ԱՄՆ նախագահ Դոնալդ Թրամփը ձևավորում է Գազայի հատվածը կառավարող Խաղաղության խորհուրդը և այդ նպատակով հրավիրում է մի շարք երկրների ղեկավարների: Թրամփը խորհրդին միանալու առաջարկ է արել Ղազախստանի նախագահ Կասիմ-Ժոմարտ Տոկաևին, միաժամանակ Ղազախստանին հրավիրել է դառնալ հիմնադիր պետություններից մեկը։ Ըստ Ղազախստանի առաջնորդի մամուլի քարտուղար Ռուսլան Ժելդիբայի՝ Տոկաևն ընդունել է հրավերը։
Գազայի վերակառուցման համար ստեղծված Խաղաղության խորհրդին միանալու Դոնալդ Թրամփի հրավերն ընդունել է նաև Հունգարիայի վարչապետ Վիկտոր Օրբանը։ Այդ մասին հայտարարել է Հունգարիայի արտգործնախարար Պետեր Սիյարտոն։
Նման հրավեր ստացել է նաև Ավստրալիայի վարչապետ Էնթոնի Ալբանեզեն, սակայն նա չի շտապում պատասխանել և որոշել է քննարկել առաջարկը:
Bloomberg-ի հաղորդմամբ՝ ԱՄՆ նախագահը մի շարք այլ համաշխարհային առաջնորդների նույնպես հրավիրել է միանալ Խաղաղության խորհրդի գործադիր խորհրդին, այդ թվում՝ Արգենտինայի նախագահ Խավիեր Միլեյին և Կանադայի վարչապետ Մարկ Քարնիին։
Կառույցում ընդգրկված են նաև ԱՄՆ պետքարտուղար Մարկո Ռուբիոն, ԱՄՆ նախագահի հատուկ դեսպանորդ Սթիվեն Ուիթքոֆը, Դոնալդ Թրամփի փեսա և խորհրդական Ջարեդ Քուշները, Համաշխարհային բանկի նախագահ Աջայ Բանգան և Մեծ Բրիտանիայի նախկին վարչապետ Թոնի Բլերը, բուլղարացի դիվանագետ Նիկոլայ Մլադենովը նշանակվել է Գազայի հատվածի հարցերով գերագույն ներկայացուցիչ: Խորհուրդը նախագահելու է Դոնալդ Թրամփը։
