Վարչապետ Նիկոլ Փաշինյանը ծանոթացել է Արագածոտնի և Շիրակի մարզերում իրականացված ծրագրերին:
Նիկոլ Փաշինյանի այցը մեկնարկել է Արագածոտնի մարզից: Երկրի ղեկավարի առաջին կանգառը եղել է Աշտարակ համայնքի Ուշի բնակավայրի մանկապարտեզում, որտեղ իրականացվել են վերակառուցման աշխատանքներ: Ծրագրի ընդհանուր արժեքը կազմել է 371 մլն 137 հազար դրամ: Վերակառուցված մանկապարտեզը նախատեսված է 100 երեխայի համար։
Ապարան համայնքում վարչապետն այցելել է Երնջատափ բնակավայրի Եղիշե Չարենցի անվան միջնակարգ դպրոց, որտեղ իրականացվել են վերանորոգման աշխատանքներ: Ծրագրի ընդհանուր արժեքը կազմել է 248 մլն 286 հազար դրամ: Վերանորոգվել է դպրոցի մասնաշենքը և իրականացվել է տարածքի բարեկարգում։
Ալագյազ համայնքում Նիկոլ Փաշինյանն այցելել է Ալագյազ բնակավայրի մանկապարտեզ, ծանոթացել նախակրթարանի նորակառույց շենքի շինարարական աշխատանքներին: Ծրագրի ընդհանուր արժեքը կազմել է 912 մլն 767 հազար դրամ, որից համայնքի մասնաբաժինը կազմել է 11 մլն 559 հազար դրամ, մյուս մասը հատկացրել է Կառավարությունը։ Ծրագրի իրականացման արդյունքում կառուցվել է մեկհարկանի 1290 քմ ընդհանուր մակերեսով 144 տեղ հզորությամբ մսուր-մանկապարտեզի նոր շենք, բարեկարգվել է բակը, տեղադրվել է 21 կվտ հզորությամբ ֆոտովոլտային կայան։
Աշտարակ համայնքում վարչապետին ներկայացվել են Տ-1-25,/Մ-3/ (Աշտարակ) – Փարպի - Ղազարավան տեղական նշանակության ավտոճանապարհի 11,5 կմ հատվածի հիմնանորոգման աշխատանքները: Ծրագրի ընդհանուր արժեքը կազմել է 1 մլրդ 716 մլն դրամ:
Աշտարակ համայնքում երկրի ղեկավարն այցելել է նաև Արագածոտն բնակավայրում մասնավոր հատվածի կողմից հիմնված 10 հա ինտենսիվ այգի, որտեղ աճեցվում է դեղձ և կեռաս: Այգու հիմնումն իրականացվել է «ՀՀ-ում ինտենսիվ այգեգործության զարգացման, արդիական տեխնոլոգիաների ներդրման և ոչ ավանդական բարձրարժեք մշակաբույսերի արտադրության խթանման պետական աջակցության 2021-2026 թվականների» ծրագրի աջակցությամբ: Պետության կողմից մասնավորին փոխհատուցվել է 120 մլն 417 հազար դրամ: ՀՀ-ում գյուղատնտեսական տեխնիկայի լիզինգի աջակցության ծրագրի շրջանակում ձեռք է բերվել շուրջ 324 մլն 908 հազար դրամ ընդհանուր արժեքով գյուղատնտեսական տեխնիկա: Սուբսիդավորված գումարի չափը կազմել է 94 մլն 757 հազար դրամ:
Երկրի ղեկավարի հաջորդ կանգառը եղել է Թալին համայնքում, որտեղ կառուցվել է Արագածավան բնակավայրի թիվ 1 միջնակարգ դպրոցը: Ծրագրի ընդհանուր արժեքը կազմել է 2 մլրդ 462 մլն 750 հազար դրամ: ՀՀ Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ» ծրագրի շրջանակում իրականացված աշխատանքների արդյունքում Թալին համայնքի Արագածավան բնակավայրն ունի նորակառույց դպրոց՝ նախատեսված 432 աշակերտի համար։
Դպրոցում վարչապետը հանդես է եկել ողջույնի խոսքով, շնորհավորել բոլորին կրթական հաստատության կառուցման առիթով, արձանագրել, որ դպրոցներ այցելությունները դառնում են էներգիայի վերականգնման ուղղություն, որովհետև շինարարության և ընդհանուր աշխատանքի որակի հետ կապված անընդհատ առաջընթաց է նկատվում: «Այս մասով ուզում եմ շնորհակալություն հայտնել մեր բոլոր գործընկերներին՝ փոխվարչապետի գլխավորությամբ, ովքեր իրականացնում են «300 դպրոց, 500 մանկապարտեզ» նախագիծը, որը Հայաստանի համար հեղափոխական նշանակություն ունեցող նախագիծ է»,- ասել է Նիկոլ Փաշինյանը և ընդգծել, որ սա մեգա նախագիծ է և այն լինելու է շարունակական:
Իր խոսքում երկրի ղեկավարը նշել է, որ ինչպես բոլոր նման առիթներով, ցանկանում է կրկին ուշադրություն հրավիրել այն հանգամանքի վրա, թե ինչպես են ստեղծվում այս դպրոցները, մանկապարտեզները։ «Ես նորից ուզում եմ վերադառնալ նույն թեմային, ինչի մասին գրեթե ամենուր վերջերս խոսում ենք և ուզում եմ շնորհակալություն հայտնել Հայաստանում աշխատող, հարկեր վճարող, արդյունք ստեղծող և օրենքով սահմանված հարկերը վճարող բոլոր տնտեսվարողներին: Ուզում եմ շնորհակալություն հայտնել բոլոր այն քաղաքացիներին, ովքեր գնումներ իրականացնելիս անպայման չեն մոռանում իրենց հետ վերցնել հսկիչ դրամարկղային կտրոն: Շատ կարևոր է, որ այս ընկալումն այսօրվանից մեր երեխաների գիտակցության մեջ ամրապնդվի»,- նշել է Նիկոլ Փաշինյանը:
Վարչապետն իր խոսքում ընդգծել է, որ չնայած երեխաների կրթության համար ապահովվում է ֆիզիկական անհրաժեշտ պայմաններ, նաև կարևոր է որակյալ կրթության ապահովումը և այս համատեքստում քաջալերել ուսուցիչներին, որ նրանք անպայման անցնեն ատեստավորում: Նիկոլ Փաշինյանը նաև նշել է, որ հաջորդիվ մշակվել է բանաձև, որով արդեն ատեստավորված ուսուցիչները նոր ատեստավորման հնարավորություն կունենան և նրանց աշխատավարձը շատ ավելի բարձր կլինի. «Մենք շարունակաբար քաջալերում ենք մեր սիրելի ուսուցիչներին, որ գնան և վերցնեն, պարզեն իրենք ձեռքը և վերցնեն Կառավարության կողմից բարձրացված աշխատավարձերը»։
Ամփոփելով խոսքը՝ երկրի ղեկավարը ևս մեկ անգամ ընդգծել է որակյալ կրթության կարևորությունը և նշել. «Հետևաբար՝ «Պետությունը պետք է ուժեղացնի մարդուն, մարդը պետք է ուժեղացնի պետությանը» բանաձևն ամբողջությամբ կենտրոնացած է այս դպրոցում և նմանատիպ դպրոցներում և ընդհանրապես՝ մեր կրթական համակարգում»։
Հաջորդիվ՝ վարչապետն այցելել է Շիրակի մարզ: Նիկոլ Փաշինյանի առաջին կանգառը եղել է Արթիկ համայնքի 9 հա ելակի և 14 հա հատապտղի ջերմատանը։ Այն ևս մասնավորի կողմից հիմնվել է Հայաստանի Հանրապետությունում ինտենսիվ այգեգործության զարգացման պետական աջակցության ծրագրի շրջանակում: Ագրոպարենային ոլորտի սարքավորումների լիզինգի աջակցության ծրագրի շրջանակում ձեռք է բերվել 20 մլն 500 հազար դրամ ընդհանուր արժեքով 2 սարքավորում՝ ինքնագնաց ավտոմատ սրսկիչ, ինքնագնաց ջերմոցային պլատֆորմ բույսերի ուլտրամանուշակագույն ճառագայթման միջոցով բույսերի պաշտպանության համար։ Կառավարության կողմից սուբսիդավորված գումարի չափը կազմել է 600 հազար դրամ: Ներդրումային ծրագրի շրջանակում ջերմատան կառուցման նպատակով կիրառվել է ներմուծվող տեխնոլոգիական սարքավորումների նկատմամբ ներմուծման մաքսատուրքից ազատելու արտոնությունը։ Ծրագրի վարկային բաղադրիչով ներգրավվել է 25 մլն դրամ վարկային միջոց։ Սուբսիդավորված գումարի չափը կազմել է շուրջ 16 մլն 742 հազար դրամ։
Հաջորդիվ երկրի ղեկավարն այցելել է Ախուրյան բնակավայրի Երիտասարդական կենտրոն, որտեղ դրամաշնորհային ծրագրի շրջանակում իրականացված աշխատանքների ընդհանուր արժեքը կազմել է շուրջ 26 մլն դրամ: Պետական բյուջեից հատկացվել է արժեքի 65,2 %՝ 16 մլն 947 հազար դրամ: Կենտրոնն ընդգրկված է եղել ՀՀ Կառավարության 2021-2026թթ. գործունեության միջոցառումների ծրագրով մինչև 2026թ. ավարտը նախատեսված 25 երիտասարդական կենտրոնների ցանկում: Ծրագրի իրականացման արդյունքում վերանորոգվել է համայնքի կողմից հատկացված շինության 230 քմ մակերեսով տարածք, կահավորվել՝ գույքով և տեխնիկայով: Տարեկան կտրվածքով կենտրոնի ծառայություններից օգտվել են առնվազն 246 երիտասարդ՝ դրամաշնորհային հայտով պարտավորված ծրագրային ուղղություններով։ 2026թ. հունվարի 1-ից սկսած ապրիլի 15-ի դրությամբ գրանցվել են 2284 այցելուներ:
Նիկոլ Փաշինյանն այցելել է նաև Գյումրի համայնքի թիվ 41 հիմնական դպրոց, որտեղ իրականացվել են վերանորոգման աշխատանքներ: Ծրագրի ընդհանուր արժեքը կազմել է 543 մլն 672 հազար դրամ: ՀՀ Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ» ծրագրի շրջանակում իրականացված աշխատանքների արդյունքում Գյումրի համայնքն ունի վերանորոգված դպրոց՝ նախատեսված 710 աշակերտի համար։
Վարչապետի վերջին կանգառը եղել է Ախուրյան համայնքի Քեթի բնակավայրի նորակառույց կրթահամալիրում: Նիկոլ Փաշինյանը շրջել է կրթահամալիրում, ծանոթացել իրականացված աշխատանքներին և ստեղծված պայմաններին: Ծրագրի ընդհանուր արժեքը կազմել է 1 մլրդ 557 մլն 482 հազար դրամ։ Կրթահամալիրը նախատեսված է 140 աշակերտի, իսկ նախակրթարանը՝ 40 երեխայի համար։
Կրթահամալիրում Նիկոլ Փաշինյանը հանդես է եկել ելույթով, շնորհավորել բոլորին բացման առիթով: Երկրի ղեկավարը նշել է, որ այս դպրոցն այսօրինակ երկրորդ կրթահամալիրն է, որ բացվում է հանրապետությունում, որը նախատեսված է ավելի քան մեկ բնակավայրի աշակերտների համար, կոնկրետ այս դեպքում՝ Քեթի, Փոքրաշեն և Հովունի բնակավայրերի աշակերտների համար: Այս համատեքստում, վարչապետն անդրադարձել է այն քննարկումներին, որ նման դպրոցների բացումը նպաստում է գյուղերի դատարկմանը: Հակադարձելով՝ Նիկոլ Փաշինյանը նշել է, որ հենց գյուղերի դատարկման խնդիրը լուծելուն է ուղղված նման կրթահամալիրների բացումը, քանի որ դրանք ապահովում են երեխաների՝ պատշաճ ֆիզիկական միջավայրում ժամանակակից կրթություն ստանալու հնարավորություն. «Կարևոր է, որ դպրոցում լինի պատշաճ միջավայր, նորմալ ճաշարան, նորմալ բեմ, դպրոցում պետք է լինեն լաբորատորիաներ, լաբորատոր սարքեր: Կրթության համար ամենակարևորը կրթական միջավայրն է: Սա մեր մոտեցումն է»:
Երկրի ղեկավարն իր խոսքում անդրադարձել է նաև աշակերտների տեղափոխման համար անհրաժեշտ տրանսպորտային ծառայությունների մատուցման կամ տրանսպորտային ծախսերի փոխհատուցման հարցին, ընդգծել, որ Կառավարությունն այս ուղղությամբ նույնպես քայլեր է ձեռնարկում:
Դիմելով աշակերտներին՝ վարչապետն ընդգծել է. «Սիրելի երեխաներ, ես համոզված եմ, որ դպրոցը ձեզ դուր կգա: Այստեղ կրթական միջավայր է, այստեղ մարզական միջավայր է, այստեղ ստեղծագործական միջավայր է: Տեսեք, դուք բասկետբոլի շատ լավ հրապարակ ունեք, վոլեյբոլի հրապարակ ունեք, ֆուտբոլի շատ լավ դաշտ ունեք, հեծանիվներ ունեք, թենիսի սեղան ունեք, գնդակներ ունեք, լաբորատոր սարքեր ունեք և լավ ուսուցիչներ ունեք: Ամեն ինչ առկա է, որպեսզի լավ սովորեք՝ ձեր հետագա լավ կյանքն ապահովելու համար»։
Այս կրթահամալիրում ելույթի ժամանակ ևս Նիկոլ Փաշինյանը շնորհակալություն է հայտնել Հայաստանի Հանրապետությունում աշխատող, արդյունք ստեղծող, օրենքով սահմանված հարկեր վճարող բոլոր քաղաքացիներին, ընդգծել, որ հենց նրանց շնորհիվ են կառուցվում նման դպրոցներ:
Ամփոփելով խոսքը՝ երկրի ղեկավարն ասել է. «Շնորհավորում եմ բոլորիս և մաղթում եմ ձեզ լավ կյանք այս դպրոցում, որովհետև այս դպրոցն ապրելու տեղ է, կյանքի տեղ է, իսկ կյանքի անբաժանելի ուղեկիցը սովորելն է: Ինչքան ապրում ենք և մեր կյանքը զուգորդում, զուգակցում սովորելով, այնքան մեր կյանքն ավելի լավն է դառնում որպես անհատ, որպես հանրություն, որպես պետություն, որպես ժողովուրդ և որպես քաղաքացի»։
