ԱՄՆ նախագահ Դոնալդ Թրամփը կամայականորեն է ուրվագծել այն զորքերի թիվը, որոնք Պենտագոնը մտադիր է դուրս բերել Գերմանիայից, հաղորդում է Euronews-ը՝ հղում անելով ամերիկյան աղբյուրներին։
«5000 թիվն ընդամենը նախնական գնահատական է, Թրամփն այդ կերպ ցանկացել է ցուցադրական ժեստ անել Գերմանիայի կանցլեր Ֆրիդրիխ Մերցի հետ իր դիմակայության շրջանակներում»,- հեռուստաալիքին ասել է անանուն ամերիկացի պաշտոնյան։
Մեկ այլ աղբյուր նշել է, որ ԱՄՆ նախագահը զորքերի դուրսբերման վերաբերյալ որևէ մանրամասն չի հայտնել, քանի որ «պարզապես հորինել է այդ թիվը»։
Լրատվականը պնդել է, որ Վաշինգտոնն իր դաշնակիցներին չի զգուշացրել զորքերի դուրսբերման մասին, և նրա հայտարարությունը անակնկալի է բերել ՆԱՏՕ-ի հրամանատարությանը։ Պարզ չէ, թե որտեղից և ինչպես է դուրս բերվելու զորակազմը, և ինչպես է դա ազդելու դաշինքի ընդհանուր մարտական պատրաստվածության վրա։ Զորքերի դուրսբերման մասին հայտարարությունից հետո Սպիտակ տունը հայտարարել է, որ Գերմանիայից կհեռանա «ավելի շատ» զինվորական, քան նշված 5000-ը, սակայն ԱՄՆ վարչակազմը կոնկրետ թիվ չի նշել։
