Բացահայտվել է 44-օրյա պատերազմի մասնակիցների անվան տակ հափշտակություններ կատարած հանցավոր խումբ: Խմբի անդամներն Ազգային ժողովի նախկին պատգամավոր Ռուբեն Գևորգյանի ղեկավարած «Երդվյալ ազատամարտիկներ» ՀԿ-ի անդամներն են:
Արտակ Խաչատրյան, Հատկապես կարևոր գործերով քննիչ - Քրեական գործի նախաքննության ընթացքում ձերբակալվել է երեք անձ, որոնցից մեկը հանդիսանում է «Երդվյալ ազատամարտիկների միություն» ՀԿ անդամ: Նրա նկատմամբ որպես խափանման միջոց է ընտրվել կալանավորումը: Ձերբակալվածներից մեկը հանդիսանում է իմ կողմից նշված ՀԿ-ի անդամ, որը ևս կալանավորվել է դատարանի որոշմամբ:
Քննիչի խոսքով՝ մեղադրանք է առաջադրվել նաև խմբի մյուս 3 անդամներին, որոնց նկատմամբ ազատությունից զրկելու հետ չկապված խափանման միջոցներ են ընտրվել: Գործի նյութերի համաձայն՝ 44-օրյա պատերազմի ավարտից հետո հանցավոր խումբը թիրախավորել է հակառակորդի վերահսկողության տակ անցած 3 զորամաս:
Արտակ Խաչատրյան - Ներկայացել են զորամասեր, ներկայացել են որպես ռազմական վերահսկողության ծառայության աշխատակիցներ, ներկայացրել են կեղծ տեղեկություններ «Երդվյալ ազատամարտիկների միություն» հասարակական կազմակերպության, ինչպես նաև «Նվիրյալ մահապարտներ» ՀԿ-ի անդամների վերաբերյալ՝ իբրև մասնակցության մասին 44-օրյա պատերազմի, պահանջելով նրանց տրամադրել համապատասխան կարգավիճակը հաստատող տեղեկանքներ:
Արդյունքում՝ տվյալ անձանց պետության կողմից փոխանցվել է առանձնապես խոշոր չափի գումար, որը կանխիկացնելուց հետո հափշտակվել է: Արտակ Խաչատրյանը հավելում է՝ կատարված մեծածավալ քննչական գործողությունների, այդ թվում՝ խուզարկությունների արդյունքում հայտնաբերվել են նշված անձանց մեղքը հիմնավորող բազմաթիվ փաստաթղթեր:
Արտակ Խաչատրյան - Վարույթն իրականացնող մարմինը պարզել է երեք տասնյակից ավելի տվյալներ, որոնք, առհասարակ չգտնվելով Արցախի Հանրապետության տարածքում, 44-օրյա պատերազմի ընթացքում ստացել են մարտական գործողությունների մասնակցի կարգավիճակ և դրանից բխող նաև ֆինանսական վարձատրություն, ինչպես նաև 10-ից ավելի անձանց տվյալներ, որոնք թեև 44-օրյա պատերազմի ընթացքում գտնվել են Արցախի Հանրապետության տարածքում և ունեցել են որոշակի մասնակցություն, սակայն նրանց վերաբերյալ մասնակցության տվյալներն ուռճացված են ներկայացվել:
Ըստ քննիչի՝ խոսքն այս պահի դրությամբ թեև վերաբերում է շուրջ 4 տասնյակ անձանց կողմից խարդախություն կատարելու հանցագործությանը, սակայն վարույթն իրականացնող մարմնի ձեռքի տակ առկա փաստաթղթերից հանգել են հետևության, որ իրականում շատ ավելի մեծ խումբ է գործել, և պետությանը պատճառված վնասը կարող է շատ ավելի մեծ ծավալների հասնել:
«Երդվյալ մահապարտներ» ՀԿ-ի փոխնախագահ, Արցախյան երկու պատերազմների մասնակից Վահե Սարգսյանը, որը մեղադրվում է խմբի կազմում խարդախությամբ առանձնապես խոշոր չափի գումար հափշտակելու համար, չի ընդունում մեղքը:
Արթուր Սահակյան, պաշտպան - Իմ պաշտպանյալն, իհարկե, մեղադրանքը չի ընդունել, փոքրիկ ցուցմունք է տվել այն մասին, որ զբաղվում է հասարակական գործունեությամբ, ռազմահայրենասիրական ուղղվածության ՀԿ փոխնախագահն է: Իր բնակարանից խուզարկությամբ հայտնաբերված, ընդ որում ոչ թե հայտնաբերված, այլ իր կողմից ներկայացված փաստաթղթերը վկայում են ոչ թե իր կողմից ինչ-որ հանցավոր գործունեության, այլ իր հասարակական գործունեության մասին:
Ըստ պաշտպանի՝ Սարգսյանն օգնում է տվյալ անձանց՝ պետության կողմից իրենց հասանելիք սոցիալական երաշխիքներից օգտվելու կամ մարտական ծառայությունների համար համապատասխան պարգևատրումների ներկայանալու:
Արթուր Սահակյան - Ռազմական վերահսկողության ծառայության աշխատակիցն ունի՞ արդյոք այդպիսի ֆունկցիոնալ պարտականություն կամ ունի՞ այդպիսի լիազորություն, որ մտնի պատահական զորամաս, ասի՝ բարև ձեզ, ես ծառայության աշխատակից այսինչն եմ, ես ձեզ խնդրում, կարգարդում եմ Պողոս Պողոսյանին, Պետրոս Պետրոսյանին մասնակցության տեղեկանք տրամադրել: Ես կարծում եմ՝ չունի:
Սահակյանի խոսքով՝ ՀԿ-ի ղեկավարներից մեկը գրությամբ դիմել է Արցախի ԱԺ նախագահին՝ հարյուրից ավելի մարտիկների անվանացանկով և խնդրել է վերականգնել այդ մարդկանց իրավունքները՝ որպես պատերազմի մասնակցի, քանի որ փաստաթղթերը կորսվել են:
Արթուր Սահակյան - Արցախի ԱԺ նախագահը համապատասխան տեղեկանքով այդ ցուցակը տրամադրել է զինկոմիսարիատին, զինկոմիսարիատը՝ համապատասխան զորամասերին, զորամասերում մուտքագրվել են այդ անձանց անունները՝ որպես մարտական գործողությունների մասնակից և Վահե Սարգսյանն ընդամենը այցելելով այդ զորամասեր՝ տվյալ անձանցից մի քանիսի խնդրանքով իր փաստաթղթերին զուգահեռ բերել է նաև նրանց փաստաթղթերը:
Քրեական գործի նախաքննությունը շարունակվում է, քննություն է տարվում նաև պետությանը պատճառված վնասը փոխհատուցելու ուղղությամբ:
Հեղինակ՝ Տաթև Խաչատրյան
