Միգրանտների զանգվածային հոսքը դեպի իսպանական Սեուտա «հարձակում է և Իսպանիայի տարածքային ամբողջականության խախտում»,- հայտարարել է պետության վարչապետ Պեդրո Սանչեսը քաղաք ժամանելուց հետո կայացած մամուլի ասուլիսում:
«Տեղի ունեցածն արժանի է մեր ամենավճռական դատապարտման ու պարսավանքին»,- ասել է Սանչեսն ու հավելել, որ կառավարությունը գործի կդնի պետական բոլոր ռեսուրսները՝ քաղաքացիների անվտանգությունն ապահովելու համար։
Հուլիսի սկզբին Իսպանիայի Գերագույն դատարանը որոշել էր, որ Սեուտա հասնելու փորձի ժամանակ ծովում բռնված միգրանտները չեն կարող վերադարձվել հայրենիք պարզեցված ընթացակարգով: Իսպանիայի կառավարությունը պնդում է, որ «մաֆիայի և հանցավոր կազմակերպությունների կողմից այս որոշման չարաշահումը» հանգեցրել է միգրացիայի աճի:
Ավելի վաղ հայտնի էր դարձել, որ մինչև 60 հազար անօրինական ներգաղթյալ է ներխուժել Իսպանիայի աֆրիկյան Սեուտա անկլավ: Փրկարարները ջրից դուրս են բերել առնվազն 34 մարմին։ Օրվա ընթացքում Իսպանիայի և Մարոկկոյի կառավարությունների համատեղ ջանքերով հայրենիք է վերադարձել անօրինական ներգաղթյալների մոտ կեսը:
Սեուտան և Մելիլյան Մարոկկոյից հյուսիս գտնվող իսպանական ինքնավար քաղաքներ են և Աֆրիկայի հետ Եվրամիության միակ ցամաքային սահմանը։ Մոտ 85000-ական բնակիչ ունեցող երկու քաղաքում էլ պարբերաբար գրանցվում է Եվրոպա հասնել ցանկացող միգրանտների սահմանահատման փորձերի աճ, սակայն տեղի ունեցած ներհոսքի մասշտաբն աննախադեպ է եղել։
Սեուտայում տեղի ունեցածի կապակցությամբ մտահոգություն են հայտնել Ֆինլանդիան, Իտալիան, Եվրահանձնաժողովի նախագահ Ուրսուլա ֆոն դեր Լայենը:
«Մենք չենք կարող թույլ տալ որևէ մեկին մուտք գործել մեր Միություն՝ առանց մեր կանոնները հարգելու։ Վտանգավոր սահմանային անցումները պետք է անհապաղ դադարեցվեն։ Մաքսանենգների ցանցերը պետք է քանդվեն։ Եվ վերադարձը պետք է արագ իրականացվի, ինչպես թույլատրվում է մեր կանոններով»,- ասել է Ֆոն դեր Լայենը:
Իսպանիայի կառավարությանը քննադատության է արժանացրել նաև ԱՄՆ պետքարտուղարությունը: «Այս անընդունելի միջադեպը Իսպանիայի կառավարության՝ Եվրոպա զանգվածային անօրինական միգրացիան թույլատրելու և դրան նպաստելու միտումնավոր ջանքերի ուղղակի հետևանքն է»,- նշված է Մարկո Ռուբիոյի ղեկավարած գերատեսչության հայտարարության մեջ:
Մանրամասները՝ տեսաշարում։
