2023 թվականից բուհերի ընդունելության քննությունները կանցկացվեն նոր մոտեցմամբ: Դիմորդը, եթե ցանկանա, միևնույն միասնական քննությունը կհանձնի երկու անգամ՝ հունվարին և հունիսին: Սա չի նշանակում, որ բուհն էլ տարեկան երկու անգամ է ընդունելություն անելու, պարզապես դիմորդը կրկնակի քննության արդյունքում կընտրի այն գնահատականը, որն ինքը կնախընտրի:
Այսպիսով, քննությունները պակաս սթրեսային կդառնան, երբ հնարավորությունը մեկն է, իսկ ավելորդ հուզմունքը կարող է թույլ չտալ ամբողջությամբ դրսևորել գիտելիքները:
Կարեն Թռչունյան, ՀՀ ԿԳՄՍ նախարարի տեղակալ - Իմ կարծիքով՝ այդ սթրեսային մեկ քննության գործոնը, որ միանգամից սթրեսի մեջ են հայտնվում ապագա ուսանողները, շատ ավելի հեշտ և մատչելի կդարձնի հաղթահարումը, և մենք կունենանք քիչ թե շատ դեպի աշակերտն ուղղված քայլ, որը, իմ կարծիքով, շատ կարևոր է:
Կրթության փոխնախարարի խոսքով՝ այսուհետ այլ կերպ կլինի պետության կողմից ուսման վարձի լրիվ կամ մասնակի փոխհատուցումը: Դա ուղիղ կապ կունենա առաջադիմության հետ: Այսինքն՝ որքան բարձր լինի ուսանողի միջին որակական գնահատականը՝ ՄՈԳ-ը, այնքան մեծ կլինի պետության տրամադրած փոխհատուցումը, որը կարող է հասնել մինչև 90 տոկոսի:
Կարեն Թռչունյան - Մենք սրանով խթանում ենք, որ ոչ միայն ուսանողը մուտք գործի բուհ, բուհական համակարգում սովորելու, այլև պետությունը հստակ ուղերձ է տալիս, որ լավ սովորեք, մեզ պետք են որակյալ կադրեր, և այդ կադրերը պետք է համալրեն աշխատաշուկան, իսկ աշխատաշուկան պահանջարկ ունի որակյալ կադրերի, որը և հետագայում կարող է բերել տնտեսության մեջ որոշակի ներդրումների՝ այդ կադրերի միջոցով:
Այս տարի նաև հստակեցվել է բուհերի ընդունելության քննությունների և մասնագիտությունների ցանկը: Սկզբունքն այն է, որ յուրաքանչյուր մասնագիտության դեպքում ընդունելությունն էլ լինի միասնական մոտեցմամբ ու չտարբերվի՝ ըստ բուհերի:
Կարեն Թռչունյան - Մինչև այդ տարբեր բուհեր տարբեր ընդունելության քննություններ էին առաջարկում, և ստացվում էր՝ ունենք մեկ մասնագիտություն և ամեն բուհ իր ձևով է հասկանում այդ մասնագիտությունը և ընդունելության քննությունը սահմանում է իր իսկ պատկերացրած ձևով: Սրանով հստակ ցույց ենք տալիս, որ առնվազն պետք է երկու քննություն: Եթե առաջ կար աստղանիշով, լրացուցիչ քննություն, հիմա կոնկրետ կա մեկ մասնագիտություն՝ մեկ սկզբունք և պարտադիր պետք է լինի երկու քննություն:
Որոշ մասնագիտությունների դեպքում, ի դեպ, օրինակ ՏՏ ոլորտին առնչվող, դիմորդներին առաջարկվում է ընտրություն կատարել անգլերենի և ֆիզիկայի միջև: Հակադիր թվացող այս առարկաների համադրումը դիմորդների և նրանց ծնողների շրջանում տարակուսանք է առաջացրել, թե ինչպես պետք է միմյանց հետ մրցակցեն ֆիզիկա և անգլերեն հանձնողները: Ոլորտի պատասխանատուները մանրամասնում են, որ այս մասնագիտությունների համար նշված քննությունները նորություն չեն, պարզապես նախկինում մի բուհը պարտադիր մաթեմատիկայից բացի պահանջել է ֆիզիկայի, մեկ այլ բուհ էլ՝ անգլերենի քննություն: Հիմա մոտեցումը միասական է, և բոլոր բուհերում մաթեմատիկան պարտադիր է, իսկ ֆիզիկա, թե անգլերեն՝ կընտրեն դիմորդները:
Նոր ուսումնական տարվանից նաև նախատեսվում է բնագիտական մասնագիտությունների գծով բակալավրիատում ավելացնել պետպատվերով տեղերի քանակը:
Հեղինակ՝ Աննա Զախարյա
