Ռուսաստանը պահանջել է, որ Ճապոնիան Կյուշու կղզուց դուրս բերի ամերիկյան Typhon ցամաքային միջին հեռահարության հրթիռային համակարգերը։ Այս մասին հայտարարել է Ռուսաստանի արտաքին գործերի նախարարության խոսնակ Մարիա Զախարովան։
Ռուսաստանի դիվանագիտական գերատեսչությունը բողոքի նոտա է հղել Ճապոնիային՝ հայտարարելով, որ «կտրականապես մերժում է նման քայլերը» և պահանջել է այդ զենքերն անհապաղ դուրս բերել տարածքից։
ՌԴ ԱԳՆ-ում ընդգծել են, որ «ԱՄՆ-ի հրթիռային համակարգերի հայտնվելը Ռուսաստանի հեռավորարևելյան սահմանների անմիջական հարևանությամբ ուղղակի սպառնալիք է երկրի ազգային անվտանգության համար և հրահրում է լարվածության աճ ամբողջ Ասիա-խաղաղօվկիանոսյան տարածաշրջանում»: Մոսկվան զգուշացրել է, որ «իրավունք է վերապահում ձեռնարկել պատասխան ռազմատեխնիկական միջոցներ՝ առաջացող ռիսկերը չեզոքացնելու համար»։
