Խորհրդարանը քննարկում է Կառավարության ներկայացրած՝ «Մարզական մրցումների մեքենայությունների մասին» Եվրոպայի խորհրդի կոնվենցիան վավերացնելու մասին օրենքի նախագիծը:
Հիմնական զեկուցող, ԿԳՄՍ նախարար Ժաննա Անդրեասյանի խոսքով՝ օրենքի նախագիծը սպորտի ոլորտում Կառավարության վարած հետևողական քաղաքականության տրամաբանական շարունակությունն է և նպատակ ունի առաջին հերթին որակական նոր չափանիշներ սահմանել սպորտի ոլորտում թափանցիկության, հաշվետվողականության, արդար և ազնիվ սպորտի կանոնների հաստատման ուղղությամբ և այդ առումով նաև միջազգային չափորոշիչներին ու ստանդարտներին համապատասխան մրցաշարեր կազմակերպելու ինստիտուցիոնալ նոր հիմքեր ստեղծել:
Նախարարը կարևորեց Հայաստանի կողմից կոնվենցիայի վավերացումը, որը միտված է կանխելու սպորտային մրցաշարերի արդյունքների արհեստական փոփոխումը, պահպանելու մրցումների անկանխատեսելի բնույթը, ինչը առանցքային է արդար խաղի և սպորտի հեղինակության համար:
«Հատկապես կարևորում եմ, որ մենք կոնվենցիայի վավերացումը իրականացնում ենք այն փուլում, երբ մեր Կառավարությունը հետևողականորեն մեծացնում է սպորտին ուղղված աջակցությունը: Մենք ավելի քան քառապատկել ենք սպորտին ուղղված ֆինանսավորումը 2018-ի համեմատ, ավելի քան 15 միլիարդ դրամ ուղղվում է սպորտին, և պետք է ասել, որ մեր հետևողական քաղաքականությունն է մեր երկրում շարունակաբար կազմակերպել միջազգային խոշոր մրցաշարեր»,- հայտնեց ԿԳՄՍ նախարարը:
Անդրեասյանը վստահություն հայտնեց՝ կոնվենցիայի վավերացումը կգա ամրապնդելու ինստիտուցիոնալ այն շրջանակը, որը կօգնի որակական նոր չափանիշների սահմանմամբ առաջ գնալ:
«Մարզական մրցումների մեքենայությունների մասին» Եվրոպայի խորհրդի կոնվենցիայի ստորագրման համար բացվել է 2014 թվականի սեպտեմբերի 18-ին: Հայաստանի Հանրապետության կողմից Կոնվենցիան ստորագրվել է 2014 թ. սեպտեմբերի 18-ին:
Կոնվենցիայի նպատակն է պայքարել մարզական մրցումների մեքենայությունների դեմ՝ սպորտում բարեվարքությունը և մարզական էթիկայի կանոնները պահպանելու համար՝ սպորտի ինքնավարության սկզբունքին համապատասխան:
Հայաստանի կողմից «Մարզական մրցումների մեքենայությունների մասին» Եվրոպայի խորհրդի կոնվենցիայի վավերացումը ԵԽ կողմից կգնահատվի որպես դրական քայլ և սկզբունքային դիրքորոշում երկրում մարզական մրցումների մեքենայությունների դեմ պայքարի հարցում:
Կոնվենցիան ուժի մեջ է մտել 2019 թ. սեպտեմբերի 1-ին:
Սույն Կոնվենցիան ուժի մեջ է մտնում հինգ ստորագրող կողմերի, այդ թվում՝ Եվրոպայի խորհրդի առնվազն երեք անդամ պետությունների կողմից 32-րդ հոդվածի 1-ին, 2-րդ և 3-րդ կետերի դրույթների համաձայն Կոնվենցիայով նախատեսված պարտավորություններն ստանձնելու մասին իրենց համաձայնությունը տալու օրվանից հետո՝ եռամսյա ժամկետը լրանալուն հաջորդող ամսվա առաջին օրը:
2025 թ. մարտի 25-ի դրությամբ Կոնվենցիան ստորագրել է 43 պետություն, ուժի մեջ է մտել 14 պետության համար (ցանկը կից ներկայացվում է):
Հաշվի առնելով վերոգրյալը՝ 2014 թ. սեպտեմբերի 18-ին ստորագրված «Մարզական մրցումների մեքենայությունների մասին» Եվրոպայի խորհրդի կոնվենցիայի վավերացումը կամ հաստատումը Հայաստանի Հանրապետության վարած արտաքին քաղաքականության առումով նպատակահարմար է:
