Այսօր Հալեպում ընդհանուր առմամբ իրավիճակը հանդարտ է։ Հայ համայնքում արձանագրվել են միայն նյութական վնասներ, վիրավորներ կամ զոհեր չկան։ Եկեղեցու սրահում ապաստանած ընտանիքները առավոտյան վերադարձել են իրենց բնակարանները։ Դպրոցները շարունակում են փակ մնալ։ Այդ մասին Հալեպից հայտնել է «Լուրեր»-ի թղթակից Զարմիկ Պողիկյանը:
Անցած օրերի ընթացքում ՀՀ Հալեպի գլխավոր հյուպատոսությունը շարունակել է իր գործունեությունը՝ ծառայություններ մատուցելով Հայաստանի Հանրապետության և օտարերկրյա քաղաքացիների։
Ավելի վաղ հայտնել էինք, որ Սիրիայի պաշտպանության նախարարությունը հայտարարել է Հալեպի Շեյխ Մաքսուտ, Աշրաֆիե և Բենի Զեյթ թաղամասերի շրջակայքում զինադադարի հաստատման մասին՝ տեղում ռազմական գործողությունները դադարեցնելու, ինչպես նաև օրենքի գերակայության և պետական պաշտոնական հաստատությունների վերականգնման համար պայմաններ ստեղծելու նպատակով։
Հայտարարության մեջ նախարարությունը նշել է. «Հիմք ընդունելով Հալեպի քաղաքացիական բնակչության անվտանգության ապահովման մտահոգությունը և բնակելի թաղամասերում ռազմական նոր սրացումները կանխելու անհրաժեշտությունը՝ պաշտպանության նախարարությունը հայտարարում է հրադադար Շեյխ Մաքսուտ, Աշրաֆիե և Բենի Զեյթ թաղամասերի շրջակայքում, որը կգործի ժամը 03։00-ից սկսած»։
Նախարարությունը կոչ է արել Շեյխ Մաքսուտ, Աշրաֆիե և Բենի Զեյթ թաղամասերում գործող զինված խմբավորումներին լքել տարածքը։ Տարածքը լքող զինյալներին թույլատրվել է ունենալ միայն անձնական թեթև զինատեսակներ։ Սիրիական բանակը պարտավորվում է ուղեկցել նրանց և ապահովել անվտանգ տեղափոխումը դեպի երկրի հյուսիսարևելյան շրջաններ՝ Եփրատի արևելք։
Նախարարությունն ընդգծել է, որ գործընթացի նպատակն է վերջ դնել տվյալ թաղամասերում ռազմականացված իրավիճակին, ապահովել օրենքի գերակայությունը և պետական հաստատությունների վերադարձը, ինչպես նաև հնարավորություն տալ բռնի տեղահանված բնակիչներին վերադառնալ իրենց բնակարանները և վերսկսել բնականոն կյանքն անվտանգ միջավայրում։
Պաշտպանության նախարարությունը կոչ է արել բոլոր շահագրգիռ կողմերին խստորեն պահպանել նշված ժամկետները՝ բոլորի անվտանգությունն ապահովելու և հնարավոր բախումները կանխելու համար։ Նշվել է նաև, որ ներքին անվտանգության ուժերը՝ Սիրիայի բանակի ռազմական գործողությունների խորհրդի հետ համատեղ, պատասխանատու են թաղամասերից զինված խմբավորումների դուրսբերման կազմակերպման համար դեպի Սիրիայի հյուսիս-արևելք։
