Հայաստանի մարզերից ստացված տվյալների համաձայն՝ հեռավար կրթություն բոլորին հասանելի դարձնելու համար մոտ 21 հազար սարքավորման պահանջարկ կա: Այդ նպատակով ՀՀ ԿԳՄՍ նախարարությունը դիմում է կազմակերպություններին և անհատներին` համագործակցելու և աջակցություն ցուցաբերելու նպատակով:
Առաջիկա կիրակի օրվանից սկսած Երևանի Խ. Դաշտենցի անվան թիվ 114 ավագ դպրոցում (հասցե` Երևան, Հանրապետության փող., 73 շենք) կգործի հատուկ կետ, որտեղ կընդունվեն համակարգիչներ և այլ սարքավորումներ, եթե դրանք կբավարարեն ԿՏԱԿ-ի սահմանած նվազագույն տեխնիկական չափանիշներին:
Դրանք են`
Պրոցեսոր (CPU)՝ Intel DualCore processor
Օպերատիվ հիշողություն (RAM)՝ 2 GB DDR3
Կոշտ սկավառակ (HDD)՝ 500 GB
Գրաֆիկական քարդ (Video adapter)՝ ներկառուցված (Integrated) HD Graphics
Էկրան (Display)՝ 18.5 դյույմ (Սեղան՝ համակարգչի դեպքում) և 14 դյույմ (դյուրակիր համակարգչի դեպքում)
Ցանցային դիմերես (Networking)՝ Gigabit (10/100/1000) LAN, WLAN: 802.11a/b/g/n (դյուրակիր համակարգիչների դեպքում)
USB ստեղնաշար (keyboard) և USB օպտիկական մկնիկ (optical Mouse)
Պլանշետներ կամ սմարթ հեռախոսներ` Android կամ IOS
Պրոցեսոր (CPU)՝ երկու կամ չորս միջուկային (Dual-Core, Quad-Core)
Օպերատիվ հիշողություն (RAM)՝ 2 GB, Էկրանի չափսը >= 8 դյույմ, 3G, Wifi:
ՀՀ կրթության, գիտության, մշակույթի և սպորտի նախարար Արայիկ Հարությունյանն այսօր հեռավար աշխատանքային քննարկում է անցկացրել ՏՏ ոլորտի ընկերությունների ներկայացուցիչների հետ: Նախարարն ընդգծել է, որ խորհրդակցության նպատակը հեռավար կրթության կազմակերպման արդյունավետության բարձրացումն է, և այս հարցում նախարարությունն ակնկալում է ոլորտի ընկերությունների աջակցությունն ու համագործակցությունը:
Նախարարը նշել է, որ երկրում հայտարարված արտակարգ դրությամբ պայմանավորված՝ ուսումնական գործընթացը կազմակերպվում է հեռավար եղանակով: Հեռավար կրթության համակարգում այս պահին ընդգրկված է հանրապետության դպրոցների և աշակերտների շուրջ 80 տոկոսը: Նախարարության նախաձեռնությամբ Կրթական տեխնոլոգիաների ազգային կենտրոնը արտակարգ դրության հայտարարումից անմիջապես հետո գործարկել է հեռավար կրթության համալիր էջը` heravar.armedu.am, որտեղ համախմբված են կրթական մի շարք ռեսուրսներ: Այս ընթացքում նախարարությունն արդյունավետ համագործակցել է նաև մասնավոր և պետական մի շարք ընկերությունների հետ: Մասնավորապես, «Յուքոմ» և «Ռոստելեկոմ» ընկերությունները թողարկել են կրթական ալիքներ, որոնք հեռարձակում են ԿԳՄՍՆ-ի առաջարկած և ուսուցիչների ու ԿՏԱԿ-ի համատեղ ջանքերով ստեղծված կրթական բովանդակությունը՝ տեսադասերը, թվայնացված նյութերը, «Բիլայն» ընկերությունը թողարկել է BeeTV բջջային հավելվածը, որը հեշտացնում է աշակերտների հեռավար ուսուցման գործընթացը։ Հանրային հեռուստատեսությամբ ամեն օր հեռարձակվում են բաց դասեր, դասացուցակը նախապես հրապարակվում է նախարարության ՖԲ պաշտոնական էջում: «Սկսել է աշխատել ազգ-կրթություն համակարգը, երբ ամբողջ օրվա ընթացքում ողջ ընտանիքով` միասնական ու համախմբված, բոլորս դասերով ենք զբաղված»,- նշել է նախարարը` ավելացնելով, որ հեռավար կրթության նկատմամբ հետաքրքրությունը գնալով մեծանում է և՛ ուսուցիչների, և՛ աշակերտների, և՛ ծնողների շրջանում: Հեռավար կրթության արդյունավետ կազմակերպման հետ կապված, սկայան, կան որոշ տեխնիկական խնդիրներ, մասնավորապես, առանձին դեպքերում աշակերտներն ունեն ինտերնետ կապի և անհրաժեշտ սարքավորումների խնդիր:
Նախարարը կարևոր է համարել նաև հեռախոսային հավելվածների ստեղծումը, որոնք թույլ կտան աշխատել կապի թույլ թրաֆիքով և կապահովեն հեռավար կրթության ավելի մեծ հասանելիություն:
Հեռավար քննարկման ընթացքում նախարարի տեղակալ Ժաննա Անդրեասյանը կարևորել է հեռավար կրթության ապահովումը կրթության առանձնահատուկ կարիքով երեխաների համար, ինչը համընդհանուր ներառական կրթության պահանջ է: Նախարարի տեղակալի խոսքով՝ խրախուսելի է հատկապես ներառականություն ապահովող բջջային հավելվածների թողարկումը:
ԿՏԱԿ տնօրեն Արտակ Պողոսյանը ներկայացրել է սարքավորումների համար նախանշված հիմնական նվազագույն պահանջները և նշել, որ արքավորումները կհավաքվեն, ըստ անհրաժեշտության կնորոգվեն և կտրամադրվեն դպրոցականներին ու ուսուցիչներին:
Քննարկմանը մասնակից ընկերություները պատրաստակամություն են հայտնել համագործակցել և աջակցել հեռավար կրթության համակարգի կայացման ԿԳՄՍՆ նախաձեռնությանը:
Ամփոփելով խորհրդակցությունը` նախարար Արայիկ Հարությունյանը նշել է, որ հեռավար կրթության համընդհանուր փորձարկումը կատարված է, և սա արդեն փաստ է: Հեռավար կրթության համակարգի ներդրման առաջին արդյունքները հուսադրող են ու դրական:
