Վարչապետ Նիկոլ Փաշինյանը Ֆեյսբուքի ուղիղ եթերում նշեց, որ բժշկական օգնության կարիք ունեցող մարդկանց պատշաճ բուժօգնություն ապահովելու համար պետք է նվազեցնենք մեր կողմից ուրիշներին վարակելու հավանականությունը:
«Այսօր երկրում 20 հազար, 25 հազար, հնարավոր է՝ նույնիսկ 30 հազար ասիմպտոմ դեպքեր կան»,- նշեց վարչապետը՝ հավելելով, որ, օրինակ՝ ինքն էլ է ասիմպտոմ հիվանդ և արդեն մեկ շաբաթից ավելի է՝ աշխատանքի չի գնում, տան դռնից որևէ այլ մարդու ներս չեն թողնում, որ նրանցից որևէ մեկը չվարակվի։
Վարչապետի խոսքով՝ որքան շատ է վարակվածների թիվը, այնքան շատ է ծանր և ծայրահեղ ծանր հիվանդների թիվը, հետևաբար նաև՝ մահացածների թիվը։
«Պատշաճ բուժօգնության պարագայում ծանր և առանձնապես ծանր վիճակում հայտնվում են հիվանդների 5 տոկոսը, իսկ մահացությունը 1-2 տոկոս է։ Եթե 10 հազարի 5 տոկոսը 200 հոգի է, կամ 1-2 տոկոսը 120 հոգի է, 100 հազարի 5 տոկոսը 5 հազար հոգի է, և, հետևաբար, մեր առողջապահության համակարգը 5 հազար հոգու ծանր վիճակում չի կարող սպասարկել»,- նշեց վարչապետը։
Փաշինյանը հավելեց, որ եթե ծանր դեպքերը շատանան, ստիպված կլինեն վերադառնալ խիստ սահմանափակումների։
«Եթե ծանր դեպքերը շատանան այնքան, որ հիվանդանոցներում տեղ չլինի, ստիպված ենք լինելու վերադառնալ խիստ սահմանափակումների, կյանքը կանգ է առնելու իր բոլոր տնտեսական և սոցիալական հետևանքներով»,- նշեց Փաշինյանը՝ հավելելով, որ շատ երկրներ գնացել են այդ ճանապարհով, և թվերը խիստ սահմանափակումների արդյունքում այլ են եղել, շատ ավելի քիչ, բայց կարևոր է այն, որ եթե անգամ վարակման թվերը Հայաստանում հասցվեն զրոյի, միևնույն է՝ վարակն աշխարհում շարունակելու է գոյություն ունենալ, և խիստ սահմանափակումներից հետո, երբ երկիրը սկսի նորից բացվել, վարակը կրկին կսկսի տարածվել, և մենք կհայտնվենք նոր խիստ սահմանափակումներ հայտարարելու խնդրի առաջ։
Վարչապետը նշեց, որ դա ավելի է բարդացնում իրավիճակը, քանի որ մի կողմից կորոնավիրուսի հարցը չի լուծվում, մյուս կողմից էլ՝ պետությունն է տնտեսական ու սոցիալական կոլապսի ենթարկվում։
«Հետևաբար, կորոնավիրուսի հետ կապված խնդրի լավագույն լուծումն այն է, որ մաքսիմալ շատ մարդիկ ինձ նման ասիմպտոմ կամ շատ տանելի իրավիճակով վարակվեն և լավանան, կամ եթե ստացվի էնպես, որ ասիմպտոմ վարակված և լավացած դեպքերը շատ լինեն, դա է հարցի լուծումը»,- նշեց վարչապետը։
Փաշինյանը հավելեց, որ եթե պետության ուսերին կուտակված բեռը բաժանվի 3 միլիոն մասի, ու ամեն մարդ իր փոքրիկ բեռը կրի, ապա կօգնի պետությանը հաղթահարելու այն։ Վարչապետը պատասխանեց քաղաքացիների հարցերին, թե ինչու են մեքենայում դիմակ կրում նույն ընտանիքի անդամները։
«Առաջինը՝ որ ձեր տեսքով կողքինների զգոնությունը բարձրացնեք, երկրորդը՝ որ թույլ չտաք, որ տարբեր ընտանիքի անդամներ հանդիսացող անձինք, օգտվելով նույն ընտանիքի անդամի իրավունքից, մեքենայի մեջ դիմակ չկրեն և դառնան կորոնավիրուսի տարածման շատ կոնկրետ աղբյուր։ Երրորդը՝ ի վերջո դուք ձեր մեքենան ինչ-որ ժամանակում տանում եք լվանալու, սպասարկման, դուք չգիտեք՝ ով և ինչպես է լվանում»,- նշեց վարչապետը՝ հավելելով, որ դա ավելորդ երաշխիք է վարակի չտարածման։
Բաց տարածքում դիմակ կրելու մասին հարցին առաջին պատասխանը ուրիշներին օրինակ ծառայելն ու ահազանգելն է՝ նշեց վարչապետը։
«Երկրորդը՝ որ քայլում ենք, որ դիմացից, կողքից մարդիկ են անցնում, և այդ ընթացքում տեղի են ունենում հաղորդակցություն և շփում, դա երաշխիք է, որ չեք վարակվի և ինքներդ էլ չեք վարակի։ Ոչ թե 100 տոկոս է, այլ 95, բայց 95 տոկոսը շատ բարձր ցուցանիշ է»,- նշեց վարչապետը։
Ամփոփելով՝ վարչապետն ասաց, որ խնդիրը հիվանդությունները զրոյացնելն ու դրանք բացառելը չէ, խնդիրը հիվանդությունները մեր առողջապահական համակարգի հնարավորություններին համապատասխան դարձնելն է։ Վարչապետը կոչ արեց հակահամաճարակաբանական շարժում սկսել, քայլ անել, կրել դիմակ, ախտահանել ձեռքերը, սոցիալական հեռավորություն պահպանել։