Ապրիլի 3-ին լրանում է Ռուսաստանի Դաշնության և Հայաստանի Հանրապետության միջև դիվանագիտական հարաբերությունների հաստատման 30-ամյակը։ Այս առիթով Ռուսաստանի Դաշնության նախագահ Վլադիմիր Պուտինը շնորհավորական ուղերձներով է փոխանակվել Հայաստանի Հանրապետության վարչապետ Նիկոլ Փաշինյանի և ՀՀ նախագահ Վահագն Խաչատուրյանի հետ։ Շնորհավորանքներ են հղել երկու երկրների խորհրդարանների ղեկավարները։ Հեռագրերի փոխանակում է տեղի ունեցել նաև արտգործնախարարներ Սերգեյ Լավրովի և Արարատ Միրզոյանի միջև։ Այդ մասին հայտնում են ՌԴ ԱԳՆ-ից։
«Երեսնամյա իրադարձությունը նշանավորեց ռուս-հայկական համագործակցության զարգացման ներկա փուլի սկիզբը։ Հենվելով պատմության մեջ արմատացած բարեկամության ամուր ավանդույթների, մեր ժողովուրդների անփոփոխ համակրանքի և մտերմության վրա՝ Ռուսաստանը և Հայաստանը կառուցել են բազմակողմ վստահելի դաշնակցային գործընկերություն: Անցած ժամանակահատվածում հնարավոր է եղել նկատելիորեն զարգացնել գործնական համագործակցությունը Երևանի հետ բազմաթիվ ուղղություններով։ Տարբեր մակարդակներում ընթանում է ինտենսիվ քաղաքական երկխոսություն, ամրապնդվում են միջգերատեսչական շփումները, կապերը տարածաշրջանների միջև, շփումը երկու երկրների քաղաքացիների միջև։
Հոբելյանական տարվա ընթացքում մենք նախատեսում ենք ծավալուն ծրագիր ինչպես քաղաքական, այնպես էլ մշակութային ու հումանիտար ոլորտներում։ Նախատեսվում է ՀՀ վարչապետ Նիկոլ Փաշինյանի պաշտոնական այցը Ռուսաստան։ Մինչ այս՝ ապրիլի 8-ին, Հայաստանի արտգործնախարար Արարատ Միրզոյանն աշխատանքային այցով կմեկնի Մոսկվա։
Մենք կընդլայնենք առանց այն էլ տպավորիչ իրավական բազան, որը ներառում է ավելի քան 170 համաձայնագրեր։ Առևտրատնտեսական ոլորտում ռուս-հայկական համագործակցության մասշտաբն ու որակն աճում է։ Մեր երկրների միջև ապրանքաշրջանառությունը դրվել է կայուն աճի հետագծի վրա։ Խոշոր ծրագրեր են իրականացվում էներգետիկայի, միջուկային, լեռնարդյունաբերության, տրանսպորտի և լոգիստիկայի ոլորտներում։
Տնտեսական համագործակցության ռուս-հայկական միջկառավարական հանձնաժողովը և տնտեսական և ներդրումային համագործակցության աշխատանքային խումբը շարունակում են մեծ պահանջարկ ունենալ գործնական համաձայնագրերի մշակման և կյանքի կոչման հարցում:
Ռազմական և ռազմատեխնիկական համագործակցությունն աստիճանաբար զարգանում է ինչպես երկկողմ ձևաչափով, այնպես էլ ՀԱՊԿ շրջանակներում։ Հայաստանում տեղակայված ռուս զինվորականներն ու սահմանապահները իրենց հայ գործընկերների հետ մշտական համագործակցում են հանրապետության խաղաղ զարգացման համար անվտանգ միջավայր ապահովելու համար։
Մեր ժողովուրդների հետագա մերձեցումը կոչված է խթանելու խորը փոխգործակցությունը մշակույթի, գիտության, կրթության, տեղեկատվության, զբոսաշրջության, սպորտի և երիտասարդության քաղաքականության ոլորտներում։ Մենք հոգատարությամբ ենք վերաբերվում Ռուսաստանի և Հայաստանի միջև մշակութային և լեզվական ընդհանուր տարածության պահպանմանը։
Մենք արդյունավետ աշխատանք ենք հաստատել ընդհանուր ինտեգրացիոն միավորումների՝ Եվրասիական տնտեսական միության, ՀԱՊԿ և ԱՊՀ շրջանակներում։ Մեր երկրները ցուցադրում են նաև արտաքին քաղաքականության համակարգման բարձր աստիճան բազմակողմ հարթակներում, այդ թվում՝ ՄԱԿ-ում և ԵԱՀԿ-ում։
Մենք համախմբում ենք ջանքերը տարածաշրջանային անվտանգության ամրապնդման առումով։ Համոզված ենք, որ 2020 թվականի նոյեմբերի 9-ի, հունվարի 11-ի և 2021 թվականի նոյեմբերի 26-ի ամենաբարձր մակարդակով եռակողմ համաձայնագրերի անշեղ կատարումը կբարձրացնի վստահությունը Հարավային Կովկասում և կնպաստի տարածաշրջանը խաղաղության և կայունության գոտու վերածելուն։
Ռուսաստանը թանկ է գնահատում հարաբերությունները եղբայրական Հայաստանի հետ. դրանք անցել են ժամանակի փորձությունը, ինչը թույլ է տալիս վստահորեն պլանավորելու ապագան։ Մենք վճռական ենք ավելի ամրապնդելու ռուս-հայկական դաշինքը՝ հանուն մեր երկրների ու ժողովուրդների անվտանգության և բարգավաճման ապահովման»,- նշված է ՌԴ ԱԳՆ հայտարարության մեջ։
