Այսօր խորհրդարանում լրագրողները հարց ուղղեցին ԱԺ նախագահի տեղակալ Ռուբեն Ռուբինյանին Ադրբեջանի ԱԳ նախարար Ջեյհուն Բայրամովի հարցազրույցի վերաբերյալ, որում նա հայտարարել էր, թե ՀՀ վարչապետը ինչ-որ մի փուլում կտրուկ փոխել էր իր տեսակետն ու հրաժարվել Ադրբեջանի հետ բանակցություններ վարել, ինչի հետևանքով էլ առաջացել էր փակուղի, որն էլ հանգեցրեց պատերազմին:
Ռուբինյանի խոսքով՝ դա ոչ միայն Ադրբեջանի արտգործնախարարն է ասում, այլև Ռոբերտ Քոչարյանը, Սերժ Սարգսյանը և Լևոն Տեր-Պետրոսյանը:
«Պետք է ասեմ, որ Ադրբեջանի արտգործնախարարը, Ռոբերտ Քոչարյանը, Սերժ Սարգսյանը և Լևոն Տեր-Պետրոսյանը սխալ են ասում: Հայաստանը պատերազմ չի հրահրել, Հայաստանը պատերազմ չի սկսել ու չի դադարեցրել բանակցային գործընթացը»,- հայտարարեց Ռուբինյանը:
Լրագրողների դիտարկմանը, թե նրանք փաստեր են վկայակոչել, Ռուբինյանն ընդգծեց՝ ինքը համաձայն չէ նրանց վկայակոչած փաստերի հետ, որովհետև այս փաստերը ճիշտ չեն:
«Ռոբերտ Քոչարյանն ասել է՝ Ղարաբաղը 88 թվականից մինչ օրս Հայաստանի մաս է: Ըստ Ռոբերտ Քոչարյանի և իր գործընկերների տրամաբանության՝ ինքը պատերա՞զմ է հրահրել»,- նշեց նա՝ հիշեցնելով, որ 2019 թվականին չի եղել մի այնպիսի առաջարկ, որին Ադրբեջանը համաձայնել է, իսկ Հայաստանը՝ ոչ:
«Ընդհանրապես, 2008 թվականից սկսած, երբ ընդունվեցին Մադրիդյան սկզբունքները, բոլոր առաջարկները նույն էության մեջ են եղել, և Լևոն Տեր-Պետրոսյանը շատ լավ նկարագրել է՝ ինչ է նշանակում Մադրիդյան սկզբունքներ: Նշանակում է ԼՂ-ի ինքնորոշում Ադրբեջանի կազմում: Դրանից հետո բոլոր առաջարկները, որոնց մի մասը, ի դեպ, Ադրբեջանն է մերժել, դա են ենթադրել: 2019 թվականի առաջարկը սկսվում է հետևյալով. «Ադրբեջանի նախագահը և Հայաստանի նախագահը...»: Ուզում եմ հիշեցնել՝ 2019-ին Հայաստանի նախագահը Նիկոլ Փաշինյանը չէր, Արմեն Սարգսյանն էր, և Արմեն Սարգսյանը չէր վարելու բանակցությունները:
Հետևաբար 2019-ի փաստաթուղթը եղել է Սերժ Սարգսյանի նախագահության ավարտի դրությամբ ինչ-որ հանրագումար, որը Հայաստանը չի մերժել: Հայաստանը որևէ առաջարկ չի մերժել»,- ընդգծեց ԱԺ նախագահի տեղակալը:
Նրա խոսքով՝ ՀՀ բոլոր նախկին նախագահները խոսում են, որ եղել են լավ առաջարկներ, իսկ եթե նման առաջարկներ եղել են, ինչու դրանք չեն իրագործվել:
«Իրականում Մադրիդյան սկզբունքներով ենթադրվող առաջարկները մենք գործնականում տեսել ենք, տեսել ենք, թե դրա ընդունումը ինչ էր ենթադրում, որովհետև 2010-ականներին հնչած բոլոր առաջարկները ենթադրել են, որ հայկական ուժերը դուրս են գալիս 7 շրջաններից, ԼՂ-ում և Լաչինի միջանցքի շուրջ առնվազն կանգնում են ռուս խաղաղապահներ, և կարգավիճակի հարցին չի լինում անդրադարձ: Էս իմ նշած ամեն ինչը նոյեմբերի 9-ի հայտարարությամբ տեղի է ունեցել: Մենք արդեն տեսել ենք՝ ինչ է լինում, երբ հայկական ուժերը դուրս են գալիս 7 շրջանների մի մասից, երբ մնում է Լաչինի միջանցք, և Լեռնային Ղարաբաղ ռուս խաղաղապահների կանգնելով տեսել ենք, որ ռուս խաղաղապահների ներկայությունը և նոյեմբերի 9-ի հայտարարությունը չի խանգարել, որ Ադրբեջանը 2023-ին իր վերահսկողության տակ վերցնի ԼՂ-ն»,- ասաց նա:
Անդրադառնալով ՀՀ նախկին նախագահների հայտարարություններին, թե իրենց իշխանության տարիներին եղել են լավ առաջարկներ, Ռուբինյանը բերեց հակափաստարկներ. «ԵԹե ձեր ժամանակ քննարկվում էր այդ հանճարեղ լուծումը, ինչի՞ այդ հանճարեղ լուծումը չի իրագործվել, գուցե Ադրբեջանը չի՞ համաձայնել: Հակափաստարկ 2. եթե ձեր լուծմանը Ադրբեջանը համաձայներ, այդ լուծումը արդեն իսկ հայտնի է՝ ենթադրելու էր 7 շրջանների վերահսկողության հանձնում Ադրբեջանին և ԼՂ շուրջ ռուս զորամիավորման տեղակայում»,- ասաց նա՝ ընդգծելով՝ մենք արդեն տեսել ենք դրա ավարտը:
