Սրահում ապագա պարեկներն են: Լոռու և Շիրակի մարզերում պարեկային ծառայություն ներդնելու նախավերջին՝ հարցազրույցի փուլն է: 800-ից ավելի դիմորդ բարեհաջող անցել է բժշկական հետազոտությունը, IQ թեստն ու ֆիզիկական պատրաստվածության քննությունը: Հարցազրույցը զտման վերջին փուլն է: 4 օր դիմորդների հետ հանդիպելուց հետո արդարադատության նախարարի տեղակալն արդեն պատկերացում է կազմել ապագա պարեկների մասին:
Քրիստիննե Գրիգորյան (ՀՀ արդարադատության նախարարի տեղակալ) - Ես վստահաբար կարող եմ պնդել, որ մենք ավելի որակյալ կադրեր ունենք, որակյալ այն իմաստով, որ նրանք ավելի պատրաստված են, շատ ավելի իրազեկված են պրոցեսի վերաբերյալ:
Արգամը դիմորդներից է՝ Արմավիրից է, աշխատում է դպրոցում՝ պատմություն է դասավանդում: Հարցազրույցին փոքր-ինչ լարված էր մտել, բայց մեծ հույս ունի, որ ամիսներ անց պարեկների կազմում է լինելու:
Արգամ Հակոբյան (պատմության ուսուցիչ) - 5-6 ամիսների աշխատանքը լուրջ վերաբերմունք ձևավորեց իմ մոտ Պարեկային ծառայության նկատմամբ, հիմա փորձում եմ ընդունվել աշխատանքի և աշխատել Պարեկային ծառայությունում:
Հանձնաժողովում նաև հասարակական կազմակերպությունների ներկայացուցիչներ կան, որոնք ուշադրություն են դարձնում մարդկային հատկանիշներին, ոչ թե գիտելիքներին ու կարողություններին:
Սևադա Ղազարյան («Իրազեկ քաղաքացիների միավորում» ՀԿ ներկայացուցիչ) - Փորձում ենք հասկանալ՝ դիմորդն ինչպե՞ս է տարբեր իրավիճակներում իրեն դրսևորում, ինչպե՞ս է պատրաստ շփվել քաղաքացու հետ, ունի՞ արդյոք բավարար մարդկային որակներ քաղաքացու հետ շփվելու համար, կարո՞ղ է լուծումներ առաջարկել, ինքնուրույն որոշումներ կայացնել:
Երևանը համարվում է ամենաբարդ քաղաքը՝ արդյունավետ ծառայություն իրականացնելու առումով: Արդարադատության փոխնախարարը մայրաքաղաքում ներդրված Պարեկային ծառայությունը արդյունավետ է համարում՝ չհերքելով նաև, որ զրոյից ստեղծված ծառայությունը սկզբնական շրջանում կաղում էր:
Քրիստիննե Գրիգորյան - Միևնույն ժամանակ մենք նաև Երևանի դեպքում բավականին բաներ սովորեցինք ինքներս, որոշ խնդիրներ, որ նախատեսել էինք, կանխատեսել էինք, ախտորոշել էինք ծրագրի ընթացքում, որոշ խնդիրներ, որոնց մասին չէինք մտածել, բայց բացահայտեցինք այդ ընթացքում, մեծ մասը, կարող ենք ասել, որ լուծված է: Բայց նաև այս դասը շատ կարևոր վարժություն էր ու երաշխիք մարզերի համար: Մարզերի դեպքում այս երկրորդ ակադեմիան մեծ հնարավորություններ ունի գործնական գիտելիքներ ձեռք բերելու, որովհետև կա ծառայություն, որտեղ նրանք անցնելու են պրակտիկա:
Հարցազրույցի փուլ հասած 828 դիմորդ պայքարում է 570 տեղի համար, որից 55-ը՝ Երևանի ստորաբաժանման, մնացածը՝ Լոռու և Շիրակի: Հետաքրքրվածությունը ավելի պարզ նկարագրելու համար Քրիստիննե Գրիգորյանը մեկ օրինակ է բերում՝ Երևանի ռեզերվի 1 տեղի համար 10 դիմում կա, ինչը նշանակում է՝ մրցակցությունը առողջ է լինելու: Այս անգամ մեծ է նաև ակտիվությունը:
Ամալյա Հովսեփյան (ՀՀ արդարադատության նախարարության խորհրդական) - Անցած անգամ հատկապես գործող ծառայողները մի փոքր մտավախություններ ունեին, որ միգուցե չկայանա, միգուցե չլինի այն, ինչ որ ասվում է, և դրա համար չէին դիմել: Բայց այսօր նրանք տեսնում են, որ դա իրականություն է, և դրանից այլևս փախնել չենք կարող: Հակառակը՝ տեսնում են, որ այս ծառայությունը ավելի լավ հենքեր և հիմքեր է իրենց համար առաջարկում՝ կարիերայի զարգացման համար, իրենց ավելի լավ որակներ ունենալու համար ու նաև այլ երաշխիքներ, որ ավելի լավ պայմաններ են: Իրենց մասնակցելու ցանկությունը բավականին մեծ է այս տարի:
Թիրախավորվել ու շտկվել են նաև այն բացերը, որոնք ի հայտ եկան առաջին՝ Երևանի խմբի ուսուցման ժամանակ: Սա նշանակում է, որ Շիրակում ու Լոռիում գործընթացի մեկնարկը ավելի սահուն կլինի՝ վստահեցնում են պատասխանատուները: Հարցազրույցների ավարտից հետո ընտրված դիմորդները հնգամսյա դասընթացներ կանցնեն, և, ամենայն հավանականությամբ, ապրիլին նոր պարեկային կարգախմբերը կշրջեն նաև Հայաստանի երկու մարզերում: