Կառավարությունը կանոնակարգում է ՀՀ տարածքում համայնքային ճանապարհների կառուցման և բարեկարգման աշխատանքների ընթացակարգը, նոր կառուցվող և վերակառուցվող ընդհանուր օգտագործման ավտոմոբիլային ճանապարհների նախագծման և կառուցման հիմնական պահանջները:
Գործադիրի նիստում, ներկայացնելով համապատասխան նախագիծը, քաղաքաշինության կոմիտեի նախագահի պարտականությունները կատարող Արմեն Ղուլարյանը նշեց, որ ներկայումս համայնքային ճանապարհների բարեկարգման աշխատանքների մի մասն արդեն իսկ իրականացվում է համայնքների սուբվենցիոն ծրագրերի շրջանակում, որոնց համար ամրագրված ընթացակարգը ժամանակատար է և համայնքների սահմանափակ բյուջեների մասով կատարման համար ոչ ծախսարդյունավետ:
«Առաջարկվում է ոչ տարանցիկ ՀՀ մարզերի համայնքներում տեղական նշանակության ճանապարհների սալարկման, խճապատման, երթևեկելի մասի բարեկարգման աշխատանքներն ընդգրկել ցածր ռիսկայնության աստիճանի դասակարգում ունեցող օբյեկտների ցանկում, որոնց համար չի պահանջվի շինարարության թույլտվություն»,- ասաց Ղուլարյանը՝ նշելով, որ արդեն իսկ մշակված ուղեցույց կա, որը կհանձնվի համայնքապետարաններին:
Վարչապետը նշեց, որ երկար ժամանակ քննարկում են գյուղական տեղական նշանակության ճանապարհների որակի լավացման հարցը: Նա շեշտեց, որ ռազմավարական խնդիր է գյուղական համայնքներում կյանքի որակի փոփոխությունը:
«Հայաստանի վերափոխման մինչև 2050 թվականի ռազմավարության մեջ մենք ընդգծել ենք, որ պետք է բնակավայրն ինքնին չնշանակի որոշակի ապրելակերպ: Մենք խնդիր ենք դրել մեր գյուղական նշանակության ճանապարհների որակի էական լավարկման, և շատ դեպքերում ռելիեֆի, համայնքային բյուջեից կախված զուտ գեղագիտական նկատառումներով նպատակահարմար է, որ այդ ճանապարհները ոչ թե ասֆալտապատվեն, այլ ուղղակի սալարկվեն: Եկանք այն եզրակացության, որ կան համայնքներ, որոնք իրենց սեփական ռեսուրսն ունեն, օրինակ՝ քարի հանք կա իրենց տարածքում, և կարող են նաև ուղղակի համայնքի միջոցներով փողոցների սալարկումն իրականացնել»,- ասաց վարչապետը՝ հավելելով, որ անհրաժեշտություն առաջացավ ընթացակարգը պարզեցնել:
