Լսեք, ինչ լավ է, որ այդ հեղափոխությունը տեղի է ունեցել, ըստ էության, ուղիղ եթերում: Այս մասին խորհրդարանում՝ ճեպազրույցում, ասաց ՀՀ վարչապետ Նիկոլ Փաշինյանը, ում լրագրողները հարց ուղղեցին՝ հիշեցնելով նախկին նախագահ Սերժ Սարգսյանի վերջին հարցազրույցը:
Սարգսյանը հայտարարել էր, թե Հայաստանում Եվրամիության այն ժամանակվա դեսպան Պյոտր Սվիտալսկիին Փաշինյանն ասել է, որ իրեն առաջարկել են փոխվարչապետի պաշտոն, եթե ինքը հանդարտեցնի փողոցը։
Վարչապետն ընդգծեց՝ ամբողջ հեղափոխությունն է տեղի ունեցել ուղիղ եթերում:
Ինչ վերաբերում է նախկին վարչապետ Կարեն Կարապետյանին, ասաց՝ նրա հետ հանդիպում եղել է մեկուսարանում:
«Երկրորդը՝ խոսվում է դեսպանների մասին, ես հատուկ այդ թեմայով դեսպանների հետ հանդիպում եմ արել հեղափոխության ժամանակ: Նրանք հանդիպում են ուզել ինձանից, և այդ հանդիպման նպատակը եղել է այն, որ ասել են՝ կարող ենք օգնել ու աջակցել, ես ասել եմ՝ ինձ համար դա անընդունելի է: Ինձ համար Հայաստանի ներսում օտարերկրյա դեսպանների միջնորդության կարիք չունեմ, որպեսզի Հայաստանում մեր քաղաքական օրակարգը առաջ մղել, այսինքն՝ ցանկացած նման թեմա, որ ինչ-որ դեսպանի միջոցով ինչ-որ առաջարկ է արվել, դա ի սկզբանե սուտ է»,- ասաց վարչապետը:
Նիկոլ Փաշինյանը պատմեց՝ ինչպես է եղել Կարեն Կարապետյանի հետ հանդիպումը, նշեց՝ հիմա շատ լավ առիթ է՝ պատմելու, թե ինչ է եղել այդ հանդիպման ժամանակ:
«Կարեն Կարապետյանը եկել է և խոսել է Սերժ Սարգսյանի անունից: Փորձ է արել նենց անել, որ իրենք ինձ ազատում են, և հեղափոխական պրոցեսը չի շարունակվում: Ես ասել եմ՝ ո՛չ, դա բացառվում է: Նախ ասեմ՝ փոխվարչապետի մասին: Ընդհանրապես երբեք որևէ մեկի հետ նման ակնարկ և խոսակցություն չեն եղել: Ոչ միայն փոխվարչապետի, այլև որևէ պաշտոնի մասին որևէ խոսակցություն ընդհանրապես չի եղել: Ես չգիտեմ՝ իրենք նման բան քննարկե՞լ են, թե՞ ոչ, բայց ես չէի էլ թույլ տայի, որ նման խոսակցություն տեղի ունենար»,- ասաց վարչապետը՝ ընդգծելով, նման բան տեղի չի ունեցել:
«Ընդհանրապես բացառում եմ, որ որևէ ձայնագրություն կլինի, որը իրենց ասած և իմ կողմից հերքված որևէ նյուանս կապացուցի, բացառում եմ»,- հայտարարեց վարչապետը՝ պատմելով, թե ինչպես է եղել իր և Կարեն Կարապետյանի խոսակցությունը:
«Խոսակցությունը եղել է հետևյալի մասին, որ Կարեն Կարապետյանը, ըստ էության, ակնարկել է ենթատեքստերով, եթե ինքը հերքի, ես դա կհասկանամ, որովհետև ուղիղ չի եղել խոսակցությունը:
Խոսակցությունը եղել է ենթատեքստերով, որ մեզ ազատեն, և հեղափոխությունը դուրս գա օրակարգից, և Կարեն Կարապետյանը պատրաստակամություն է հայտնել, որ ինքը՝ որպես բոլորի կողմից ընդունելի թեկնածու, ստանձնի իշխանությունը: Ես ասել եմ՝ դա ընդունելի չի ինձ համար, և Սերժ Սարգսյանը պետք է հեռանա: Որից հետո Կարեն Կարապետյանը գնացել է և վերադարձել՝ ասելով, որ Սերժ Սարգսյանը պատրաստ է հրաժարական տալ, բայց առաջարկում է, որ դա տեղի ունենա Ֆրանկոֆոնիայի գագաթնաժողովից հետո: Ես ասել եմ՝ դա անընդունելի է, ես չեմ ընդունի այդ տարբերակը: Որից հետո գնացել է, հետո վերադարձել ու ասել, որ Սերժ Սարգսյանը պատրաստ է հրաժարական տալ հունիսին»,- պատմեց վարչապետը՝ հավելելով, որ մերժել է դարձյալ՝ ասելով, որ դա ընդունելի տարբերակ չէ՝ Սարգսյանը պետք է հրաժարական տա այսօր, վաղը կամ առավելագույնը՝ մյուս օրը:
Դրանից հետո, ըստ վարչապետի, Կարապետյանը գնացել եկել է ու ասել, որ ընդունելի է այդ պայմանը:
«Սա է եղել մեր խոսակցությունը մեկուսարանում Կարեն Կարապետյանի հետ»,- խոսքը եզրափակեց Նիկոլ Փաշինյանը:
