Եթե խոսքը բարկանալու մասին է՝ ես ամսի 24-ին չեմ բարկացել, ես վաղուցվանից բարկացած եմ։ Բա ինչո՞ւ այդ բարկացումը արտահայտություն չի գտել։ Այդ մասին Կառավարության նիստից հետո լրագրողների հետ ճեպազրույցում ասաց վարչապետ Նիկոլ Փաշինյանը՝ անդրադառնալով լրագրողի այն դիտարկմանը, թե ինքը Ռոբերտ Քոչարյանի վերաբերյալ հայտարարություններ արել է Քոչարյանի որդի, ԱԺ պատգամավոր Լևոն Քոչարյանի հետ վիճաբանությունից հետո:
«Նախ՝ ես, ոչ որպես վարչապետ, որպես ՀՀ քաղաքացի, ուզում եմ շնորհակալություն հայտնել մեր դատաիրավական համակարգի այն անձանց, ովքեր այս ամեն ինչը ի ցույց են դրել հանրությանը իրավական տեսանկյունից»,- նշեց վարչապետը։
«Բայց ես ուզում եմ էլի մենք վերադառնանք։ Հիմա էլ ուզում եմ հարցադրում անել։ Բայց ես, էլի որպես ՀՀ քաղաքացի, ո՛չ որպես վարչապետ, հարցեր ունեմ։ Բա էս փաստերի հետ 8 տարի, հլը չեմ ասում՝ 17-18 տարի, Հայաստանի իրավապահ մարմինները ո՞նց են առնչվել։ Օրինակ՝ այն քննիչները, այն դատախազները, այն օպերատիվ աշխատողները, այս փաստերի մասին իմացել են, չէ՞։ Ո՞նց են արձագանքել իրենք։ Օրինակ՝ իմացե՞լ են, որ «Տոյոտա Երևան» ընկերությունում Ռոբերտ Քոչարյանի ընտանիքը 30 տոկոս բաժնեմաս ունի, հողի հետ կապված խնդիր ունի։ Օրինակ՝ իմացե՞լ են, որ «Օրանժը» Ռոբերտ Քոչարյանի ընտանիքինն է։ Իմացե՞լ են, որ Պարոնյան 8 հասցեի շենքը Ռոբերտ Քոչարյանի ընտանիքինն է։ Օրինակ՝ իմացե՞լ են, որ «Փլեյ Սիթին» Ռոբերտ Քոչարյանի ընտանիքինն է, և էլի բազմաթիվ բաներ։ Մենք պետք է պետական ստանդարտ սահմանենք և ժողովրդավարության ստանդարտ սահմանենք։
Նախ՝ եթե նույնիսկ չեն իմացել, 2018 թվականից հետո անընդհատ դա բարձրաձայնվել է մամուլում։ ՀՀ դատախազները, քննիչները, օպերատիվ աշխատողները ի՞նչ գործողություն են ձեռնարկել, որովհետև հանցանքի առերևույթ ցանկացած դեպքի իրենք պետք է արձագանքեն։ Արձագանքել են, որոշ դեպքերում գուցե քրեական գործեր հարուցվել են։ Այդ քրեական գործերն ինչո՞ւ չեն քննվել։ Կամ որ այդ քրեական գործերը հարուցվել են, ես զանգե՞լ եմ, ասե՞լ եմ՝ գործ հարուցեք, կամ որ չեն քննվել, ես զանգե՞լ-ասել եմ՝ այդ գործը մի քննե՞ք։ Այս հարցերին պետք է տրվեն պատասխաններ։
Դրա քաղաքական պատասխանը ես ունեմ, որովհետև քոչարյանասերժական մաֆիան իր շոշափուկներն ունեցել է և դեռևս ունի Հայաստանի դատաիրավական համակարգում։ Այն, որ խուզարկությունից առաջ պաստառներ են լինում՝ ցույց տալով, որ իրենք գիտեն, հետո մեծ պատմություն են սարքել՝ «վ՜այ, երեխեքը»։ Բա եթե դուք գիտեիք, որ գալու էին, երեխեքին ինչո՞ւ տատիկ-պապիկի մյուս տուն չէիք ուղարկել։ Այսինքն՝ պահել էիք, որ երեխեքով շոու անեիք։ Բա էդքան սիրում էիք երեխեքին, էդ պլակատ գրելու ժամանակահատվածում կարելի էր երեխեքին ուղարկել մյուս տատիկ-պապիկների տուն, ընկերոջ տուն, հարազատի տուն։ Սա ցույց է տալիս, որ դիտավորյալ պահել են, երեխեքին զենքայնացնելու պրոցես է սկսվում։ Գտնելու ենք «ուտեչկա» տվողներին, և ես չեմ նախանձում, թե նրանց հետ ինչ է տեղի ունենալու»,- ասաց Նիկոլ Փաշինյանը։
«Հաջորդը՝ ես 8 տարի վարչապետ եմ, դուք գիտեք՝ ես ում ինչ եմ ասում, ընդհուպ՝ գիտեք մեր տանը՝ ով ինչ է ասում, երբ է ասում, ինչու է ասում, ում հետ ինչ եմ խոսում։ Հիմա ասեք՝ որն է իմ հյուրանոցը, որն է իմ հանգստյան տունը, որն է իմ բազմաբնակարան շենքը, որոնք են իմ միլիարդները, որտեղ են դրանք պահվում, և դիմեք իրավապահ մարմիններին։ Եվ ես ուրիշ հարց եմ տալիս. այսինքն՝ ես և ՀՀ քաղաքացիները, և ՀՀ իրավապահ համակարգը պետք է տենց բաց աչքով նայենք, ասենք՝ դե, Ռոբերտ Քոչարյանը, Սերժ Սարգսյանը, Գագիկ Ծառուկյանը՝ իրենք, դե, վերին արտի ցորեններն են, իրենք կարող են թալանել ՀՀ-ն և սերնդեսերունդ այդ թալանածը ժառանգեն։
Ես շատ հստակ, թափանցիկ խնդիր եմ ձևակերպել այս ամեն ինչը՝ ընտրություններից առաջ ժողովրդի առաջ, և ժողովրդին առաջարկել եմ, որ առաջարկում եմ մեր պետության այս ոլորտում այսպիսի դեպքում այսպիսի քայլեր, որոնք չանելու դեպքում մեղադրում եք ինձ։ Եվ ժողովուրդը գնացել է, քվեարկել է, և ժողովրդի կամքը պետք է իրականացվի։
Հիմա ոչ ոք հարց չի տալիս՝ այդ միլիարդները Ռոբերտ Քոչարյանին որտեղի՞ց։ Ասում է՝ բիզնեսով ենք զբաղվել։ Ո՞ւմ են ձեռք առնում։ Այսինքն՝ իրենք այդքան տենց ուժեղ բիզնեսմե՞ն են, մենք էլ ընդհանրապես չենք կարողանում ոչ մեկի ձեռքից ոչ մի բան խլել։ Այս պայմաններում է, որ ԶՊՄԿ-ն պետությունը մասնաբաժին է ստանում, ասում են՝ դա կոռուպցիոն գործարք է, իսկ «Տոյոտա Երևանում» իրենց անձնական փայ ունենալը բիզնես գործունեություն է։ Ասենք՝ Ամուլսարի նախագծում պետության փայ ունենալը կոռուպցիոն գործարք է, իսկ Երևանի կենտրոնում հողեր վերցնելը և ձեռքբերման գնից 20-30 անգամ ավելի գնով վաճառելը բիզնես է։ Սա անընդունելի է։ Սա պետության հարցն է։
Եվ ասում եմ՝ քաղաքական խնդիրը հետևյալն է՝ և՛ Ռոբերտ Քոչարյանը, և՛ Գագիկ Ծառուկյանը, և՛ Սերժ Սարգսյանը ամսի 1-ը որ մոտենա, պետք է հեռախոսը բացեն, տեսնեն՝ թոշակը նստե՞լ է, թե՞ չէ։ Այ, էս է քաղաքական խնդիրը։ Ինչո՞ւ. որովհետև նրանք պետք է ապրեն իրենց թոշակով և իրենց օրինական եկամուտներով, իսկ ինչ-որ ապօրինի ձեռք են բերել՝ հատիկ առ հատիկ, դրամ առ լումա, կոպեկ առ կոպեկ, սենտ առ սենտ, քյաբաբ առ քյաբաբ պետք է վերադարձվի ՀՀ-ին և նրա ժողովրդին։ Ուրիշ տարբերակ չկա։ Եթե սա տեղի չունենա, դա նշանակում է, որ նոր հեղափոխություն պետք է տեղի ունենա։
Գագիկ Ծառուկյանի հետ կապված. նո՞ր են այդ քրեական գործերը։ Ինչո՞ւ չեն քննվել։ Ես ասել եմ՝ մի՞ քննեք, կամ ես ասել եմ՝ գործ հարուցե՞ք, կամ ես որևէ բան ասե՞լ եմ։ Ես ինչ որ ասել եմ, դուք իմ ասածների մասին գիտեք։ Եթե աշխատանքային մակարդակում էլ ինչ-որ մի բան էլ ասել եմ, ասել եմ այն շրջանակում, ինչ ասում եմ հրապարակային։
Նախկին գլխավոր դատախազի գործունեությանն էլ պետք է անդրադառնանք։ Այսինքն՝ ես, ճիշտն ասած, հիմա չգիտեմ՝ այս գործերը երբ են հարուցվել, բայց այդ փաստերը վաղուցվանից կան։ Բա պատահակա՞ն է, որ նախկին պաշտոնյաները, ԱԱԾ տնօրենի նախկին տեղակալը դուրս են եկել, ինչ-որ հայտարարություններ են անում: Բացատրեք՝ այս գործերով ինչո՞վ եք զբաղված եղել։ Կարո՞ղ է՝ փող եք առել, թե՞ ձեզ թվում է՝ ձեր հետևից եկող չի լինելու։ Պետք է պատասխան տաք։
Մի հատ խեղճուկրակների երկու հատ հավ գողանալու համար մինչև վերջին խազը սնանկացրել, սովի եք մատնել, իսկ ձեզ համար եղել են անձեռնմխելի մարդիկ։ Ինչի՞ համար։ Բերել, վճարե՞լ են ձեզ։ Պետք է պատասխան տաք բոլորդ։ Ում վարույթում այս գործերը եղել են և չեն արժանացել ընթացքի, պետք է բացատրություն տան ՀՀ ժողովրդին։ Պետք է իրենց բոլորի ունեցվածքն էլ նայվի, իրենց հաշվեհամարներն էլ պետք է նայվեն, իրենց ընտանիքի անդամների հաշվեհամարներն էլ, «Տոյոտա Երևան»-ի հետ իրենց հարաբերություններն էլ պետք է նայվեն։ Ամեն ինչ պետք է նայվի»,- ասաց Նիկոլ Փաշինյանը։
