«Ալ Քաիդայի» հետ կապված լավ զինված ջիհադիստական խումբը մոտենում է Մալիի մայրաքաղաք Բամակոյին, Սահելի տարածաշրջանում անկայունությունն աճում է: Երկրի ղեկավարությունը և նրանց ռուս գործընկերները պայքարում են ջիհադիստներին հակազդելու համար, որոնք այժմ իշխանություն ունեն այդ հսկայական երկրի շատ մասերում՝ հայտնում է CNN-ը:
Զինյալները կառավարական ուժերից առգրավել են մեծ քանակությամբ զենք և ցուցադրել են անօդաչու թռչող սարքեր օգտագործելու իրենց կարողությունը: Բամակոյում վառելիքը սպառվում է, քանի որ «Ջամաաթ Նուսրաթ ալ Իսլամ ալ Մուսլիմին» (JNIM) անունով խմբավորման զինյալները փակում են մայրաքաղաք տանող ճանապարհները, հարձակվում ռազմական պարեկային կայանների վրա և դարանակալում են բեռնատար մեքենաները:
Իրավիճակի վատթարացման հետ մեկտեղ, Միացյալ Թագավորությունը, Միացյալ Նահանգները և Գերմանիան, ի թիվս այլոց, կոչ են արել իրենց քաղաքացիներին լքել Բամակոն:
JNIM-ը երկար ժամանակ ակտիվ է եղել Մալիում, որը ֆրանսիական գաղութ է եղել մինչև 1960 թվականին անկախություն ձեռք բերելը, ինչպես նաև Սահելի այլ մասերում, հատկապես հարևան Բուրկինա Ֆասոյում: Խմբավորումը ստեղծվել է 2017 թվականին որպես ջիհադիստական խմբավորումների կոալիցիա և անմիջապես հայտարարել է իր հավատարմությունը «Ալ Քաիդային»: Վերջին տարիներին այն ուժգնացել է՝ անկայունություն բերելով Մալիի կենտրոնական և արևմտյան շրջաններում։
