Ուկրաինայի զինված ուժերի գլխավոր հրամանատար Ալեքսանդր Սիրսկին կարծում է, որ Ռուսաստանն Ուկրաինայի տարածքի վրա կհարձակվի ոչ թե Բելառուսից, այլ Բրյանսկի մարզից՝ Չեռնիգովի վրա: Նա այս մասին հայտարարել է TSN-ի հետ հարցազրույցում:
Ուկրաինայի զինված ուժերի գլխավոր հրամանատարի խոսքով՝ ռուսական կողմը ծրագրել է առաջ շարժվել Չեռնիգովի մարզի խորքերը և ուկրաինական զորքերի մի մասի ուշադրությունը շեղել այդ ուղղությամբ՝ «ռազմաճակատը ձգելու և մեզ պահուստներից զրկելու» նպատակով: «Սա իրատեսական տարբերակ է, և մենք իհարկե պատրաստվում ենք դրան»,- ասել է Սիրսկին:
Նա նշել է, որ Ռուսաստանի ռազմական հրամանատարությունը մշակում է նաև Բելառուսից Կիևի վրա երկրորդ հարձակման սցենարը, ուստի Ուկրաինայի զինված ուժերը «քննարկում են նաև այս տարբերակը»։ «Մենք գիտենք, որ Պուտինը հանձնարարել է Ռուսաստանի գլխավոր շտաբին հաշվարկել հարձակողական գործողություն իրականացնելու տարբերակները»,- հավելել է Ուկրաինայի ԶՈՒ գլխավոր հրամանատարը։
Չնայած ուկրաինական կողմը կարծում է, որ Բելառուսի ղեկավարությունը չի համաձայնի երկրի տարածքը տրամադրել ՌԴ-ին՝ հարձակման համար, այնուամենայնիվ, Սիրսկին վստահեցրել է, որ Ուկրաինան պատրաստ է կանխել ռուսական հարձակումն այդ ուղղությամբ:
