Հանրային ծառայությունները կարգավորող հանձնաժողովի երեք անդամները՝ Սերգեյ Աղինյանը, Դավիթ Մուրադյանը, Ելենա Բաբոյանը, այցելել են Թուրքիա։ Նրանք մեկնել են հոկտեմբերին՝ մասնակցելու Էներգետիկ կարգավորողների տարածաշրջանային ասոցիացիայի աշխատաժողովին։ Այդ մասին ՀԾԿՀ նիստից հետո՝ լրագրողների հետ ճեպազրույցի ժամանակ, հայտարարեց ՀԾԿՀ նախագահ Մեսրոպ Մեսրոպյանը՝ ներկայացնելով նաև վերոնշյալ ասոցիացիայի մասին տեղեկություն:
«Հայաստանի Հանրապետությունը 1999 թվականից Էներգետիկ կարգավորողների տարածաշրջանային ասոցիացիայի ոչ միայն անդամ է, այլև հիմնադիր անդամ, որտեղ ընդգրկված է 47 երկիր»,- ասաց նա՝ տեղեկացնելով, որ այս տարի Օմանում իր գլխավորությամբ պատվիրակությունը մասնակցել է ասոցիացիայի աշխատաժողովներին, իսկ հանձնաժողովի անդամ Սերգեյ Աղինյանն էլ ընտրվել է ասոցիացիայի նախագահության անդամ, ժամկետը՝ 3 տարի։
«Ասոցիացիայի աշխատանքային ռեժիմն այպիսին է. տարին երկու անգամ անդամ երկրներից որևէ մեկում աշխատաժողովներ են հրավիրվում, և այդ աշխատաժողովների օրերի ընթացքում 47 երկրի պատվիրակները, ներկայացուցիչները քննարկում են էներգետիկային վերաբերող բազմաթիվ հարցեր: Մեր այս ժամանակաշրջանում օրակարգային են հատկապես վերականգնվող, արևային էներգետիկայի հետ կապված խնդիրները, որոնք ոչ միայն մենք ունենք մեր երկրում (ի միջի այլոց, այդպիսի խնդիրներ ունեն գրեթե բոլոր երկրները, որոնք սկսել են արևային էներգետիկա ներդնել իրենց երկրում), ինչպես նաև շուկայի ազատականացման հետ կապված օրակարգային խնդիրներ ունենք»,- ասաց Մեսրոպ Մեսրոպյանը՝ միաժամանակ տեղեկացնելով, որ Թուրքիա վերջին այցելության ժամանակ հենց այս խնդիրներն են շոշափվել:
ՀԾԿՀ նախագահը, անդրադառնալով այն տեղեկությանը, թե ՀՀ պատվիրակության ներկայացուցիչները գնացել են Թուրքիա, որպեսզի բանակցեն ՀԷՑ-ը թուրքերին վաճառելու համար, ասաց, որ այդ խոսակցությունները նման են գեբելսյան քարոզչության՝ որքան սուտը մեծ է, այնքան հավատացողները շատ կլինեն։
«Նման բան պարզապես չկա»,- հայտարարեց ՀԾԿՀ նախագահը:
