Շրջակա միջավայրի նախարարության էկոպարեկային ծառայության պետ Վլադիմիր Կիրակոսյանի և Ծառայության պետի առաջին տեղակալ Մուրադ Նուրիջանյանի՝ Տավուշի մարզ կատարած աշխատանքային այցի շրջանակում անցկացվել է գործակարգավարական խորհրդակցություն՝ Ծառայության ղեկավարի գլխավորությամբ։ Այս մասին հայտնում է նախարարությունը։
Խորհրդակցությանը մասնակցել են Տավուշի մարզային վարչության պետի ժամանակավոր պաշտոնակատար Սերգեյ Ասատրյանը, վարչության Իջևանի, Սևքարի, Բերդի, Նոյեմբերյանի տեղամասերի պետերի ժամանակավոր պաշտոնակատարներ Նարեկ Դավիթյանը, Անահիտ Հովսեփյանը, Լևոն Լոբյանը, Արման Բուդաղյանը, ինչպես նաև Դիլիջանի տեղամասի աշխատանքները համակարգող Արտեմ Ստեփանյանը։
Խորհրդակցության ընթացքում Կիրակոսյանը կարևորել է բնության պահպանության ոլորտում Ծառայության առաջնահերթությունների արդյունավետ իրականացումը՝ ընդգծելով ամենօրյա հետևողական, համակարգված և պատասխանատու աշխատանքի անհրաժեշտությունը։
Միաժամանակ նա մարզային վարչության գործընկերներին հորդորել է ցուցաբերել զգոնություն և գործադրել առավելագույն ջանքեր՝ անտառների և բնության հատուկ պահպանվող տարածքների պահպանությունն ապահովելու նպատակով։
Կիրակոսյանը խորհրդակցության ընթացքում ընդգծել է նաև, որ Սևքարի տեղամասի պետի ժամանակավոր պաշտոնակատար Անահիտ Հովսեփյանը Ծառայությունում միակ կին տեղամասի ղեկավարն է։ Նրա խոսքով՝ սա դրական օրինակ է՝ խթանելու կանանց ներգրավվածությունը նման պատասխանատու պաշտոններում և վկայությունն է այն բանի, որ ոլորտում բարձր է գնահատվում փորձառությունը և կարողությունները՝ անկախ սեռից։
Ամփոփելով խորհրդակցությունը՝ Ծառայության պետը վերահաստատել է իր պատրաստակամությունը՝ շարունակական աջակցություն ցուցաբերելու Ծառայության աշխատակիցներին և ձեռնարկելու անհրաժեշտ միջոցներ՝ նրանց գործունեության արդյունավետության բարձրացման և առաջացող խնդիրների լուծման ապահովման ուղղությամբ։
