը:
Էմմա Պոգիկյան (The Art Oscars-ի հաղթող) - Կարևոր է նախ այն, որ շատերն իմացան Հայաստանի մշակույթի մասին, ամբողջ աշխարհով տարածվեցին ու սիրվեցին մեր զարդագրերը, թռչնագիրը, իսկ ինձ համար կարևոր է այն, որ Դեդո-Բաբոն, ընդհանրապես Արցախը, պատմության մեջ դարձավ Հայաստանի մի մասնիկը: Իմ նպատակն ի սկզբանե եղել է դա:
NFT-ի ոլորտում սա մասնագիտությամբ մարկետոլոգի առաջին աշխատանքն է: Նորարարական արվեստի և բարձր տեխնոլոգիաների համակցությամբ ստեղծված և վերջերս մեծ ճանաչում ստացած այս ուղղությունը Էմման սկսել է ուսումնասիրել 2 տարի առաջ՝ կորոնավիրուսով պայմանավորված լոքդաունի ընթացքում:
Էմմա Պոգիկյան - Ընդհանրապես չէի սպասում, որ հնարավոր է հասնել այս արդյունքին:
Մշակութային օսկարի մրցանակաբաշխությանը ներկայացված է եղել 192 երկրի 300 մասնակից: Հաղթողը որոշվել է օնլայն քվեարկությամբ:
Էմմա Պոգիկյան - Ինձ առավոտյան՝ ամսի 27-ին հայտնեցին, որ հաղթել եմ քվեարկության արդյունքում, առաջին տեղն եմ զբաղեցրել, արդեն երեկոյան պաշտոնապես հայտարարեցին հաղթողին, ներկայացրին իմ անունով ստեղծված NFT-ին՝ օսկարիկը:
Հայկական խորհրդանիշներով NFT-ն վաճառքի կհանվի մայիսին: Այն հնարավոր կլինի ձեռք բերել համաշխարհային ամենախոշոր՝ Open Sea հարթակում:
Հեղինակ՝ Նորայր Շողիկյան
