ՀԱՊԿ-ը զորավարժություններ կանցկացնի տաջիկա-աֆղանական սահմանի մոտ: «Արդեն սկսվել Է ՀԱՊԿ հավաքական ուժերի զորավարժությունների անմիջական նախապատրաստումը, որոնք առաջիկա ամիսներին կանցկացվեն տաջիկա-աֆղանական սահմանի մերձակայքում»,- հայտարարել է ՀԱՊԿ-ի գլխավոր քարտուղար Ստանիսլավ Զասը:
Ուշագրավ է, որ զորավարժությունների նախապատրաստման վերաբերյալ հայտարարվում Է Աֆղանստանում իրադրության կտրուկ սրման ֆոնին:
*****
Վրաստանում ամեն 50-րդ բնակիչ վարակված է կորոնավիրուսով։ Հայտարարել է Վրաստանի հիվանդությունների վերահսկման ու հանրային առողջության ազգային կենտրոնի փոխտնօրեն Պաատա Իմնաձեն։ Նրա խոսքով՝ չնայած մեծ դժվարությամբ, առողջապահական համակարգը դեռ կարողանում է դիմակայել համաճարակային նման իրավիճակին: Իմնաձեն իրավիճակը ռեկորդային է որակել: Վրաստանը վերականգնել է մի շարք սահմանափակումներ՝ կապված երկրում տիրող ծանր համաճարակային իրավիճակի հետ: Թբիլիսիում դադարեցվել է տրանսպորտային երթևեկությունը, իսկ դիմակի կրումը պարտադիր է դարձել ավելի քան 5 հոգանոց հավաքների ժամանակ: Խստորեն վերահսկվում են նաև հարսանիքների, ծննդյան, հոգեհացի արարողությունների և այլ միջոցառումների անցկացման ընթացքը:
*****
Գիտնականներն արձանագրում են՝ այս ամառը կհիշվի աննախադեպ բնական աղետներով: Միայն Իտալիայում վերջին ութ ամսվա ընթացքում ավելի քան 120 հազար հեկտար անտառ է այրվել, հինգ մարդ մահացել է: Պաշտոնական տվյալներով՝ եվրոպական երկրներից հրդեհից առավել շատ տուժել է Իտալիան: Կրակի մարման աշխատանքներին ներգրավված է 7600 հրշեջ:
*****
Ծանր իրավիճակ է նաև Իսպանիայում: Անդալուզիայի հարավում ջերմաստիճանը հատել է 47 աստիճանը, ինչը կարող է դառնալ նոր ռեկորդ: Անտառային հրդեհներն ընդգրկել են 10 հազար հեկտար տարածք, աղետի գոտու բնակիչները ստիպված տարհանվել են:
*****
Մարոկկոյում արդեն երկրորդ օրն է հրշեջները պայքարում են երկրի հյուսիսում բռնկված կրակի դեմ: Մի քանի շրջանում ջերմաստիճանը հասել է 49 աստիճանի: Ոչնչացվել է 200 հա անտառ:
*****
Ալժիրի հյուսիսում էլ հրդեհի 19 օջախ է գրանցվել: Մեկ շաբաթվա ընթացքում հրդեհների հետևանքով մահացել է մոտ 90 մարդ: Հրդեհաշիջման աշխատանքներին մասնակցում են ռուսական 5 Մի-26 ուղղաթիռ և ֆրանսիական 2 հրշեջ ինքնաթիռ:
*****
Հրշեջները կրակի դեմ պայքարում են նաև ԱՄՆ Կալիֆոռնիա և Յուտա նահանգներում: Անտառային հրդեհների պատճառով այստեղ 6000-8000 ընտանիք է տարհանվել:
*****
Միջերկրական ծովի ջերմային ալիքը հասել է նաև Փարիզ: Անցած հանգստյան օրերին Ֆրանսիայի մայրաքաղաքում ջերմաստիճանը 33 աստիճանից բարձր էր: Փարիզցիներն ստիպված են եղել զովանալ ջրավազաններում:
*****
Մի տեղ տապից հրդեհներ են բռնկվում, մեկ այլ վայրում անձրևներից ջրհեղեղներ սկսվում: Հորդառատ անձրևներից հեղեղումներ ու սողանքներ են առաջացել Ավստրիայի Զալցբուրգում: Բարեբախտաբար, զոհեր ու տուժածներ չկան: Արտակարգ իրավիճակների նախարարությունը տարհանել է բազմաթիվ շենքեր և երկու ճամբար, ընդհանուր առմամբ՝ 120 մարդու, որոնցից շատերը հանգստացողներ էին:
*****
Հորդառատ անձրևներից սողանքներ են առաջացել Ճապոնիայի մի քանի պրեֆեկտուրայում, աղետի հետևանքով երեք քաղաքացի է զոհվել, երկուսի կյանքը հաջողվել է փրկել:
*****
Ջրհեղեղների պատճառով արտակարգ իրավիճակ է հայտարարվել Ռուսաստանի Կրասնոդարի երկրամասում: Աղետի պատճառով այստեղ տարհանվել է ավելի քան 1500 մարդ, այդ թվում՝ ամառային ճամբարներից շուրջ 1000 երեխա: Ընդհանուր առմամբ՝ 1400-ից ավելի տուն հեղեղվել, մոտ 108.000 բնակիչ մնացել է առանց հոսանքի: Արտակարգ իրավիճակ է հայտարարվել 14 բնակավայրում: Սպասվում է, որ հորդառատ անձրևները կշարունակվեն առաջիկա մի քանի օրվա ընթացքում:
