Նելլի Մանուկյան («Հերացի» թիվ 1 հիվանդանոցային պոլիկլինիկայի մատենավար) - Հրապարակումից ի վեր սկսվել են զանգերը, արդեն տասնյակ զանգեր ենք ընդունել:
Զանգում են քաղաքացիները, որ հերթագրվեն. 100 տարեկան բժշկական համալսարանը մեկնարկել է «100 տարի ժողովրդի թիկունքին» ծրագիրը։ Իսկ դա նշանակում է.
Արմեն Մուրադյան (ԵՊԲՀ ռեկտոր) - Կանեն մի շարք հետազոտություններ, խորհրդատվություններ, ինչ վերաբերում է վիրահատություններին, առաջին 100-ը կլինի 50 տոկոս զեղչով: Վստահ ենք, որ կավելացնենք:
Գրանցումների մեկնարկը մարտի 8-ին էր, առաջին խորհրդատվությունը լինելու է մարտի 12-ին՝ շաբաթ օրը: Ու այդպես ամեն շաբաթ լավագույն մասնագետները նախ՝ խորհրդատվություն, հետո՝ ըստ անհրաժեշտության, հետազոտություններ կիրականացնեն՝ անվճար: Ծրագրում ընդգրկված են «Հերացի» թիվ 1 և «Մուրացան» համալսարանական հիվանդանոցների պոլիկլինիկաները, «Միքայելյան» վիրաբուժության ինստիտուտը:
Սուրեն Ստեփանյան («Միքայելյան» վիրաբուժության ինստիտուտի վիրաբուժության կլինիկայի ղեկավար) - «Միքայելյան» վիրաբուժության ինստիտուտը այս միջոցառմանը միանում է իր ամբողջ թիմով, կազմով, կան մի շարք ծառայություններ՝ քիթ-կոկորդ, ուրոլոգիա, քիմաթերապիա, ախտորոշիչ և այլն:
Արմեն Մուրադյան - Կան մի շարք հիմնարկներ, որոնք իրենց պատրաստակամությունն են հայտնել միանալու ծրագրին, և հարստացավ այն:
Մուրադյանը նշում է՝ եթե էլի միացողներ լինեն՝ իրենք բաց են: Իսկ միացողներից մեկը Բեգլարյան բժշկական կենտրոնն է:
Արմինե Հարությունյան («Բեգլարյան» ԲԿ մանկաբարձ-գինեկոլոգ) - Ծրագրին մասնակցում ենք կանանց կոնսուկտացիայում հասանելիք բոլոր ծառայություններով:
Մտադիր են նաև մարզային այցեր կազմակերպել: Դեռ քննարկում են համալսարանին կցված 2 մարզը՝ Լոռի և Գեղարքունիք:
Դավիթ Մելիք-Նուբարյան (ԵՊԲՀ կլինիկական աշխատանքների կազմակերպման վարչության պետ) - Այդ թվում, մենք դեռ կքննարկենք, որ մեր մասնագետները հենց մարզերում վիրահատություն անեն, փորձով կիսվեն, համ էլ մարդիկ ստիպված չեն լինի գալ երևան, համ էլ մարզերում կառավարության ներդրմամբ կան լավ զինված հաստատություններ:
Տարիքային որևէ սահմանափակում չկա, բայց ԵՊԲՀ ռեկտորը նշում է՝ առաջնահերթությունը տալու են զինծառայողների ընտանիքներին, մանկավարժներին և համալսարանականներին՝ անկախ թե որ համալսարանից են:
Նելլի Մանուկյան - Հիմնականում զանգում են սիրտ-անոթային, թոքային, քիթ-կոկորդ, ալերգալոգիա և մանկաբուժություն:
Նաև օնկոլոգիական խնդիրներով: Նելլի Մանուկյանը 1 օրվա գրանցումներն է ներկայացնում:
Գրանցվելու համար պետք է զանգել հետևյալ հեռախոսահամարներով.
«Հերացի» թիվ 1 հիվանդանոցային համալիր՝ +374 10 58 07 24,
«Մուրացան» հիվանդանոցային համալիր՝ +374 91 16 20 00,
«Միքայելան» վիրաբուժության ինստիտուտ՝ +374 41 60 01 45,
կամ հաղորդագրություն ուղարկել [email protected] էլեկտրոնային փոստին:
Դավիթ Մելիք-Նուբարյան - Գիտենք, որ պահանջը շատ է, քովիդից հետո խնդիրները սրվել են:
«Միքայելյանում» են ակտիվ զանգերը՝ մի քանի տասնակ, նաև «Հերացի» կենտրոնում՝ մի 2 տասնյակ:
Գրանցումները կարվեն 100 օր՝ մինչև հունիսի 18-ը, սակայն խորհրդատվություններն ու հետազոտությունները կշարունակեն այնքան, քանի դեռ բոլոր հերթագրվողների հետ բժիշկները չեն հանդիպել:
Հեղինակ՝ Իրինա Մկրտչյան
