Երևանում հոկտեմբերի 24-25-ը անցկացվել է Հրաձգության Եվրոպայի կոնֆեդերացիայի (ESC) 30-րդ հոբելյանական ասամբլեան, որին մասնակցել են 47 երկրի շուրջ 110 պատվիրակ, ինչպես նաև շուրջ 50 պատվավոր հյուր։ Այս մասին տեղեկացնում են ԿԳՄՍՆ-ից:
Միջոցառմանը մասնակցել է նաև ՀՀ կրթության, գիտության, մշակույթի և սպորտի նախարարի տեղակալ Հասմիկ Ավագյանը։
Ասամբլեայի շրջանակում կայացել են կոնֆեդերացիայի նախագահի և ղեկավար կազմի ընտրությունները։ Փակ քվեարկության արդյունքում ձայների մեծամասնությամբ Ալեքսանդր Ռատները վերընտրվել է Եվրոպայի կոնֆեդերացիայի նախագահի պաշտոնում։
Ողջունելով ներկաներին և շնորհակալություն հայտնելով հյուրընկալության համար՝ Ալեքսանդր Ռատներն ընդգծել է, որ այս վեհաժողովը կոնֆեդերացիայի ժողովրդավարական գործընթացների առանցքն է, որտեղ բոլոր անդամ ֆեդերացիաները միավորվում են՝ վերանայելու ձեռքբերումները, փոխանակվելու կարծիքներով և սահմանելու ընդհանուր ապագայի ուղին։ Նա նաև շնորհակալություն է հայտնել հայաստանյան գործընկերներին՝ արդյունավետ համագործակցության և միջոցառման՝ բարձր մակարդակով կազմակերպման համար։
Ասամբլեայի ընթացքում ընտրվել են նաև կոնֆեդերացիայի փոխնախագահները՝ Գիորգի Նագին (Հունգարիա), Վեսելա Լետչևան (Բուլղարիա), Ջոն Հանսենը (Դանիա) և Նինո Սալուկվաձեն (Վրաստան)։
Երկօրյա ասամբլեայի ընթացքում քննարկվել են Եվրոպայում հրաձգության զարգացման հիմնական ուղղությունները, առաջիկա միջազգային մրցաշարերի կազմակերպման հարցերը, 2028 թվականի Օլիմպիական խաղերի որակավորման մրցաշարերի անցկացումը, ինչպես նաև Անդորրայի, Լիխտենշտեյնի և Սան Մարինոյի ազգային ֆեդերացիաների անդամակցության կարգավիճակը։ Հատուկ ուշադրություն է դարձվել նաև երիտասարդ մարզիկների ներգրավման ծրագրերին։
Ասամբլեայի ավարտին մասնակիցները բարձր են գնահատել Հայաստանի կողմից միջոցառման կազմակերպման մակարդակը և պատրաստակամությունը։ Նրանք նաև նշել են, որ մեծ ոգևորությամբ են սպասում 2026 թվականին Երևանում կայանալիք հրաձգության Եվրոպայի մեծահասակների առաջնությանը, որը կդառնա տարածաշրջանի կարևորագույն սպորտային իրադարձություններից մեկը։
