Սլովակիան և Հունգարիան մտադիր են Եվրամիության արդարադատության դատարանում բողոքարկել Եվրոպական հանձնաժողովի որոշումը՝ ռուսական գազի գնումներից հրաժարվելու մասին: Ըստ Սլովակիայի արտաքին գործերի նախարար Յուրայ Բլանարի՝ Եվրահանձնաժողովի այդ որոշումը կվնասի ոչ միայն Սլովակիային և Հունգարիային, այլև ԵՄ մրցունակությանը։
Բլանարը Բրատիսլավայի դիրքորոշման մասին տեղեկացրել է Հունգարիայի արտգործնախարար Պետեր Սիյարտոյին: Կողմերը պայմանավորվել են համակարգել գործողությունները ռուսական գազի ներմուծման արգելքի առնչությամբ իրենց ազգային շահերը պաշտպանելու հարցում:
Դեկտեմբերի 3-ին Եվրոպական միության խորհուրդը և Եվրախորհրդարանի ներկայացուցիչները համաձայնության են եկել մինչև 2027 թվականը ռուսական գազի ներմուծումից փուլային եղանակով հրաժարվելու կանոնների շուրջ։
