Տարակերպ մեկնաբանությունների պատճառ է դարձել այն, որ ՊԵԿ հայտարարագրեր չներկայացնելու կամ դրանցում կեղծ տվյալներ ներկայացնելու դեպքում կարող է գործել 444-րդ հոդվածով նախատեսված քրեական պատասխանատվությունը: Ըստ այդմ՝ մշակվել է նախագիծ, համաձայն որի՝ նախատեսվում է հստակեցնել հանցակազմերի սուբյեկտի շրջանակը: Առաջին ընթերցմամբ նախագիծն Ազգային ժողովի՝ դեկտեմբերի 3-ի նիստին ներկայացրեց ՀՀ արդարադատության նախարարի տեղակալ Գևորգ Քոչարյանը:
Նախագծով փոփոխություններ են առաջարկվում օրենսգրքի երկու հոդվածում՝ 443-րդում, որն ապօրինի հարստացմանն է վերաբերում, և 444-րդում, որը հայտարարագրում կեղծ տվյալներ ներկայացնելուն, տվյալները թաքցնելուն կամ հայտարարագիր չներկայացնելուն է վերաբերում:
«Նպատակ ունենք սահմանափակել սուբյեկտային կազմը, և դա սահմանափակել՝ նշածս երկու հանցակազմերում «ՀՀ օրենսդրությամբ սահմանված» բառերը փոխարինելով «Կոռուպցիայի կանխարգելման հանձնաժողով» բառերով: Այսինքն՝ այս հանցակազմերը կվերաբերեն միայն ԿԿՀ-ին ներկայացվող հայտարարագրերին, և չենք ունենա տարընկալման որևէ տեղ, երբ ֆիզիկական անձանց կողմից տարեկան հայտարարագրերը չներկայացնելու կամ դրանցում որևէ սխալ ներկայացնելու արդյունքում կարող են ֆիզիկական անձինք քրեական պատասխանատվության ենթարկվել, օրինակ՝ 444-րդ հոդվածով:
Իսկ 443-րդ հոդվածի՝ ապօրինի հարստանալու մասին հոդվածի թիրախային խումբը պաշտոնյաներն են, որոնք ԿԿՀ-ին ներկայացնում են գույքի, եկամուտների, ծախսերի և շահերի հայտարարագիր, և այդ հայտարարագրերի վերլուծության արդյունքում են ԿԿՀ-ի կողմից արձանագրվում որոշակի խախտումներ: Միայն այդ հայտարարագրերի դեպքում կարող է խոսք լինել ապօրինի հարստանալու մասին: Ուստի նախագծով նախատեսվում է նաև այդ հանցակազմում սուբյեկտային կազմը որոշակիացնել»,- ասաց նա:
«Հայաստան» խմբակցության պատգամավոր Ագնեսա Խամոյանը հետաքրքրվեց՝ եթե այս փոփոխությունը տեղի չունենար, հոդվածը վերաբերելու էր նաև ՀՀ շարքային քաղաքացների՞ն, համընդհանուր հայտարարագիր լրացնող ֆիզիկական անձա՞նց:
Նախարարի տեղակալը պարզաբանեց. «Նույնիսկ եթե փոփոխություն չլիներ, պետք է որ այդպես չկիրառվեր, որովհետև այս հանցակազմերը «Հանրային ծառայության դեմ ուղղված հանցագործություններ» գլխում են գտնվում, հետևաբար պետք է հասկանալ, որ սրանք այն սուբյեկտները չեն, որոնք այս հանցագործության սուբյեկտ կարող են լինել»:
Հարակից զեկուցող, «Քաղաքացիական պայմանագիր» խմբակցության պատգամավոր Լիլիթ Մինասյանը հստակեցրեց՝ տվյալ օրենսդրությամբ հայտարարագիրը ԿԿՀ-ին չներկայացրած մարդիկ կարող են ենթարկվել քրեական պատասխանատվության, որը կապ չունի ՊԵԿ ներկայացված հայտարարագրի հետ:
«Այս նախագիծը միտված է Քրեական օրենսգիրքն ավելի հստակեցնելուն, ոչ թե ՊԵԿ ներկայացրած [հայտարարագրով] ֆիզիկական անձանց չդատելուն»,- ասաց նա:
