Մահվան ճամբարներ արտաքսմանը դիմակայելու գործում նացիստական գետտոներում գտնվող հրեա մարտիկները ոգեշնչվել են իրական դեպքերի վրա հիմնված՝ Հայոց ցեղասպանությունը նկարագրող պատմությունից: Այս մասին հայտնում է The Times of Israel պարբերականը:
Խոսքը Ֆրանց Վերֆելի «Մուսա լեռան 40 օրը» վեպի մասին է, որը ոգեշնչել էր հրեաներին: Վեպը լույս է տեսել 1933-ին: Այն պատմում է Մուսա լեռան պաշարման մասին: Սա Մովսեսի լեռն է, որտեղ 250 հայ մարտիկներ 1915-ին մոտ 2 ամիս ինքնապաշտպանություն են կազմակերպել:
Պարբերականն անդրադարձել է նաև Թուրքիայի կառավարության կողմից Ցեղասպանության ժխտմանն ու ԱՄՆ նախագահի՝ Հայոց ցեղասպանության պաշտոնապես ճանաչմանը: Հրեական պարբերականը նշում է նաև, որ Իսրայելը դեռևս չի ճանաչել Ցեղասպանությունը:
Վերադառնալով հայերի ինքնապաշտպանության պատմությանը՝ հոդվածագիրը նշում է, որ գերմանալեզու վեպի շնորհիվ Հայոց ցեղասպանության թեմայի վրա է կենտրոնացվել միլիոնավոր մարդկանց ուշադրությունն ամբողջ աշխարհում, ինչն իր հերթին օգնել է բավականաչափ գումար հանգանակել հայ փախստականներին աջակցելու համար:
Վեպի հրատարակումից վեց տարի անց նացիստական Գերմանիան սկսեց Եվրոպայի նվաճման օպերացիան: «Մուսա լեռան 40 օրը» երիտասարդների շրջանում գրեթե ակնթարթորեն տարածվեց կրակի լեզվակների նման:
Առաջին աշխարհամարտի քողի տակ Օսմանյան կայսրությունը հայերի զանգվածային սպանությունները սկսեց 1915-ից: Բաց երկնքի տակ իրականացված կոտորածից բացի՝ հազարավոր հայերի նստեցրին նավերը, որոնք Սև ծովում ջրասույզ եղան:
Հայերի կոտորածից տասնամյակներ անց, Ֆրանց Վերֆելի վեպի հերոսները ոգեշնչեցին գետտոներում ձերբակալված հազարավոր հրեաներին, որոնք վճռեցին իրավիճակն իրենց ձեռքը վերցնել, երբ ճիշտ պահը հասունանա: «Մուսա լեռան 40 օրը» վեպը բեսթսելեր էր դարձել Վարշավայի գետտոյում: Ձերբակալված հրեաներն իրենց կյանքը համեմատում էին հայերի ճակատագրի հետ: Նացիստների ծրագրած ցեղասպանությանը դիմագրավելու որոշումը կայացվել էր, հրեաները խոսում էին գետտոյի իրենց «Մուսա լեռան» ծրագրի մասին:
