Խորհրդարանը քննարկում է «Պետական սահմանի մասին» ՀՀ օրենքում փոփոխությունների նախագիծը: «Նախագծերի ընդունումը պայմանավորված է ՀՀ պետական սահմանի սահմանային շերտում տեսալուսանկարահանող, անօդաչու թռչող սարքերի օգտագործման հետ կապված հարաբերությունները կանոնակարգելու, սահմանային շերտ մուտք գործած, կամ այնտեղ գտնվելու, բնակվելու, գրանցվելու կանոնները խախտած անձանց նկատմամբ վարչական ներգործության միջոցներ կիրառելու հիմքերը հստակեցնելու, ինչպես նաև վարչական իրավախախտման համար սահմանված վարչական պատասխանատվության չափը վերանայելու անհրաժեշտությամբ»,- նշեց ԱԱԾ տնօրենի տեղակալ Ստեփան Մելքոնյանը:
Նախագծով առաջարկվում է սահմանային շերտում տեսալուսանկարահանող սարքերի, այդ թվում՝ անօդաչու թռչող սարքերի օգտագործումն արգելելու նպատակով «Պետական սահմանի մասին» օրենքում կատարել համապատասխան լրացում և արգելել առանց համապատասխան թույլտվության օգտագործել անօդաչու թռչող սարքեր, տեսալուսանկարահանել սահմանակից պետության տարածքը, սահմանային շերտում տեղակայված ինժեներական կառույցները և արգելափակոցները, սահմանապահ զորքերի կողմից օգտագործվող շենքերը, շինությունները, դիտաշտարակները, տրանսպորտային միջոցները:
ԱԱԾ տնօրենի տեղակալը տեղեկացրեց, որ այս նախագիծը մշակվել ու շրջանառության մեջ է դրվել 2020 թ. ամռանը, մինչև Արցախյան պատերազմը: «Դա ամենևին կապված չէ 2021 թ. փետրվարի 10-ին ԱԱԾ կայքէջում տեղադրված ԶԼՄ-ների կողմից Սյունիքի մարզի՝ Ադրբեջանի հետ սահմանակից դարձած հատվածներում լուսաբանում իրականացնելու համար ԱԱԾ մարմինների իրազեկման հետ, որ պայմանավորված է եղել ստեղծված օպերատիվ իրավիճակով ու լրագրողների անվտանգությունն ապահովելու նկատառումներով»,- ասաց Ստեփան Մելքոնյանը: