Նախագծով նախատեսվում է, որ Կադաստրի կոմիտեում այսօր կնքվող որոշակի պայմանագրեր, որոնք կնքվում եմ մեր գրասենյակներում, խորհրդատվական կենտրոններում, հնարավորություն լինի, որպեսզի էլեկտրոնային համակարգի միջոցով կողմերը՝ վաճառողը և գնորդը, «ԵսԵմ» նույնականացման համակարգով կազմված և ստորագրված պայմանագիրը ստորագրեն իրենց համակարգիչներից, իրենց հեռախոսներից էլեկտրոնային թվային ստորագրությամբ, այնուհետև այդ պայմանագրերը ներկայացնեն իրավունքի պետական գրանցման անմիջապես ստորագրումից հետո: Այդ մասին Կառավարության՝ օգոստոսի 21-ի նիստին ասաց Կադաստրի կոմիտեի ղեկավար Սուրեն Թովմասյանը՝ ներկայացնելով համապատասխան որոշման նախագիծը:
«Այս աշխատանքներն իրականացնելուց հետո համակարգն ինքնաշխատ կիրականացնի գնորդի իրավունքների պետական գրանցում և վաճառողի իրավունքների դադարեցում: Այսինքն՝ սրանով մենք ներդնելու ենք նոր գործիքակազմ, որն աջակցելու է մեզ թեթևացնելու ռեգիստրների աշխատանքային ծավալը, ինչպես նաև արագացնելու անշարժ գույքի նկատմամբ իրավունքների պետական գրանցման գործընթացը:
Այսօր ունենք 2-ժամյա գործընթաց, երբ պայմանագիրը կնքելուց հետո վեցապատիկ վճարի առկայության պարագայում 2 ժամվա ընթացքում ենք կատարում իրավունքի պետական գրանցումը: Այս փոփոխություններով այդ երկու ժամվա գործընթացը և վեցապատիկ վճարի խնդիրը կկարգավորվի այնպես, որ ինքնաշխատ համակարգով իրավունքի պետական գրանցումն իրականացնելուց հետո անմիջապես կգեներացվի պայմանագիրը, մուտք կատարելուց հետո համակարգն անմիջապես կգեներացնի գնորդի սեփականության իրավունքի վկայականը:
Այս օրենքի փոփոխությունը մենք իրականացնում ենք պիլոտային եղանակով, և կուզենայի մատնացույց անել նպատակը՝ ինչու ենք պիլոտային անում՝ հաշվի առնելով, որ իրավունքի պետական գրանցման մասին է խոսքը: Մենք այս պիլոտային ժամանակաշրջանում փորձարկելու ենք սահմանափակումների ինտեգրացիան, փորձարկելու ենք համակարգի ինքնաշխատ ալգորիթմը, և, համապատասխանաբար, այս փորձարկումից հետո մենք լիահույս ենք, որ կկարողանանք այս գործիքակազմը տարածել սկզբնական փուլում ստանդարտ պայմանագրերի վրա, հետագայում ավելի համապարփակ թվային լուծումներով տարածել ավելի բարդ պայմանագրերի նկատմամբ՝ իրավունքների պետական գրանցման գործընթացների վրա»,- ասաց նա:
Վարչապետ Նիկոլ Փաշինյանը երկու դիտարկում արեց. «Ընդհանուր մտահոգությունն այն է, որ հաքերային հարձակումների արդյունքում տեսականորեն կա հնարավորություն, որ անձնական տվյալների և այլնի արտահոսքեր տեղի կունենան, և դա պրոբլեմ է:
Երկրորդն էլ՝ այս թվային դարում մեզնից յուրաքնաչյուրի թվային գրագիտության խնդիրը կա: Ես, օրինակ, այդ պրոբլեմն ինձ վրա եմ զգացել, երբ ես ավտոբուսից օգտվում էի, և բանկային քարտով վճարում էի անում, իմ քարտի ամբողջական տվյալներն այն տեսանյութերում, որոնք հրապարակում էի, ամբողջական երևում էին: Այսինքն՝ այսպիսի բաներ կան, թվային հիգիենայի պարզ կանոններ կան, որ եթե մենք մեր թվային տվյալներին լուրջ չվերաբերվենք, ինչ-որ պահի կհավաքվեն այդ թվային տվյալները, և թվային ինքնությունն ամբողջությամբ այլ մարդկանց հասանելի կլինի, և մեր գույքի հետ հնարավոր է՝ ինչ ասես, անեն, այսինքն՝ այս ռիսկերը միշտ կան»:
