Գաբալայում հայկական և ադրբեջանական կողմերի միջև տեղի ունեցած հանդիպմանը քննարկվել են նաև կոմունիկացիաներին, նաև TRIPP-ի իրագործմանն առնչվող հարցեր: Այս մասին ասուլիսի ժամանակ ասաց «Հայկական խորհուրդ» վերլուծական կենտրոնի ասոցացված փորձագետ Սամվել Մելիքսեթյանը:
«Եթե խոսում ենք TRIPP-ի մասին, այն մնում է առանցքային թեմաներից մեկը հայ-ադրբեջանական կարգավորման շրջանակում: Ադրբեջանական կողմի համար այս հարցը շատ կարևոր է:
Գիտեք, որ մենք ունենք մտավախություններ՝ կապված այս կոմունիկացիաների վրա Իրանի պատերազմի հնարավոր ազդեցությունների մասով, նաև փորձում ենք հասկանալ՝ ինչ լուծումներ են հնարավոր, եթե այս զարգացումները երկար լինեն, այսինքն՝ Իրանում պատերազմը շարունակվի, կամ ապագայում TRIPP-ը դիտարկվի այնպիսի ենթակառուցվածք, որը կարող է խոցվել հակամարտության շրջանում:
Այս հարցում ես իմ տպավորություններն եմ ասում, ադրբեջանական կողմը նույնպես ունի մտավախություններ՝ կապված այս հարցի շուրջ, բայց նաև դիտարկում է, որ գուցե հայկական կողմը, քանի որ ի սկզբանե այդքան էլ պատրաստակամ չէր կամ ցանկություն չուներ զարգացնելու այս թրեքները (ճանապարհները - խմբ.), փորձում է օգտագործել Իրանի պատերազմը որպես պատրվակ՝ ինչ-որ այլ առաջարկներ անելու:
Ադրբեջանական կողմի համար Նախիջևանի հետ կապը մնում է առանցքային թեմա, և ես կարծում եմ՝ նաև հայկական կողմի աշխատանքներից է կախված, որ մենք հնարավորություն ունենանք զարգացնելու ապաշրջափակման գործընթացը»,- ասաց նա՝ կարծիք հայտնելով, թե այն կախված է նաև հայկական կողմի աշխատանքներից:
Փորձագետը կարևորեց նաև այն հանգամանքը, որ Ադրբեջան այցի ընթացքում պատկերացում են կազմել ադրբեջանական կողմի տրանսպորտային կոմունիկացիաների տրամաբանության և տեխնիկական լուծումների մասին, ապա առանձնացրեց դեպի Վրաստան տանող մայրուղու որակը. «Այնտեղ Վրաստան-Ադրբեջան միջպետական ճանապարհը 4 գիծ ունեցող ուղիղ ճանապարհ է, մայրուղի է»:
