Բնական գազի գլխավոր խողովակաշարը Բյուրական դեռ նախորդ դարի 80-ականներին է հասել, բնակիչները հպարտությամբ են մեջբերում՝ Վիկտոր Համբարձումյանի ջանքերով: Խողովակաշարը գյուղ հասել, բայց գյուղով մեկ չի սփռվել: Ամեն տարի ինչ-որ հատված գազիֆիկացվել է: Խաչիկ Թորոսյանի թաղամասի հերթը այս տարի է:
Խաչիկ Թորոսյան (Աշտարակ համայնքի Բյուրական բնակավայրի բնակիչ) - էդ ժողովրդի էդքան հիվանդանալը, հիվանդությունները, բժշկի դիմելը առաջին հերթին հենց գազի պակասությունն ա, փեչով տաքացնում են, տաք ու հով ա անում:
Բյուրականում նախորդ տարի 71.3 մլն դրամի 6 սուբվենցիոն ծրագիր է իրականացվել: 2000 քմ ասֆալտապատում, լուսավորության անցկացում, գազիֆիկացում, ջրագծի վերանորոգում, մեկ պատուհան գրասենյակի ներդրում, պուրակի կառուցում: 2021-ին շինարարական ակտիվություն էր նաև Կարբի բնակավայրում՝ 5 սուբվենցիոն ծրագիր՝ 159.5 մլն դրամ արժեքով: Այստեղ ևս ասֆալտապատումը առաջատար է՝ 3000 քմ-ից ավելի:
Գրիգոր Գասպարյան (Աշտարակ համայնքի Կարբի բնակավայրի վարչակազմի աշխատակից) - Լուսավորություն, Այ Թի շենքի վերանորոգում, տարածքի բարեկարգում՝ 2 մասով՝ մեկը շինությունների վերանորոգում, մյուսը՝ տարածքի բարեկարգում:
Կարբիում նախորդ տարվա ձեռքբերումներից են համարում Այ Թի դպրոցի ծրագիրը: Շենքը համայնքը գնել էր 2020-ին՝ կրկին սուբվենցիայով: Նախորդ տարի հիմնանորոգել են, այս տարի արդեն գույքի հարցը պետք է լուծեն:
Գրիգոր Գասպարյան - Երեխաները սպասում են, որ բացվի, ինքը իրանից արդեն՝ Այ Թի դպրոց, շահագրգռում ա երեխաներին, որ այցելեն: Հիմնականում՝ լեզուներ, տեխնոլոգիա, էդ ուղղվածությունն ա լինելու:
2021-ին Արագածոտնի մարզը 82 սուբվենցիոն ծրագիր է ներկայացրել՝ 3.15 մլրդ դրամ արժեքով: Այս գումարից 1.5 միլիարդը պետական սուբսիդիա է: 77 ծրագիր իրականացվել է, 5-ի դեպքում մրցույթների հաղթողների, որոշ դեպքերում էլ՝ գումարի սղության պատճառով հետաձգվել է: 69 ծրագիր արդեն ավարտված է, մյուսներն ընթացքի մեջ են:
Նարինե Ավետյան (ՀՀ ՏԿԵՆ տարածքային (կապիտալ) ծրագրերի աջակցության և կոշտ թափոնների կառավարման վարչության պետ) - Հիմնական ուղղվածությունը 2021-ին էլի ասֆալտապատումն էր փողոցների, եթե չեմ սխալվում՝ 25-27 կմ ասֆալտ մարզում: Երկրորդ տեղում էր փողոցների լուսավորությունը, հետո ջրահեռացման-ջրամատակարարման համակարգերը, հասարակական շենքերի նորոգում. կառուցում՝ մշակույթի տներ, համայնքային կենտրոններ և այլն: Հիմնական ուղղվածությունները դրանք են:
2018-ից, երբ սուբվենցիոն ծրագրեր սկսեցին իրագործվել, մինչև 21 թվականը Արագածոտնի մարզում 6.5 մլրդ դրամի սուբվենցիոն շուրջ 200 ծրագիր է իրականացվել: Այս տարվա նախնական հայտերը 24-ն են: Ճիշտ է, հայտերի քանակն այս տարի մի քանի անգամ քիչ է, բայց անհամեմատ բարձրացել է արժեքը:
Նարինե Ավետյան - Հայտերի մեջ մի քանի բնակավայրերին առնչվող ծրագրեր են իրականացնում: 24 հայտ էր, ընդհանուր արժեքը՝ 3.16 մլրդ, որից պետական բյուջեի համաֆինանսավորումը՝ 1.6 մլրդ:
Այս տարի էլ մարզում առաջատարը ասֆալտապատումն է, ընդհանուր՝ 1.4 մլրդ դրամի: Հաջորդում են մանկապարտեզները՝ 2-ը՝ կառուցում, 4-ը՝ հիմնանորոգում: Քիչ չեն նաև լուսավորության ու ջրագծերի հայտերը:
Նարինե Ավետյան - Այս տարի մանկապարտեզները շատ ավելի մեծացան քանակով և արժեքով, քանի որ պետության որդեգրած քաղաքականության համաձայն՝ մենք փոփոխություն կատարեցինք, և մանկապարտեզների համար պետբյուջեից համաֆինանսավորումը բարձրացրեցին 70-80 տոկոս: Եթե վերցնենք ամբողջ հանրապետությունը, այս տարի ունենք շուրջ 174 մանկապարտեզների կառուցում, վերակառուցում, նորոգում, որից 39-ը կառուցում է միայն:
Նախարարությունում վստահ են, որ համայնքների ներկայացրած ծրագրերը կարող էին ավելի շատ լինել, սակայն հաշվի առնելով, որ այս տարի անցումային փուլ էր, և համայնքները խոշորացել են, շատ բնակավայրերում պարզապես չեն հասցրել հայտեր լրացնել: Պետության համար այս տարի առաջնահերթություն են մանկապարտեզները, ջրամատակարարումն ու ոռոգումը: Առաջնային խնդիրները լուծելուց հետո սուբվենցիոն ծրագրերում շեշտը կդնեն արդեն համայնքների տնտեսական զարգացման վրա:
