Ամերիկյան Boeing կորպորացիան աշխատանքից ազատեց իր առաջնորդ Դենիս Մյուլլենբուրգին: BBC-ի փոխանցմամբ՝ նրա տեղը կզբաղեցնի ընկերության տնօրենների խորհրդի այժմյան նախագահ Դեյվիդ Քելհունը:
Boeing-ը ծանր իրավիճակում էր հայտնվել 737 Max շարքի ինքնաթիռի երկու վթարի պատճառով: Եվ չնայած՝ վերոնշյալ ինքնաթիռների թռիչքները դադարեցված են, պատասխանատվության խնդիր է մեջտեղ բերվել:
«Տնօրենների խորհուրդը որոշեց, որ ընկերության առաջընթացի հետ կապված վստահությունը վերականգնելու համար ղեկավարության փոփոխություն է անհրաժեշտ, քանի որ աշխատում ենք կարգավորող մարմինների, հաճախորդների և այլ շահագրգիռ կողմերի հետ հարաբերությունների բարելավման ուղղությամբ»,- ասվում է Boeing-ի պաշտոնական հաղորդագրության մեջ:
Նշվում է, որ 2020-ի հունվարից կդադարեցվի 737 Max ինքնաթիռի սերիական արտադրությունը, իսկ մինչ այդ ուժի մեջ կմնա ԱՄՆ Դաշնային ավիացիոն վարչության (FAA) պահանջը, ըստ որի՝ այս ինքնաթիռներն այլևս որևէ թռիչք չեն անի:
Հիշեցնենք, որ հարցի առնչությամբ ԱՄՆ Կոնգրեսը լսումներ անցկացրեց՝ հայտարարելով, որ ավիացիոն իշխանությունները տեղյակ են եղել 2018-ի հոկտեմբերին՝ Ինդոնեզիայում տեղի ունեցած վթարի կրկնման վտանգի մասին: Այսպսիով, կորպորացիան այլ ելք չուներ, քան ղեկավար կազմում փոփոխություններ անելը:
