Մարտի 19-ին ռուսական Սու-30 կործանիչը խախտել է Էստոնիայի օդային տարածքը Բալթիկ ծովի Վայնդլո կղզու մոտակայքում` հաղորդել է երկրի գլխավոր շտաբը: Ռուսական ռազմական ինքնաթիռը Էստոնիայի օդային տարածքում մնացել է մոտ մեկ րոպե՝ առանց թռիչքի պլանի և Էստոնիայի օդային ծառայության հետ ռադիոկապի:
Օդային սահմանի խախտմանն արձագանքել է Իտալիայի ռազմաօդային ուժերի ստորաբաժանումը, որը տեղակայված է Էմարի ավիաբազայում՝ Բալթյան երկրների օդային տարածքի պահպանության ՆԱՏՕ-ի առաքելության շրջանակներում: Էստոնիայի ԱԳՆ-ն կանչել է ՌԴ դեսպանատան գործերի ժամանակավոր հավատարմատարին և միջադեպի կապակցությամբ նրան բողոքի նոտա հանձնել:
Ռուսական մարտական ինքնաթիռները 2025 թվականից առնվազն չորս անգամ խախտել են հարևան երկրի օդային տարածքը: Վերջին նման միջադեպը տեղի է ունեցել սեպտեմբերի 19-ին, երբ Ռուսաստանի օդատիեզերական ուժերի երեք ՄիԳ-31 կործանիչ առանց թույլտվության 12 րոպե թռել է Էստոնիայի երկնքում՝ նույն Վայնդլո կղզու մոտակայքում:
