Խորհրդարանը քննարկում է Ազգային ժողովի պետական-իրավական հարցերի մշտական հանձնաժողովի նախագահի ընտրության հարցը:
ԱԺ կանոնակարգ սահմանադրական օրենքի 138-րդ հոդվածի 2-րդ և 3-րդ հոդվածների համաձայն՝ «Քաղաքացիական պայմանագիր» խմբակցությունը Ազգային ժողովի պետական-իրավական հարցերի մշտական հանձնաժողովի նախագահի թափուր պաշտոնում առաջադրել է Արուսյակ Ջուլհակյանի թեկնածությունը:
Թեկնածուին ներկայացրեց ՔՊ խմբակցության քարտուղար Արթուր Հովհաննիսյանը:
Ծնվել է 1983 թ. հունվարի 21-ին Երևանում:
2003 թ. ավարտել է Հայաստանի պետական ճարտարագիտական համալսարանի սոցիալ-քաղաքական առարկաների և ընդհանուր տնտեսագիտության ֆակուլտետը: 2005 թ.՝ ՀՊՃՀ նույն ֆակուլտետի մագիստրատուրան: Հանրային կառավարման մագիստրոս է: 2010 թ. ավարտել է Վարշավայի համալսարանի (Լեհաստան) իրավաբանական ֆակուլտետը՝ «մարդու իրավունքներ» մասնագիտացմամբ։
2005-2013 թթ. եղել է ՀՊՃՀ, 2007-2009 թթ.՝ Տնտեսագիտության և իրավագիտության (USEL) համալսարանի դասախոս:
2011-2014 թթ. աշխատել է նախ որպես Խոսքի ազատության պաշտպանության կոմիտեի ծրագրի օգնական, ապա՝ իրավական փորձագետ: 2014-2018 թթ. աշխատել է «Իրավունքի Եվրոպա միավորում» իրավապաշտպան ՀԿ մի շարք ծրագրերում:
2015-2018 թթ. եղել է «Քաղաքացի դիտորդ» նախաձեռնության իրավաբանական թիմի անդամ: 2015-2018 թթ.՝ «Թրանսփարենսի Ինթերնեշնլ հակակոռուպցիոն կենտրոն» ՀԿ մի շարք ծրագրերի իրավաբան։
Համագործակցել է Լեհաստանի «Մարդու իրավունքների հելսինկյան հիմնադրամի» հետ (2010 թ. մարտ-հունիս): Մասնակցել է Վրաստանի խորհրդարանական ընտրությունների դիտարկմանը (2016 թ., «Ժողովրդավարական ընտրությունների եվրոպական հարթակ» (European Platform for Democratic Elections) դիտորդական կազմակերպությունների միջազգային կոալիցիա), «ԱՄՆ ընտրական գործընթացներ» ծրագրին (International Visitors Leadership Program) (2018 թ. հոկտեմբեր-նոյեմբեր, ԱՄՆ):
2018 թ.՝ «Իրավունքի զարգացման և պաշտպանության» հիմնադրամի համահիմնադիր:
Համահեղինակ է ընտրական իրավունքի ոլորտի երկու ձեռնարկի, հեղինակ՝ մի շարք հոդվածների:
2019-2021 թթ. ԱԺ պատգամավոր է («Իմ քայլը» կուսակցությունների դաշինք, համապետական ընտրական ցուցակ): 2022-ի հոկտեմբերից ԱԺ պետական-իրավական հարցերի մշտական հանձնաժողովի փոխնախագահն է:
Սահմանադրական բարեփոխումների խորհրդի անդամ է, Կոռուպցիայի կանխարգելման հանձնաժողովի անդամի թափուր պաշտոնում թեկնածուի ընտրության մրցույթի խորհրդի անդամ:
Ակտիվորեն ներգրավված է խորհրդարանական դիվանագիտության աշխատանքներում, ԵԽԽՎ անդամ է, ԵԽԽՎ մարդու իրավունքների ենթահանձնաժողովի փոխնախագահ:
Հիշեցնենք, որ ՀՀ նախագահը Սահմանադրական դատարանի դատավորի պաշտոնի համար
առաջարկել էր Վլադիմիր Վարդանյանի թեկնածությունը:
Վլադիմիր Վարդանյանն ընտրվել է ՀՀ Սահմանադրական դատարանի դատավոր:
Ավելի վաղ Վլադիմիր Վարդանյանը
տեղեկացրել էր, որ առաջնորդվելով ՀՀ օրենսդրությամբ՝ դադարեցրել է անդամակցությունը «Քաղաքացիական պայմանագիր» կուսակցությանը, իսկ Սահմանադրական դատարանի դատավորի պաշտոնում ընտրվելու դեպքում դադարեցնելու է նաև խորհրդարանական գործունեությունը:
