Մեր քաղաքականության կարևորագույն հաղթանակը մեր միջնորդությամբ ու ԱՄՆ աջակցությամբ Ադրբեջանում պահվող հայ ռազմագերիներին ազատ արձակելու համաձայնությունն է: Հատված է Վրաստանի վարչապետ Իրակլի Ղարիբաշվիլիի ամենամյա զեկույցից:
Իրակլի Ղարիբաշվիլի, Վրաստանի վարչապետ - Սա աննախադեպ իրադարձություն է, որն ընդգծում է մեր հատուկ դերը` տարածաշրջանում խաղաղության ապահովման հարցում։ Լեռնային Ղարաբաղի պատերազմն ամբողջ տարածաշրջանին որոշ դժվարությունների առաջ է կանգնեցրել։ Վրաստանի համար էական է հարևան երկրներում խաղաղությունն ու կայունությունը։
Ղարիբաշվիլին խորհրդարանի ամբիոնից ևս մեկ անգամ շնորհակալություն է հայտնել երկու երկրների առաջնորդներին` պատրաստակամություն հայտնելով շարունակել գործել` ի նպաստ համընդհանուր խաղաղության ու կայունության: Գերիների թեման շարունակում է մնալ ԱՄՆ կոնգրեսականների ուշադրության կենտրոնում: Լեռնային Ղարաբաղում հակամարտությունից հետո Ադրբեջանի կողմից մարդու իրավունքների շարունակական ոտնահարումն անընդունելի է: Գրել է ԱՄՆ կոնգրեսական Ադամ Շիֆը։ «Ռազմագերիների հետապնդումը միջազգային կոնվենցիաների կոպիտ խախտում է և Ադրբեջանի կողմից մարդու իրավունքների և միջազգային իրավունքի կոպիտ անտեսման հետագա վկայություն:
Ադամ Շիֆ, ԱՄՆ կոնգրեսական - Մինչ մենք շարունակում ենք աշխատել հայ ռազմագերիների անհապաղ ազատ արձակման ուղղությամբ, Միացյալ Նահանգները պետք է խիստ միջոցներ ձեռնարկի Ադրբեջանի նկատմամբ, և նորից կիրառի Բաքվի ռեժիմին ԱՄՆ ռազմական օգնություն տրամադրելու արգելքը: Մենք չպետք է թույլ տանք, որ Ադրբեջանն անպատիժ խախտի մարդու իրավունքները և ոտնահարի միջազգային նորմերը:
Գերիները քաղաքական ազդեցության գործիք չեն՝ այսպիսի պաստառներով Լոնդոնում շարունակվում են բրիտանահայերի մարդասիրական խմբի կազմակերպած ցույցերը, որ նորից ակտիվացան Թուրքիայի նախագահի կնոջ և Ադրբեջանի նախագահ Ալիևի հայտնի տեսանյութից հետո, որտեղ նրանք քննարկում են, թե քանի գերի կարելի է վերադարձնել և ինչ պայմանով: Արդարության և ժողովրդավարության եվրոպական-հայկական ֆեդերացիան ԵՄ առաջնորդներին նամակ է հղել՝ նրանց ուշադրությունը հրավիրելով տարածված տեսանյութի վրա: Այդպիսի նամակ ուղղել էր նաև Հայաստանում Մարդու իրավունքների պաշտպանը:
- Մենք այստեղ ենք՝ Լոնդոնի Տրաֆալգարի հրապարակում, բողոքելու հայ գերիներին պահելու դեմ, պատերազմից և նոյեմբերի պայմանավորվածությունից հետո նրանց չեն թողնում տուն գալ: Մենք այստեղ ենք բողոքելու նրանցից 14-ի դեմ սկսված շինծու դատավարության դեմ, և հատկապես շարունակելու պայքարը հանուն մեկի, որին արդեն ազատազրկեցին 20 տարով:
Ադրբեջանական սադրանքների դեմ պայքարն արդյունք է տվել Բարսելոնայում: Ադրբեջանական պաստառները հեռացվել են Բարսելոնայի մետրոյի կայարաններից։ Դեսպան Վլադիմիր Կարմիրշալյանին ուղղված պատասխան նամակում հայտնել է մետրոյի տնօրեն Ռամոն Բակարդի Գասկոնը։ Նա նաև ափսոսանք է հայտնել, որ գովազդային ծառայություններ մատուցող ընկերությունն առանց մետրոյի ղեկավարության հետ համաձայնեցնելու փակցրել էր դրանք։ Ադրբեջանի անկախության տոնին Բարսելոնայի մետրոյում փակցվել էին ադրբեջանական պաստառներ, որոնք պատկերում էին Շուշին: Բարսելոնայի հայ համայնքն ու Իսպանիայում Հայաստանի արտակարգ և լիազոր դեսպանն ադրբեջանական այդ քայլը սադրանք էին որակել և ակտիվ քայլեր ձեռնարկել, որպեսզի դրանք հեռացվեն:
