Քանի որ տեսչական վերահսկողության փուլերից մեկը, տեսչական ստուգումների վարութային փուլերից մեկը վերադասության կարգով բողոքներն են, և տեսչական մարմինների՝ այդ տրամաբանությամբ գործողությունների դեմ բողոքներն են, ուղիղ կապ ունեն, թե տնտեսվարողները համաձա՞յն են արդյոք ստուգման արդյունքներին, թե՞ համաձայն չեն, և դրանով են պայմանավորված նրանց բողոքները: Այսինքն՝ մենք չենք կարող կանխատեսել, թե մեր ստուգումներից քանիսի հետ իրենք համաձայն կլինեն, թե չեն լինի: Եվ այդ արդյունքային ցուցանիշի զրո լինելը դրանով է պայմանավորված: Այս մասին ԱԺ մշտական հանձնաժողովների համատեղ նիստին ասաց ՀՀ բնապահպանության և ընդերքի տեսչական մարմնի ղեկավար Հովհաննես Մարտիրոսյանը՝ պատասխանելով ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանի հարցին, որը վերաբերում էր արդյունքային ցուցանիշների ճշգիտ արտացոլմանը:
«Մենք այս հարցը ֆինանսների նախարարության մեր գործընկերների հետ էլ ենք շատ մանրամասն քննարկել և եկել ենք այդ համոզմունքին, որ չենք կարող կանխատեսել ստուգվող սուբյեկտի բողոքարկման իրավունքի իրացումը: Դրա համար էլ թիվը զրո է: 2024-ին մենք նման 40 բողոք ենք ունեցել»,- պատասխանեց Մարտիրոսյանը:
Ինչ վերաբերում է բողոքների ընթացքին՝ արդյոք բավարարվել են, թե ոչ, ներկայացրեց 2025-ի 9 ամսվա տվյալները:
«Ունեցել ենք 43 բողոք, քննվել են 39-ը, 7-ը բավարարվել են, մերժվել 23-ը»,- նշեց նա՝ պարզաբանելով՝ իրենք նախապես չեն կարող իմանալ՝ քաղաքացին կբողոքի՞ իրենց գործողությունների դեմ, թե՞ ոչ:
ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար Գարեգին Խաչատրյանն էլ իր հերթին նշեց՝ վարչական մարմինը, որը վերահսկողություն է իրականացնում և ունի գործիքակազմ՝ վարչական պատասխանատվության միջոց կիրառելու, չի կարող տեսչական մարմնի դեմ բերված բողոք չունենալ:
«Կստացվի, որ տեսչական մարմինը կա՛մ չի աշխատում, կա՛մ շատ վատ է աշխատում, կա՛մ անթերի, ինչը, իմ կարծիքով, իրատեսական չէ: Սա կոնկրետ մեր տեսչական մարմնի մասով եմ ասում»,- ասաց Խաչատրյանը՝ տեղեկացնելով՝ ունեն տեսչական մարմնի դեմ բողոքների նվազում:
Նրա խոսքով՝ 2023-ին տեսչական մարմինը 7400 վարչական ակտ է կայացրել, որից բողոքարկվել են 699-ը, 2024-ին՝ 8600 վարչական ակտ, որից բողոքարկվել են 672-ը:
«2025-ին այս պահի դրությամբ ունենք շուրջ 6000 կայացված վարչական ակտ, որից բողոքարկվել են 365-ը»,- հայտնեց Գարեգին Խաչատրյանը:
Խոսելով արդյունքային ցուցանիշներից՝ հայտնեց՝ ՀՀ քաղաքաշինության, տեխնիկական և հրդեհային անվտանգության տեսչական մարմնի 2023 և 2024 թվականների կատարած աշխատանքի ծավալը՝ բոլոր վերահսկողության ուղղություններով, 300-ից մինչև 2100 տոկոսով գերազանցում է նախորդող 4 տարիների կատարած աշխատանքի ծավալը:
