Մեր մարզային այցերի ընթացքում տեղի ունեցած դիտարկումների արդյունքում ենք որոշում կայացրել, որ մենք բոլոր մանկապարտեզները և դպրոցները պետք է ապահովենք նոր գույքով: Ուզում եմ իմ դիտարկումները կիսել՝ կապված դպրոցներում գույքի օգտագործման որակի հետ: Այդ մասին Կառավարության նիստին ասաց ՀՀ վարչապետ Նիկոլ Փաշինյանը:
«Գիտեք, ես շատ կարևոր եմ համարում, որ ինչ ասում եմ, ճիշտ ընկալվի. չընկալվի որպես մեղադրանք, նեգատիվ ինչ-որ բան, ընկալվի որպես մեր օրակարգի հարց, որը մենք պարտավոր ենք խոսել, հասցեագրել, լուծել»,- նշեց Փաշինյանը:
«Գիտեք, որ մենք բոլոր նորակառույց և հիմնանորոգվող դպրոցները ապահովում ենք նոր գույքով: Ես մասնավորապես ուզում եմ կենտրոնանալ մարզական գույքի, լաբորատոր գույքի, լաբորատորիաների վրա. քիմիա, ֆիզիկա, կենսաբանություն, աշխարհագրություն: Ես մտահոգություն ունեմ հետևյալի հետ կապված, թե ինչքանով է այդ գույքը որակով օգտագործվում, ինչքանով է դա նպաստում կրթական պրոցեսի զարգացմանը:
Ես այնպիսի դեպքերի եմ ականատես լինում,- որտեղ դա տեսել եմ, խնդրում եմ՝ սա չընկալեն որպես մեղադրանք կամ չնեղվեն, ես ուզում եմ կիսվել հրապարակային,- գնալու եմ, նույն բանը շարունակաբար ամեն տեղ տեսնելու եմ: Ես մտնում եմ նորակառույց դպրոց, բոլոր հնարավոր գույքերը դրված են, մտնում եմ մարզական դահլիճ, տեսնում եմ՝ թենիսի սեղանը դրված է բասկետբոլի վահանակի տակ... Ասում եմ՝ հարգելիներս, ինչո՞ւ եք այստեղ դրել. հասկացա՝ թենիս կխաղան երեխաները, բա բասկետբոլ ո՞նց են խաղալու: Մտնում ենք սպորտային դահլիճ, տեսնում ենք, այդ թվում, մեծ գույքեր կան. դրված է կենտրոնում: Մի անգամ գնում ես, տեսնում ես՝ դրված է, ասում ես՝ երևի այդ դասն է, երկրորդ անգամ գնում ես, տեսնում ես՝ նույն տեղում դրված է, երրորդ անգամ ես գնում, տեսնում ես՝ նույն տեղը դրված է:
Լաբորատորիաների հետ կապված՝ մենք հիմա քիմիայի լաբորատորաներում նաև սպիտակ խալաթներ ենք տալիս: Սկզբից տեսնում եմ՝ փաթեթների մեջ դրած է, ասում եմ՝ բա ինչո՞ւ է փաթեթի մեջ դրած, հաջորդ տեղը գնում եմ, հանած է, բայց էլի օգտագործած չէ: Այստեղ ես խնդիր եմ տեսնում»,- նշեց վարչապետը:
«Այսօր խոսել եմ նախարարի հետ. մեզ մոտ գոյություն ունեն, այդ թվում, դասալսումների ինստիտուտներ, և մենք, մասնավորապես հիմա, որտեղ հարցը սուր դրված է կրթական գույքի մասով, մենք, այսօրվանից սկսած, շարունակաբար, պատահականության սկզբունքով, չեմ ասում՝ բոլոր տեղերը, հատկապես նորակառույց դպրոցներում պետք է դասալսումներ անենք. մենք պետք է գնանք չնախատեսված մտնենք քիմիայի դասին, տեսնենք՝ լաբորատոր գույքն օգտագործվո՞ւմ է, թե՞ չէ: Ծրագրով կտեսնենք՝ այդ օրը ինչ դաս է նախատեսված, ֆիզկուլտուրայի գույքը պատշաճ օգտագործվո՞ւմ է, թե՞ ոչ. ֆիզիկայի լաբորատորիան, կենսաբանություն, աշխարհագրություն, և այլն, և այդպես շարունակ: Պետք է տեսնենք՝ այնտեղ էլեկտրական սալիկներ կա՞ն. գույք կա՞, որը շատ կարևոր է. այդ սալիկների վրա կարելի է սուրճ եփել, կարելի է դաս անել: Ես չեմ բացառում. սուրճ էլ թող եփեն. բայց դասը պարտադիր է»,- ասաց Նիկոլ Փաշինյանը:
Վարչապետի խոսքով՝ վերջերս մի տեղ իրենց օրինակն է բերել:
«Ասացի՝ մեր Իջևանի տանը եղել է և մինչև հիմա կա սերվիս, որը ես ծնված օրից հիշում եմ, բայց մենք ոչ մի անգամ չենք օգտագործել, պահարանում դրված է միշտ: Այս երևույթը չգիտեմ որտեղից: Այս ընկալումը խնդիր է. սա մի հոգու մասին չէ, սա մեր մասին է: Տարբեր մարզագույք կա, որը, ենթադրենք, կարող է 50-60 կգ քաշ ունենա: Պետք է ամեն դասի համար բերել-դնել, դասից հետո տանել պահեստ: Դրել ենք, մի բան որ մի տեղ դնում ենք, մի 6 տարի տեղից չենք շարժում, որ հազիվ դրել ենք: Դա էլ է կրթական պրոցես. դասը պետք է նախապատրաստվի: Այդքան շատ գույք դրել ենք, մարդիկ կասեն՝ այդքան պետք է հանենք դնե՞նք, հա, պետք է հանենք դնենք, որովհետև կրթությունը դա է: Մեր ժամանակվանից այդ ավանդույթը կար. դասագրքերը ստանում էինք, դպրոց չէինք տանում հետներս. ոնց որ ասենք՝ դասագրքերը պայուսակից ինչո՞ւ հանենք, մեկ է հետ ենք դնելու. սա պրոբլեմ է։
Վարչապետը նշեց, որ նախարարությունը և մարզպետարանները և մարզպետարանների հանրակրթության բաժինները պետք է համոզվեն, որ այդ գույքը տեղում է:
«Ես գիտեմ, որ մենք նորակառույց դպրոցներին մասնավորապես տալիս ենք էլեկտրոնային դաշնամուր, դահլիճներ կան, բեմ կա, և այլն: Էս վերջերս մտել եմ մի դպրոց, նայում եմ՝ դաշնամուր չկա, ասում եմ դաշնամուր չե՞ք ստացել, ասում է՝ ստացել ենք: Ասում է դահլիճին կից կա պահեստ, այդ պահեստում դրված է: Հագելիներս, դա երեխաների համար է. դա մեր տան սպասքի պես մի տարեք դրեք պահարանում, դուռը փակեք, որ 50 տարի հետո էլ վարչապետ գա, ասի՝ դաշնամուրն ո՞ւր է, ասեք՝ հեսա. ձեռք տված չի: Այդ դաշնամուրը դրված է, որ երեխաները նվագեն. թող երեխաները նվագեն, փչացնեն, թող տան ջարդեն. մի պահեք պահեստում. դրեք բեմերի վրա. բոլոր տեղերում դաշնամուրները ստացված են, դրանք պետք է լինեն բեմի վրա կամ հասանելի տեղում, դահլիճում պետք է լինեն, որ երեխաները նվագեն դաշնամուր:
Դա արվում է, որ երեխաները ստեղծագործելու հնարավորություն ունենան, դպրոցներում երկար մնալու մոտիվացիա լինի,- ասաց վարչապետը։
Փաշինյանը ընդգծեց նաև, որ ցնցուղները դպրոցում օգտագործված չեն: «Մտնում եմ դպրոց, նայում եմ ցնցուղները օգտագործած չեն, տնօրենն ասում է՝ այո, օգտագործած չեն: Ինչի համար ենք ամեն ինչ փակում. Կառավարոթյունը փող է ծախսել, որ երեխաներն օգտվեն, նրա համար չէ, որ նկարվենք, PR անենք, ասենք՝ տեսեք՝ ցնցուղ ենք առել: Սա խնդիր է, որին պետք է լուրջ ուշադրություն դարձնենք»,- նշեց Փաշինյանը:
«Էլի սկսել ենք դպրոցի պատերի վրա ինչ ասես կպցնել. այդ խնդիրն էլ լուծված չէ. այս հարցերը պետք է լուծվեն: Խնդրում եմ՝ լուրջ վերաբերվեք սրան: Պետք է նախարարությունն էլ, տեսչական մարմինն էլ, մարզպետարաններն էլ լուրջ վերաբերվեն սրան, որովհետև այնտեղ ձևակերպվում է մեր երկրի ընդհանրապես ամբողջ բովանդակությունը, և մենք պետք է ուշադիր լինենք այդ հարցերի նկատմամբ»,- ասաց նա։
Վարչապետի խոսքով՝ մենք մեր բյուջետային և կառավարման պրոցեսները պետք է կազմակերպենք այնպես, որ ստանդարտ ունենանք, որ ինչ-որ ժամանակ հետո դաշտը պետք է նորոգվի, ինչ-որ մի ժամանակ հետո լաբորատոր գույքը պետք է թարմացվի, նստարանը, գնդակը, թենիսի սեղանը և այլն:
